ކުޅުދުއްފުށި ސިޓީއިން ފައިލޭރިއާގެ ޕޮޒިޓިވް ކޭސްތަކެއް ފެނި، މިހާރު ފެތުރެން ފަށާފައިވާ ފައިލޭރިއާ އިތުރަށް ފެތުރުނަނުދީ ކޮންޓްރޯލްކުރުމަށް އަރބަންކޯއިން ގިނަ މަސައްކަތްތަކެއް ކުރާން ފަށައިފިއެވެ.
އެގޮތުން އަރބަންކޯއިން ވަނީ މި މަހުގެ 22 ވަނަ ދުވަހު އެޗްޕީއޭ އަދި ދިވެހި ރެޑް ކްރެސެންޓް އާއި ގުޅިގެން ހުޅުމާލޭގައި ދިރިއުޅޭ ބިދޭސީންގެ ހެލަތް ސްކީރިންންގް ކުރިއަށްގެންގޮސްފައެވެ. އޭގެ އިތުރުންވެސް ތިލަފުށި، ގުޅީފަޅު އަދި ހުޅުމާލެ ހިމެނޭހެން 23 ޑިސްމަބަރ ގައި ރެންޑޮމް ސާމަޕްލިން ކުރިއަށް ގެންގޮސްފައި ވާއިރު، 'ފައިލޭރިއާއިން ރައްކާ' ނަމުގައި ކެމްޕެއިންއެއް ފަށައި، މިއަދު ހުޅުމާލެ 12 ޒޯންއަކަށް ބަހާލައިގެން ކޮންމެ ޒޯނެއްގައިވެސް މަދިރި އާލާވާ ތަންތަން ދެނެގަނެ މުޅި ހުޅުމާލޭގެ ސާރވޭއެއް ވަނީ ފަށާފައެވެ.
އާބަންކޯއިން ބުނެފައިވަނީ، ސްކޫލުތަކަށާއި ސަރުކާރު އަދި އަމިއްލަ ކުންފުނި މުއައްސަސާތަކުގެ މުއައްޒިފުންނަށް މި މަހުގެ 26 ވަނަ ދުވަހުން ފެށިގެން ހޭލުންތެރިކުރުވުމުގެ ސެޝަންތައްކުރިއަށް ގެންދެވޭނެ ކަމަށާއި، ހުޅުމާލޭގައި މި ކެމްޕެއިނަށް ބަހާލެވުނު 12 ޒޯންގައި ދިރިއުޅޭ މީހުން، ސްކޫލް ކުދިން، ސަރުކާރު އޮފިސް ކުންފުނިތައް ހިމެނޭހެން އެނެމެން ގުޅިގެން ސާފުކުރުމުގެ ބޮޑު ހަރާކާތެއް ފެށުމަށް ނިންމާފައިވާ ކަމުގައެވެ.
އަރބަންކޯއިންވަނީ މި ހަރަކާތްތަކުގައި ވީހާވެސް ގިނަ ރައްޔިތުން ބައިވެރިވެ، އެންމެން އެކީގައި ގުޅިގެން މަސައްކަތް ކޮށް މަދިރި ފެތުރޭ ތަންތަން ނައްތާލުމަށް ގޮވާލާފައެވެ.
