އދ.ގެ ސަލަމަތީ މ ަޖިލީހުން ފާސްކުރި ޤަރާރާއެއްގޮތައް ޣައްޒާއަށް އިންސާނީ އެހީ ފޯރުކޮށްދެވޭނީ، ހަމަލާތައް ހުއްޓުވައިގެންކަމަށް ރައީސް ޑރ. މުހައްމަދު މުޢިއްޒު ވިދާޅުވެއްޖެއެވެ.

ޣައްޒާއަށް އިންސާނީ އެހީ ފޯރުކޮށްދިނުމަށް ގޮވައިލައި އދ.ގެ ސަލާމަތީ މަޖިލީހުން ފާސްކުރި ގަރާރާގުޅިގެން ރައީސް އެކްސްގައި ކުރެއްވި ޕޯސްޓެއްގައި ވިދާޅުވީ، ޣައްޒާއަށް އިންސާނީ އެހީ ފޯރުކޮށްދެވޭނީ މިހާރު ދެމުންދާ ހަމަލާތައް ހުއްޓުވައިގެން ކަމަށް ރައީސް ވިދާޅުވިއެވެ. އެކަން ހުއްޓުވުމަށްޓަކައި މިހާރަށް ވުރެވެސް ފިޔަވަޅުތައް ހަރުދަނާ ކުރަންޖެހޭކަމަށް އެމަނިކުފާނު ވިދާޅުވިއެވެ.

ރައީސް ވިދާޅުވީ، ޣައްޒާގެ ރައްޔިތުންނަށް އިންސާނީ އެހީތެރިކަން ފޯރުކޮށްދިނުމަށް ގޮވާލައި އދ.ގެ ސަލާމަތީ މަޖިލީހުން ފާސްކުރި ގަރާރަކީ ރަނގަޅު މަގަށް އެޅި ފިޔަވަޅެއްކަމަށެވެ. ނަމަވެސް ޣައްޒާގެ ރައްޔިތުންނަށް އިންސާނީ އެހީތެރިކަން ރައްކާތެރިކަމާއެކު ފޯރުކޯށްދެވޭނެ މާހައުލެއް އަދިވެސް ނެތްކަމަށް ރައީސް ވިދާޅުވިއެވެ.

ޣައްޒާއަށް އިންސާނީ އެހީ އިތުރުކުރުމަށް އދ.ގެ ސަލާމަތީ މަޖިލީހުން ގަރާރު ފާސްކުރީ އިއްޔެއެވެ.

އެމެރިކާއިން ވީޓޯ ނުކުރުމަށްޓަކާ، ހަފުތާއެއްހާ ދުވަސް ވަންދެން ވޯޓަށް އެހުމާއި ހަމައަށްވެސް ކުރެވުނު މަޝްވަރާތަކަށްފަހު މި ގަރާރުގައި ގޮވާލާފައިވަނީ، "ދެމެހެއްޓެނިވި ގޮތެއްގައި ހަނގުރާމަ ހުއްޓާލުމުގެ ޝަރުތުތައް ގާއިމުކުރުމަށް" އަވަސް ފިޔަވަޅުތަކެއް އެޅުމުގެ އިތުރުން، އައްޒާއަށް އިންސާނީ އެހީތެރިކަން ފޯރުކޮށްދިނުމަށެވެ.

އިސްރާއީލާއި ހަމާސްއާ ދެމެދު 11 ހަފުތާގެ ހަނގުރާމައިގައި ޣައްޒާގައި މަރުވާ މީހުންގެ އަދަދު އިތުރުވެ، ފަލަސްތީނުގެ ޣައްޒާގައި އިންސާނީ ކާރިސާ އިތުރަށް ގޯސްވަމުންދާތީ މުޅި ދުނިޔޭގައި ނުރުހުން ފާޅުކުރަމުންދާ ދަނޑިވަޅެއްގައި، ޔޫއޭއީއިން އެކުލަވާލި ގަރާރު ފާސްކުރުމުގެ ފުރުސަތު 15 މެމްބަރުންގެ ކައުންސިލަށް ދިނުމަށް އެމެރިކާއިން ވަނީ އެއްވެސް ކޮޅަކަށް ވޯޓު ނުދީފައެވެ.

މިގޮތުން ރަޝިއާ ފިޔަވައި ދެން ތިބި ކައުންސިލް ހުރިހާ މެމްބަރުން ވެސް އެ ގަރާރަށް ވޯޓު ދީފައި އެވެ.

