2023 ވަނަ އަހަރަށް ދިވެހިރާއްޖެއިން 1.8 މިލިއަން ވަނަ ޓޫރިސްޓަށް މަރުހަބާ ކިޔާ، 1.8 މިލިއަން ޓޫރިސްޓުންގެ އަމާޒަށް ވާސިލް ވެއްޖެއެވެ.
މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ/ ވިޒިޓް މޯލްޑިވްސް) އިން އިއްޔެ ވަނީ މި މުނާސަބަތު ފާހަގަކުރުމުގެ ގޮތުން ފޯރިގަދަ ރަސްމިއްޔާތެއް ވެލާނާ އިންޓަރނޭޝަނަލް އެއަރޕޯޓުގައި ބާއްވައިފަ އެވެ.
މިގޮތުން، 20 ޑިސެމްބަރު 2023 ގައި ޔޫއޭއީގެ ދުބާއީއިން ފުރައިގެން ފްލައިޓް އީކޭ652 ގައި ނެދަލޭންޑްސްގެ ރައްޔިތެއް ކަމަށްވާ މިސްޓަރ ސްޓެފަން މަތިޖްސް ހަރްމަންސް ރާއްޖެ އައުމާއެކު، މިއަހަރު 1.8 މިލއަން ފަތުރުވެރިންގެ އަމާޒަށް ވާސިލްވެވިފައިވާކަމަށް އެމްއެމްޕީއާރުސީން ބުނެފައި ވެއެވެ.
މިއީ ހަރްމަންސް ރާއްޖެއަށް ކުރައްވާ ފުރަތަމަ ދަތުރަށް ވާއިރު، އޭނާ ރާއްޖެ އައިސްފައިވަނީ އަނބިކަނބަލުންނާއި ދެ ދަރިންނާއެކު އާއިލީ ޗުއްޓީއަކަށެވެ. މިއީ މިހާތަނަށް ރާއްޖެއަށް 1.8 މިލިއަނަށްވުރެ ގިނަ ފަތުރުވެރިން ޒިޔާރަތްކުރި ފުރަތަމަ އަހަރެވެ.
އެމްއެމްޕީއާރްސީން ވެލާނާ އިންޓަނޭޝަނަލް އެއާޕޯޓުގައި ބޭއްވި ހާއްސަ ހަފްލާގައި ޓޫރިޒަމް މިނިސްޓްރީ އާއި މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އާއި މޯލްޑިވްސް އިމިގްރޭޝަން އަދި މޯލްޑިވްސް ކަސްޓަމްސް ސާވިސްގެ ބޭފުޅުން ބައިވެރިވެވަޑައިގެންނެވި އެވެ.
މި ރަސްމިއްޔާތުގައި މިނިސްޓަރ އޮފް ޓޫރިޒަމް އޮނަރަބަލް އިބްރާހީމް ފައިސަލްގެ އިތުރުން އެމްއެމްޕީއާރުސީގެ ޗީފް އެގްޒެކެޓިވް އޮފިސަރ އަދި މެނޭޖިންގ ޑިރެކްޓަރ (ސީއީއޯ އެންޑް އެމްޑީ) އަލްފާޟިލާ ފާތުމަތު ތައުފީޤްވެސް ބައިވެރިވެވަޑައިގެންނެވިއެވެ. އޭގެ އިތުރުން އެމްއޭސީއެލްގެ ސީއީއޯ އަދި އެމްޑީ އަލްފާޟިލް އިބްރާހީމް ޝަރީފް މުޙަންމަދާއި، އެއަރޕޯޓް ޑިވިޜަންގެ ހެޑް، މޯލްޑިވްސް އިމިގްރޭޝަންގެ ޕްރިންސިޕަލް އިމިގްރޭޝަން އޮފިސަރ އަލްފާޟިލާ ފާޠިމަތު މަޖީދާ ޙަސަން އަދި ޑެޕިއުޓީ ކޮމިޝަނަރ އޮފް ކަސްޓަމްސް އަލްފާޟިލް މަޙްމޫދު ރިޔާޒްވެސް މި ރަސްމިއްޔާތުގައި ބައިވެރިވެވަޑައިގެންނެވިއެވެ.
އެމްއެމްޕީއާރުސީއާއި ޓުއަރިޒަމް މިނިސްޓްރީން ވަނީ މިއަހަރު 1 މިލިއަން ފަތުރުވެރިޔާ ރާއްޖެ އައުންވެސް ފާހަގަ ކޮށްފައެވެ. އަދ ފާއިތުވެދިޔަ އަަހަރުވަނި 1.6 މިލިއަން ވަނަ ފަތުރުވެރިޔާ ރާއްޖެ އައުންވެސް ފާހަގަ ކޮށްފައެވެ.
މި ޑސެމްބަރު މަހުގެ ތިން ވަނަ ދުވަހާއި ހަމައަށް ރާއްޖެ އައި ފަތުރުވެރިންގެ ތަފާސްހިސާބުތައް ދައްކާގޮތުން އެ ދުވަހުގެ ނިޔަލަށް ރާއްޖެއަށް 1،703،204 ފަތުރުވެރިން އައިސްފައި ވެއެވެ. މިއީ މިދިޔަ އަހަރުގެ މި މުއްދަތާ އަޅާކިޔާއިރު، %12.9 ކުރިއެރެމެކެވެ. މިދިޔަ އަހަރުގެ މި މުއްދަތުގައި ރާއްޖެ އައިސްފައި ވަނީ 1،508،307 ފަތުރުވެރިންނެވެ.
ތަފާސްހިސާބުތައް ދައްކާގޮތުގައި މިއަހަރު އެންމެ ގިނައިން ރާއްޖެއަށް ފަތުރުވެރިން އައިސްފައިވަނީ ރަޝިޔާއިންނެވެ. އަގައުމުން 193،269 ފަތުރުވެރިން ރާއްޖެ އައިސްފައި ވެއެވެ. ދެވަނައަށް އެންމެ ގިނައިން ފަތުރުވެރިން ޒިޔާރަތް ކުރީ އިންޑިއާއިންނެވެ. އެގައުމުން ރާއްޖެއަށް 185،987 ފަތުރުވެރިން ރާއްޖެ އައިސްފައިވެއެވެ. ލިސްޓުގެ ތިންވަނާގައި އޮތް ޗައިނާއިން 176،803 ފަތުރުވެރިން އައިސްފައި ވެއެވެ.
ޓޫރިޒަމްގެ ތަފާސްހިސާބުތައް ދަައްްކާގޮތުން މިހާރު ރާއްޖޭގައި 119 ރިސޯޓެއް ހިންގަމުން ދެއެވެ. އަދި 14 ހޮޓަލެއް މިވަގުތު އޮޕަރޭޝަނަށް ގެެސްފައިވާއިރު، 924 ގެސްޓް ހައުސް އަކާއި، 144 ސަފާރީ އޮޕަރޭޝަނަށް ގެެނެސްފައި ވެއެވެ.
