ހުޅުމާލޭގައި ދެ ކާރު ޖެހި ހިނގި ނުރައްކާތެރި އެކްސިޑެންޓުގައި ފިލި ކާރު ހޯދުމުގެ މަސައްކަތް ފުލުހުން ކުރަމުންދާކަން ފުލުހުންގެ ފަރާތުން ވިދާޅުވެއްޖެއެވެ.
ފުލުހުން ބުނެފައިވަނީ ރޭ ހުޅުލާމޭގައި ހިނގި އެކްސިޑެންޓުގެ މައުލޫމާތު އެ މުވައްސަސާއަށް ލިބިފައިވަނީ ރޭ 23:40 އެހާކަންހާއިރު ކަމަށެވެ.
ފުލުހުންގެ މީޑިއާ އޮފިޝަލް ވިދާޅުވީ، މި އެކްސިޑެންޓް ހިނގާފައިވަނީ ރޭ ހުޅުމާލޭ ދެވަނަ ފިޔަވަހީގެ ކަމާލް ދީދީ ސްކޫލް ކައިރިން ކަމަށެވެ.
ފުލުހުން ހާމަކޮށްފައިވާ ގޮތުގައި، އެކްސިޑެންޓުވި އެއް ކާރު ދުއްވަން އިން މީހާ އަތުގައި ލައިސަސްވެސް އޮތް ކަމަށާއި، އެ ކާރުގައި 4 މީހުން ތިބި ކަމަށެވެ. އަދި އެ ކާރުގައި ތިބި މީހުންނަށް އެކުވަރުގެ އަނިޔާ ލިބިފުނު ނަމަވެސް އެ އެންމެންވެސް ފަރުވާ ދިނުމަށްފަހު މިހާރު ދޫކޮށްލާފައިވާކަމަށްވެސް ފުލުހުން ބުނެފައި ވެއެވެ. އެ ކާރަށް އެކިވަރުގެ ގެއްލުން ލިބިފައި ވެއެވެ.
މި އެކްސިޑެންޓްގައި މަޑުނުކޮށް ގޮސްފައިވާ ކާރު ހޯދުމުގެ މަސައްކަތް ފުލުހުން ކުރަމުން އަންނަ އިއުރު މި އެކްސިޑެންޓު އިތުރަށް ތަހުގީގު ކުރަމުންދާކަަށްވެސް ފުލުހުން ބުނެފައި ވެއެވެ.
ފުލުހުން ބުނެފައިވަނީ ފިލިކާރު ހޯދުމުގެ މަސައްކަތްތަކަށް އާންމުންގެ އެހީތެރިކަންވެސް ހޯދަން ޖެހިދާނެ ކަމަށެވެ.
