ރައީސް އޮފީހުގެ މިނިސްޓަރު އާދަމް ރަމީޒް ވެރިކަން ކުރާ މައި ޕާޓީ، ޕީއެންސީއާ ރޭ ގުޅިވަޑައިގެންފިއެވެ.
ޕީއެންސީ އޮފީހުގައި ބޭއްވި ކުޑަ ހަފްލާއެއްގައި ރަމީޒް ޕީއެންސީއާ ގުޅިވަޑައިގެންނެވި ފޯމް ހަވާލު ކުރައްވާފައި ވަނީ ރައީސް އަދި ޕާޓީގެ ރައީސް ޑރ. މުހައްމަދު މުއިއްޒާއެވެ. އެ ހަފްލާއެއްގައި ރައީސް މުއިއްޒުގެ އިތުރުން ޕީއެންސީގެ ޗެއާޕާސަން އަބްދުއްރަހީމް އަބްދުﷲ ވެސް ބައިވެރިވެވަޑައިގެންނެވިއެވެ.
ރަމީޒަކީ މިދިޔަ ރިޔާސީ އިންތިހާބު ރައީސް މުއިއްޒަށް ކާމިޔާބުކޮށް ދެއްވުމުގައި ބުރަ މަސައްކަތްތަކެއް ކުރެއްވި ބޭފުޅެކެވެ. އެގޮތުން، ރައީސް މުއިއްޒު ކެމްޕެއިންގައި ވަޑައިގެންނެވި ކޮންމެ ރަށަކަށް ހެން ރަމީޒް ވަޑައިގެން އެ މަސައްކަތުގައި އުޅުއްވިއެވެ. އޭގެ ކުރިން، ދެ ބޭފުޅުން މާލެ ސިޓީ ކައުންސިލްގައި މަސައްކަތް ކުރެއްވި އިރުގައި ވެސް ރައީސް މުއިއްޒުގެ އެންމެ އަރިހުގައި މަސައްކަތް ކުރެއްވީ ވެސް ރަމީޒެވެ.
ރައީސް މުއިއްޒަށް ޕީޕީއެމް/ޕީއެންސީ ޓިކެޓު ހޯއްދެވުމަށް ޕާޓީގެ ތެރެއިން ރަމީޒް މަސައްކަތް ކުރެއްވިކަމުގެ ތުހުމަތާ ގުޅިގެން އޭނާގެ މައްސަލަ ޕީޕީއެމްގެ ސުލޫކީ ކޮމިޓީން ބެލިއެވެ. އަދި ރަމީޒް ޕާޓީން ވަކި ކުރާނެ ކަމަށް ބެލެވިފައި ވަނިކޮށް އޭނާ ވަނީ އަމިއްލަ އަށް ޕީޕީއެމުން ވަކިވެވަޑައިގެންފައެވެ.
ރަމީޒު ޕީޕީއެމްއާ ގުޅިވަޑައިގަތުމުގެ ކުރިން އެމްއެންޑީއެފްގައި ގާތްގަނޑަކަށް 20 އަހަރު އުޅުއްވިއެވެ. އޭނާ ބޮޑަށް މަސައްކަތް ކުރެއްވީ ސްޕެޝަލް ޕްރޮޓެކްޝަން ގުރޫޕް (އެސްޕީޖީ)ގައެވެ.
