މާފުށީ ޖަލުގެ ޔުނިޓް 10ގައި ތިބި ބައެއް ގައިދީންނާ މެދު ތަފާތުކުރުން ގެންގުޅޭ ކަމަށް ބުނެ، އެ ގައިދީން ބަނޑުހައި ހޫނުކަމުގެ ހަޅުތާލެއް ކުރަމުންދާ 3 ދުވަސް ވެފައިވާކަމަށް އެ ގައިދީންގެ އާއިލާތަކުން ބުނެފިއެވެ.

މި ގައިދީންގެ ހަޅުތާލާއި ގުޅިގެން މޯލްޑިވްސް ހިއުމަން ރައިޓްސް އެންޑް ޑިޓެއިން ވޮޗް އިން ރޭ ވަނީ ގައިދީންނާމެދު އޮތް ތަފާތުކުރުންތައް ނައްތާލުމަށް ގޮވާލާފައެވެ. އަދި އެ ޖަމިއްޔާއިން ބުނެފައިވަނީ ގައިދީންގެ އާއިލާތަކުން އެ ޖަމިއްޔާއަށް މިކަމާއި ގުޅުންހުރި ޝަކުވާތައް ހިއްސާކުރަމުންދާ ކަމުގައެވެ.

އާއިލާތަކުން ބުނެފައިވާކަމަށް މޯލްޑިވްސް ހިއުމަން ރައިޓްސް އެންޑް ޑިޓެއިން ވޮޗްއިން ބުނެފައިވަނީ ހަޅުތާލު ފެށިފައިވަނީ އެ ޔުނިޓުގެ ފަސް ގައިދީއަކާ މެދު ކަރެކްޝަނުން ގެންގުޅެމުންދާ ތަފާތުކުރުންތަކާ ގުޅިގެން ކަމަށެވެ

ހަޅުތާލުކުރާ ކަމަށް އާއިލާއިން ތުހުމަތުކުރާ ސަބަބުތައް:

މޯލްޑިވްސް ހިއުމަން ރައިޓްސް އެންޑް ޑިޓެއިން ވޮޗްގެ ބަޔާނުގައި ބުނެފައިވަނީ، އާއިލާތަކުގެ ޝަކުވާތަކާއި ގުޅިގެން އެ ޖަމިއްޔާއިން ބެލިބެލުމުން މާފުށީ ޖަލުގެ އެ ޔުނިޓުގައި ތިބި ގައިދީން ޖަލުންދޭ ކޮއްތު ބޭނުން ކުރުން މިހާރު ހުއްޓާލާފައިވާ ކަމަށް ފާހަގަ ކުރެވިފައިވާކަމުގައެވެ. އަދި އެކަން ހައްލުކުރުމަށް އެ ގައިދީންނާ ބައްދަލުކޮށް ވާހަކަ ދައްކަމުން ދާކަމަށް ކަރެކްޝަނުން މައުލޫމާތު ދީފައިވާ ކަމަށްވެސް ބަޔާނުގައި ބުނެފައި ވެއެވެ.

ތަފާތުކުރުން ނައްތާލައި ގައިދީންގެ ހައްގުތަށް ކަށަވަރުކޮށްދިނުމަށް ގޮވާލައި މޯލްޑިވްސް ހިއުމަން ރައިޓްސް އެންޑް ޑިޓެއިން ވޮޗް ނެރެފައިވާ  ބަޔާނުގައި ވަނީ ތަފާތުކުރުމުގެ ސަގާފަތަކީ ނެތިދާންޖެހޭ ސަގާފަތަކަށް ބުނެފައެވެ. ސަބަބަކީ ތަފާތުކުރުންތަކުގެ ސަބަބުން ބައެއްގެ ހައްގުތައް ގެއްލި އަނިޔާވެރިކަމަށް ހުށަހެޅިގެންދާތީ ކަމަށްވެސް އެ ޖަމިއްޔާއިން ބުނެފައި ވެއެވެ.