މި ސަރުކާރުން ކުރިއަށްގެންދާނެ އެންމެ ބޮޑު އެއް މަޝްރޫއު ކަމަށްވާ ދެކުނު މާލެ އަތޮޅުގައި އޮންނަ ފުށިދިއްގަރު ފަޅު ހިއްކުމުގެ މަޝްރޫޢު، 'ރަސް މާލެ' މަޝްރޫއުގެ ފަޅު ހިއްކުމުގެ މަސައްކަތް ކުރިޔަށް ގެންދަނީ، ހުޅުމާލޭން 10 ހެކްޓަރުގެ ބިމާއި ފުށިދިއްގަރުފަޅުން ހިއްކާ ބިމުން 60 ހެކްޓަރު ސީއެމްސީއަށް ދީގެން ކަމަށް އާބަންކޯ އިން ބުނެފި އެވެ.
މިއަދު އޮތް ނޫސްވެރިންގެ ބައްދަލުވުމުގައި އާބަންކޯގެ އެމްޑީ ފަޒުލް ރަޝީދު ވިދާޅުވީ ހުޅުމާލެއިން ދޫކުރާ 10 ހެކްޓަރު, އަދި ރަސްމާލެއިން ދޫކުރާ 60 ހެކްޓަރު ދީގެން އޭގެ ބަދަލުގައި އާބަންކޯއަށް 1093 ހެކްޓަރު ބިން ނުވަތަ އެސެޓް އެކުންފުންޏަށް ލިބިގެންދާ ކަމަށެވެ.
ހުޅުމާލެއިން ދޫކުރާ 10 ހެކްޓަރު, ރަސްމާލެއިން ދޫކުރާ 60 ހެކްޓަރު. އޭގެ ބަދަލުގައި އަޅުގަނޑުމެންނަށް މި ލިބެނީ 1093 ހެކްޓަރު ބިން. އެޗްޑީސީގެ އެސެޓަށް އެޗްޑީސީއަށް ޖަމާވެގެން މި އަންނަނީ.
މިއަދު އާބަންކޯއިން ބޭއްވި ނޫސްވެރިިންގެ ބައްދަލުވުމެއްގައި އާބަންކޯގެ އެމްޑީ ފަޒުލް ވިދާޅުވި އެވެ.
ކުންފުންޏަށް ބިންތައް ދޫކުރާ މުއްދަތާ ގުޅޭގޮތުން ނޫސްވެރިން ސުވާލުކުމުން ފަޒުލް ވިދާޅުވީ ބިންތައް ސީއެމްސީއަށް ދޫކުރަނީ “ޑިވެލޮޕްމަންޓު ޕީރިއަޑް”އަށް ކަމަށާއި އެއީ 49 އަހަރާއިނލ އިތުރު 50 އަހަރު ކަމަށްވެސް އޭނާ ވިދާޅިވިއެވެ.
މިމަޝްރޫއު ކުރިޔަށް ގެންދަން މި ސަރުކާރުން 400 މިލިއަން ރުފިޔާ ބަޖެޓް ކުރިނަމަވެސް އެމްޑީޕީންވަނީ އެ ފައިސާ ބަޖެޓުން އުނިކޮށްފައެވެ. އޭގެ ފަހުން ރައީސް މުއިއްޒު ވިދާޅުވެފައިވަނީ ރަސްމާލެ މަޝްރޫ ކުރިޔަށް ގެންދާނީ ބަޖެޓުން ޚަރަދު ކޮށްގެން ނޫންކަމުގައެވެ.
ކައުންސިލްތަކުގެ އަގު ވަޒަންކުރަން ބޭއްވި "ކަންގަތި އެވޯޑް" ދިނުމަށް ދަރުބާރުގޭގައި ބޭއްވި ހަފްލާގައި ރައީސް މުއިއްޒު ވަނީ ފުށިދިއްގަރުފަޅު ހިއްކަން 400 މިލިއަން ރުފިޔާ ހިމަނާފައި އޮއްވައި، މަޖިލިހުން ބަޖެޓް ފާސް ކުރިއިރު އެ ފައިސާ އުނިކޮށް އެހެން މަޝްރޫއުތަކަށް ހަމަޖެއްސުމަކީ ދިވެހި ރައްޔިތުންނާއި ގައުމާ އެއްކޮޅަށް ނިންމެވި ނިންމެވުމެއްތޯ ސުވާލު ކުރައްވައިފައެވެ.
ފުށިދިއްގަރު ފަޅު ހިއްކުމުގެ ބިޔަ މަޝްރޫއު ވެރިކަމުގެ ފުރަތަމަ 14 ހަފުތާގެ ތެރޭގައި ފަށަން ނިންމީ އެއީ ރައްޔިތުން އެންމެ ބޭނުންވެފައިވާ ބޯހިޔާވަހިކަމަށް ހައްލު ހޯދައިދެވޭނެ މަޝްރޫއުއަށް ވާތީ ކަމުގައި ރައީސް ވިދާޅުވިއެވެ.
ރައީސް ވިދާޅުވި ގޮތުގައި ފުށިދިއްގަރުފަޅު ހިއްކުމުގެ މަޝްރޫއު ފައްޓަވަން ޖެހުނީ ވަރަށް ދަތި އުނދަގުލުން އެހެން މަގަކުންނެވެ. އަދި އެ މަޝްރޫއު ފެއްޓެވީ ދިވެހި ރައްޔިތުންނާ އެއްކޮޅަށް ހުންނަވައި ކަމުގައި ރައީސް ވިދާޅުވިއެވެ.
ކޮންމެ ފަސް އަހަރަކުން އެއްފަހަރު ސިޔާސީ މީހުންގެ ކަންފަތްބުޑުގައި ސަލާންޖަހާން ނިކަމެތި ޖިފުޓިތަކެއްގައި ދިވެހި ރައްޔިތުން ބައިތިއްބައިފައި މި ތިބި ތިބުމަށް އިރާދަކުރެއްވިއްޔާ އަޅުގަނޑު ދާއިމަށް ނިމުމެއް ގެންނާނަން. އަޅުގަނޑު އަބަދުވެސް ހުންނާނީ ރައްޔިތުންނާ އެއްކޮޅަށް. އަޅުގަނޑު ހުންނާނީ ރައްޔިތުންގެ ފަޅީގައި. ސަބަބަކީ އަޅުގަނޑު ދިވެހި ކޮންމެ ރައްޔިތެއް ދެކެ ވަރަށް ލޯބިވަން.
ރައީސް ވިދާޅުވިއެވެ.
ފުށިދިއްގަރުފަޅަކީ ގާތްގަނޑަކަށް 1،280 ހެކްޓަރުގެ ބޮޑު ސަރަހައްދެކެވެ. އެ ފަޅުން ހިއްކުމަށް ހަމަޖެހިފައިވަނީ 1153 ހެކްޓަރެވެ.
