ފާއިތުވި 3 އަހަރު ތެރޭ ދައުލަތުން 8.2 ބިލިއަން ރުފިޔާގެ ފައިސާ ޗާޕްކޮށްފައިވާކަން ހާމަ ވެއްޖެއެވެ. އެމްއެމްއޭގެ ތަފާސް ހިސާބުތަކުން އެނގޭ ގޮތުގައި ފާއިތުވި 3 އަހަރު ތެރޭ ސަރުކާރުން ވަނި އެމްއެމްއާއިން 8.2 ބިލިއަން ރުފިޔާ އޯވަރޑްރޯ ކޮށްފައެވެ.
އެމްއެމްއޭގެ ތަފާސް ހިސާބުތަކުން އެނގޭ ގޮތުގައި 2020 ވަނަ އަހަރުގެ ނިޔަލަށް އެމްއެމްއޭއިން އޯވަރޑްރޯ ކޮށްފައިވާ އަދަދަކީ 6.1 ބިލިއަން ރުފިޔާއެވެ. އެހެންނަމަވެސް މިއަހަރު އޮކްޓޯބަރުމަހުގެ ނިޔަލަށް އެމްއެމްއޭއިން އޯވަރޑްރޯ ކޮށްފައިވާ މިންވަރު ވަނީ 14.3 ބިލިއަން ރުފިޔާއަށް އަރާފައެވެ.
ކުރީ ސަރުކާރުން ވަނީ 2020 ވަނަ އަހަރުން ފެށިގެން ފައިސާ ޗާޕު ކުރެވޭ މިންވަރު 4.4 ބިލިއަން ރުފިޔާއަށް ލިމިޓް އިތުރު ކޮށްފައެވެ. އަދި އެއަށްދަަށް ފައިސާ ވިތްޑްރޯ ކުރެވޭގޮތަށް ރައްޔިތުންގެ މަޖިލިހުންވަނީ ހުއްދަ ދީފައެވެ.
އެހެންނަމަވެސް ފައިސާ ޗާޕްކުރެވޭ ގޮތަށް އޮންނަ އޮތުން މި ސަރުކާރުންވަނީ ބަދަލު ކޮށްފައެވެ.
ކުރީ ސަރުކާރުން ފައިސާ ޗާޕުކޮށްފައިވަނީ ކޯވިޑްގެ އާލަމީ ވަބާއަށްއަށްފަހު މުޅިދުނިޔެއަށް ކުރިމަތިވި އިގްތިސާދީ ގޮންޖެހުންތަކުން އަރައިގަތުމަށްކަމަށް އޭރުގެ ސަރުކާރުން ބުނެފައި ވެއެވެ.
އެހެންނަމަވެސް ފައިސާ ޗާކުރުމާއި ގުޅިގެން އިގްތިސާދުގައި ދައުރުވާ ފައިސާގެ މިންވަރު އިތުރުވެ، ޑޮލަރުގެ އެކްސްޗޭންޖަށް ނޭދެވޭ އަސަރުކޮށް، ދިވެހި ފައިސާގެ އަގު ވެއްޓިގެން ގޮސްފައި ވެއެވެ.