ކުރެވުނު ފަންތީގެ މަޝްވަރާތަކަށް ފަހު، ސަލާމަތީ މަޖިލިހުން ފާސްކުރި މި ގަރާރުގެ ސަބަބުން ޣައްޒާގެ 2.3 މިލިއަން މީހުންނަށް ދޭ ހުރިހާ އެހީއެއްގެ މައްޗަށް އިސްރާއީލުގެ ކޮންޓްރޯލް ހިނގާ މިންވަރު ކުޑައެއް ނުވާނެ އެވެ. އިސްރާއީލުން ޣައްޒާއަށް ފޯރުކޮށްދޭ އެހީތައް މިސްރުން ރަފާ ކްރޮސިން އާއި އިޒްރޭލުން ކޮންޓްރޯލް ކުރާ ކެރެމް ޝަލޯމް ކްރޮސިން މެދުވެރިކޮށް މޮނިޓާ ކުރެ އެވެ.

މި ގަރާރުގައި ހަނގުރާމަ ހުއްޓާލުމާ ގުޅިގެން ކަންތައްތަކެއް ބަޔާން ކޮށްފައި ނުވުމުގެ ސަބަބުން ކައުންސިލްގެ ގިނަ މެމްބަރުންތަކެއް މާޔޫސްވެފައިވާ ކަމަށާއި އޭގެ ތެރޭގައި ވީޓޯގެ ބާރުއޮތް ރަޝިއާ އާއި އަރަބި އަދި އޯގަނައިޒޭޝަން އޮފް އިސްލާމިކް ކޯޕަރޭޝަންގެ ގައުމުތައް ވެސް ހިމެނޭއިރު އޭގެ ތެރެއިން ބައެއް ގައުމުތަކުން ދެކޭ ގޮތުގައި އެއީ ހަމާސްއާ ދެކޮޅަށް އިތުރަށް ފިޔަވަޅު އެޅުމަށް އިސްރާއީލަށް ރުހުން ދިނުން ކަމަށްވެސް ޑިޕްލޮމެޓުން ދެކެ އެވެ.

ޔޫއެންއިން ފާސްކުރި ގަރާރުގައި ވަނީ "ހުއްޓުމެއް ނެތި، ރައްކާތެރިކަމާއެކު އިންސާނީ އެހީތެރިކަން ޣައްޒާއަށް ފޯރުކޮށްފިނުމުގެ ފުރުސަތު ވަގުތުން ދިނުމަށާއި، ދެމެހެއްޓެނިވި ގޮތެއްގައި ހަނގުރާމަ ހުއްޓާލުމުގެ ޝަރުތުތައް ގާއިމުކުރުމަށް އަވަސް ފިޔަވަޅުތަކެއް އެޅުމަށް ގޮވާލާފައެވެ.".

މި ގަރާރުގެ އިބްތިދާއީ ޑްރާފްޓްގައި ވަނީ އެހީ އަށް ވަނުމުގެ ފުރުސަތު ދިނުމުގެ ގޮތުން "އަވަސް އަދި ދެމެހެއްޓެނިވި ގޮތެއްގައި ހަމަނުޖެހުންތައް ހުއްޓާލުމަށް" ގޮވާލާފަ އެވެ.

މިމަހުގެ ކުރީކޮޅު އދ.ގެ 193 މެންބަރުން ހިމެނޭ އާންމު މަޖިލީހުން ހަނގުރާމަ ހުއްޓާލުމަށް ގޮވާލާފައިވާއިރު، މީގެ ދުވަސްކޮޅެއް ކުރިން ސަލާމަތީ މަޖިލީހުގައި އެމެރިކާއިން ވީޓޯކޮށްފައިވާ މި ފިޔަވަޅަށް ތާއީދުކޮށް 153 ގައުމަކުން ވަނީ ވޯޓު ދީފައެވެ.

އެމެރިކާ އާއި އިސްރާއީލުން ހަނގުރާމަ ހުއްޓާލުމާ ދެކޮޅު ހަދަނީ އެކަމުގެ ފައިދާ ލިބޭނީ ހަމާސް އަށް އެކަނި ކަމަށް ގަބޫލުކޮށްގެންނެވެ. އޭގެ ބަދަލުގައި ވޮޝިންޓަނުން ތާއީދު ކުރަނީ ހަމާސް ޖަމާއަތުން  ރަހީނުކުރި މީހުން ހިމާޔަތް ކުރުމަށް ހަނގުރާމަތައް މެދުކަނޑާލުމަށެވެ.