މެލޭޝިއާގައި ހުންނަ ދިވެހިރާއްޖޭގެ ހައިކޮމިޝަންގެ ޑެޕިއޓީ ހައިކޮމިޝަނަރގެ މަގާމްގައި ހުންނެވި ރައްޔިތުންގެ މަޖިލިހުގެ މަރަދޫ ދާއިރާގެ މެމްބަރު އިބުރާހިމް ޝަރީފް ދަރިފުޅު މަރިޔަމް މިޒުނާގެ މަގާމުގެ މުއްދަތު އިތުރު ކުރުމަށް ފޮރިން މިނިސްޓްރިން ނިންމައިފިއެވެ.
މިހާރު މީޑިއާތަކަށް އަންމު ވެފައިވާ، ފޮރިން މިނިސްޓްރީއިން މެލޭޝިއާގައި ހުންނަ ދިވެހި ހައި ކޮމިޝަންއަށް ފޮނުވާފައިވާ މެސެޖްގައި ވާގޮތުން މެލޭޝިއާގެ ހައި ކޮމިޝަންގެ ޑެޕިއުޓީ ހައިކޮމިޝަނަރގެ މަގާމްގައި ހުންނެވި, ޝަރީފްގެ ދަރިފުޅު މިޒުނާގެ ޕޯސްޓިންގެ މުއްދަތު ފޮރިން މިނިސްޓަރީން މިހާރުވަނީ އަންނަ އަހަރުގެ މާރޗްމަހުގެ 31 ގެ ނިޔަލަށް އިތުރު ކޮށްދީފައެވެ.
ރައީސް މުއިއްޒު ހުވާކުރުމާއެކު، ނޮވެމްބަރުމަހުގެ 18 ވަނަ ދުވަހުގެ ނިޔަލަށް، ރާއްޖޭގެ ހުރިހާ ޑިޕޮލޮމެޓިކް މިޝަންތަކުގައި ތިބި ސިޔާސީ ހުރިހާ މުއްޒަފުން އެނބުރި ރާއްޖެ އައުމަށް ސަރުކާރުން އަންގާފައިވެއެވެ.
އެހެންނަމަވެސް ބައެއް ބޭފުޅުންގެ އެދުމުގެ މަތިން މިމަހުގެ ނިޔަލަށް ބައެއް ފަރާތްތަކުގެ މަގާމުގެ މުއްދަތު ފޮރިން މިނިސްޓްރީން އިތުރުވެސް ކޮށްދީފައިވެއެވެ.
ޝަރީފްގެ ދަރިފުޅުގެ މަގާމުގެ މުއްދަތު ފޮރިން މިނިސްޓްރީން އިތުރު ކޮށްދީފައިވާއިރު، ޝަރީފް އިއްޔެ ވަނީ ރައްޔިތުންގެ އެމްޑީޕީން ވަކިވެވަޑައިގެންފިއެވެ. އޭނާ އެމްޑީޕީން ވަކިވިކަން ހާމަކޮށްފައިވަނީ އެމްޑީޕީގެ މެމްބަރުން ތިއްބަވާ ވަޓްސްއަޕް ގުރޫޕަކަށް ފޮނުވި މެސެޖެއްގައެވެ.
އެނގިފައިވާ ގޮތުގައި ޝަރީފްވަނީ އިއްޔެގެ ވަގުތެއްގައި އޭނާ އެމްޑީޕީން ވަކިވުމަށް ސިޓީ ހުށަހަޅުއްވާފައެވެ. ބައެއް ފަރާތްތަކުން "ޚަބަރު އޮންލައިން" އަށް މައުލޫމާތު ދީފައިވާ ގޮތުގައި ޝަރީފް އެމްޑީޕީން ވަކުިވުމަށްފަހު ވަރަށް އަވަހަށް ޕީއެންސީއަށް ސޮއި ކުރައްވާނެއެވެ.
ޝަރީފް އިއްޔެ އެމްޑީޕީން ވަކިވެފައިވާއިރު، އޭނާ އިއްޔެ އެމްޑީޕީގެ މަޖިލިސް މެމްބަރުން ތިއްބާވާ ވަޓްސްއަޕް ގުރޫޕަކަށް ފޮނުވި މެސެއްގައި ވިދާޅުވެފައިވަނީ އޭނާ ކުރިޔަށް އޮތް މަޖިލިސް އިންތިޚާބުގައިވެސް ވާދަ ނުކުރައްވާނެކަމަށާއި އަދި ސިޔާސީ މަސްރަހުންވެސް ދުރަށް ވަޑައިގެންނެވުމަށް ނިންމަވާފައިވާ ކަމުގައެވެ.
ޝަރީފް ހިމެނިވަޑައިގަންނަވަނީ ރައްޔިތުންގެ މަޖިލިހުގައި އެންމެ ގިނަ ދުވަހު ޚިދުމަތް ކުރެއްވި އެއް މެމްބަރުގެ ގޮތުގައެވެ. އެގޮތުން އޭނާވަނީ 20 އަހަރަށްވުރެ ގިނަ ދުވަހު މަޖިލިހުގައި ޚިދުމަތް ކުރައްވާފައެވެ. ޝަރީފް މިއަދު އެމްޑީޕީންވަކިވެވަަޑައިގެންފަައިވާއިރު، އެމްޑީޕީއަކީ އޭނާ އެންމެ ފުރަތަމަ ގުޅުނު ޕާޓީވެސްމެއެވެ. އެހެންނަމަވެސް އެއަށްފަހު އޭނާވަނީ ކުރީގެ ރައީސް މައުމޫން އުފެއްދެވި ޑީއާރުޕީގަވެސް އިސް ދައުރެއް އަދާކުރައްވާފައެވެ.
ޝަރީފްއަކީ މިހާރު އަމަލުކުރެވެމުންދާ ފެހު ގާނޫނު އަސާސީ އެކުލަވާލުމުގެ މަސައްކަތް ކުރުމަށް އެކުލަވާލި ޚާއްސަ މަޖިލިހުގައިވެސް މަސައްކަތް ކުރެއްވި ބޭފުޅެކެވެ. އޭނާވަނީ ރައީސް މައުމޫނުގެ ވެރިކަން ބަދަލުކުރުމަށް ކުރެވިގެންދިޔަ އިސްލާހީ މަސައްކަތުގައިވެސް އިސް ދައުރެއް އަދާކުރައްވާފައެވެ.
