ޔޫތާއި ސްޕޯޓްސް މިނިސްޓްރީ މި ސަރުކާރުން ބައިކޮށް، ދެ މިނިސްޓްރީ އަށް ބަދަލުކޮށް، ސާމާނުތައް ބަހާލި ވަގުތު ބައެއް ތަކެތި ގެއްލުނު މައްސަލާގައި އިންޓަރނަލް އިންވެސްޓިގޭޝަނެއް ފަށައިފިއެވެ.
މިދިޔަ މަހުގެ ފަހުކޮޅު ގެއްލުނު ސާމާނުތަކުގެ ތެރޭގައި ހަ މޮނިޓަރާއި ދެ ސީޕީޔޫ އަދި 65 އިންޗީގެ ޓީވީއެއް ވެސް ހިމެނެއެވެ.
ޔޫތު މިނިސްޓްރީން ނެރުނު ބަޔާނެއްގައި ބުނީ، ރައީސުލްޖުމްހޫރިއްޔާ ޑރ.މުހައްމަދު މުއިއްޒު ސަރުކާރު ހިންގެވުމުގެ އޮނިގަނޑަށް ގެންނެވި ބަދަލާއެކު އަލަށް އުފެއްދެވި ވުޒާރާތަކުގެތެރޭގައި ހިމެނޭ އެއް ވުޒާރާއަކީ މިނިސްޓްރީ އޮފް ޔޫތު އެމްޕަވަރމަންޓް އިންފޮމޭޝަން އެންޑް އާޓްސްކަމަށެވެ.
މިއީ މީގެކުރިން އެހެން ތިން ވުޒާރާއެއްކަމަށްވާ މިނިސްޓްރީ އޮފް ޔޫތު ސްޕޯޓްސް އެންޑް ކޮމިއުނިޓީ އެމްޕަވަރމަންޓްގެ ދަށުގައި އޮތް ޔޫތު، ކޮމިއުނިޓީ އެމްޕަވަރމެންޓް، މިނިސްޓްރީ އޮފް އާޓްސް، ކަލްޗަރ އެންޑް ހެރިޓޭޖް ދަށުގައި އޮތް ނެޝަނަލް ސެންޓަރ ފޮރ ދި އާޓްސް، ނެޝަނަލް ލައިބްރަރީ، ނެޝަނަލް ބިއުރޯ އޮފް ކްލެސިފިކޭޝަން، ނެޝަނަލް އަރކައިވްސް އަދި މިނިސްޓްރީ އޮފް ހޯމް އެފެއާޒްގެ މެންޑޭޓްގެ ދަށުގައި އޮތް ނޫސް މީޑިއާ ރަޖިސްޓްރީކުރުމުގެ ބައި އެއް ވުޒާރާއެއްގެ ދަށަށް ގެނެސް، އުފެއްދެވި އައު ވުޒާރާއެއްކަމަށް ބަޔާނުގައިވެއެވެ.
މިގެނެވުނު ބަދަލާއެކު އެ ވުޒާރާތަކުގެ ދަށުގައި ހުރި ޔޫތު މިނިސްޓްރީގެ ދަށަށް އަންނާންޖެހޭ މުވައްޒަފުންނާއި ތަކެތި ބަދަލުކުރުމުގެ މަސައްކަތްކޮށްފައިވަނީ އިސްވެދެންނެވުނު ވުޒާރާތަކުން އިސްވެ ތިބެކަމަށް ބުނެފައިވެއެވެ. މިގޮތުން މިނިސްޓްރީ އޮފް ސްޕޯޓްސް އެންޑް ރެކްރިއޭޝަންގެ ބައެއް މުވައްޒަފުންނާއި ތަކެތި މި ވުޒާރާއަށް ބަދަލުކުރެއްވީ އެވުޒާރާގެ ޒިންމާދާރު ވެރިޔާގެ ބެލުމުގެދަށުން އެވުޒާރާގެ މުވައްޒަފުންކަމަށްވެސް ބަޔާނުގައިވެއެވެ.
މިއިން އެއްވެސް މަރުހަލާއެއްގައި، ވުޒާރާއަކުން ތަކެތި ގެނައުމާއި ހަވާލުވުމުގައި މިވުޒާރާގެ އެއްވެސް ސިޔާސީ މުވައްޒަފެއް ބައިވެރިވެފައެއްނުވާނެއެވެ. ނަމަވެސް މިނިސްޓްރީ އޮފް ސްޕޯޓްސް އެންޑް ރެކްރިއޭޝަންގެ ބައެއް ތަކެތި، ދެ ވުޒާރާ ބަދަލުވުމުގައި ގެއްލިފައިވާކަމަށް މިވުޒާރާގެ ސަމާލުކަމަށް އައި ހިސާބުން މިކަން ހިނގިގޮތް ބެލުމަށް އިންޓަރނަލް އިންވެސްޓިގޭޝަނެއް މިހާރު ވަނީ ފަށާފައެވެ.
– ޔޫތު މިނިސްޓްރީން ނެރުނު ބަޔާނުގައިވެއެވެ.
ސްޕޯޓްސް މިނިސްޓްރީ ހިންގަނީ ކުރިއެކޭ އެއްގޮތަށް ވެލާނާގޭ ބިލްޑިންގްގެ ތިންވަނަ ފްލޯގަ އެވެ. ޔޫތު މިނިސްޓްރީ ބަދަލުކުރީ އެ އިމާރާތުގެ ހަތަރުވަނަ ފްލޯގައެވެ.
