މިފަދަ ދަނޑިވަޅެއްގައި ދައުލަތުގެ އިސްވެރިންގެ މުސާރަ ބޮޑު ކޮށްގެން ނުވާނެ ކަމަށާއި އެކަން ވިޔަ ނުދޭނެ ކަމުގައި އެމްޑީޕީގެ މެޖޯރިޓީ އޮންނަ މަޖިލިހުން އެކަން ވިޔަކަ ނުދެއްވާނެ ކަމަށް ޑިމޮކްރެޓްސްގެ ޕާލަމެންޓްރީ ގްރޫޕްގެ ލީޑަރު އަލީ އާޒިމް މިއަދު ވިދާޅުވެއްޖެއެވެ.

އާޒިމް މިހެން ވިދާޅުވީ، ރައްޔިތުންގެ މަޖިލީހުގެ ކޮންމެ މެމްބަރަކަށް ކޮންމެ މަހަކު މުސާރައިގެ ގޮތުގައި އެއްލައްކަ ރުފިޔާ ލިބޭ ގޮތަށް، ސަރުކާރުގެ އިސްވެރިންގެ މުސާރަތައް ބޮޑު ކުރުމަށް މާލިއްޔަތު ކޮމިޓީން ފާސް ކުރުމާއި ގުޅިގެންނެވެ.

އާޒިމްގެ ޓުވީޓުގައި އޭނާ ވިދާޅުވެފައިވަނީ ގައުމު މިދަނީ ބަނގުރޫޓު ވުމާ ދިމާލާށް ކަމަށެވެ.

މިފަދަ ދަނޑިވަޅެއްގައި ތިޔަކަންކަން ކޮށްގެން ނުވާނެ.

ތިކަމެއް ނުކުރެވޭނެ. ވިޔަކަ ނުދޭނަން.

ގައުމު މިދަނީ ބަނގުރޫޓު ވުމާ ދިމާލާށް! https://t.co/ucbJrrYdcW

— 𝐀𝐥𝐢 𝐀𝐳𝐢𝐦 (@aliaazim) December 19, 2023

ރައްޔިތުންގެ މަޖިލީހުގެ ކޮންމެ މެމްބަރަކަށް ކޮންމެ މަހަކު މުސާރައިގެ ގޮތުގައި އެއްލައްކަ ރުފިޔާ ލިބޭ ގޮތަށް، ރައީސުލްޖުމްހޫރިއްޔާއި ނާއިބު ރައީސް ހިމެނޭހެން، ސަރުކާރުގެ އިސްވެރިންގެ މުސާރަތައް ބޮޑު ކުރުމަށް ފާސްކޮށްފައިވަނީ އިއްޔެ ބޭއްވުނު މާލިއްޔަތު ކޮމިޓީން ބައްދަލުވުމުގައެވެ.

މިހާރުގެ މުސާރަތައް ހަމަޖެހިފައިވާ ގޮތުން، މަޖިލިސް މެމްބަރަކަށް މުސާރައިގެ ގޮތުގައި 62،500 ރުފިޔާއާއެކު، ކޮމިޓީ އެލަވެންސްއާއި ހިމެނުމުން މަހަކު 82،500 ރުފިޔާ ލިބިވަޑައިގަންނަވެއެވެ.

މިއަދު ކޮމިޓީން ފާސްކޮށްފައިވަނީ މަޖިލިސް މެމްބަރުންނަށް މަހަކު 80،000 ރުފިޔާ ބޮޑު ކުރުމަށެވެ. އެގޮތުން މި މުސާރައަށް ބަލާއިރު، ކޮމިޓީން ފާސްކުރި ގޮތަށް ބަލާއިރު، ކޮމިޓީ އެލަވެންސް އެއްކޮށްލުމުން މަޖިލިސް މެމްބަރުންނަށް ލިބޭ މުސާރަ މަހަކު 100،000 ރުފިޔާއަށް އަރައެވެ. ކޮމިޓީ އެލަވެންސްގެ ގޮތުގައި މެމްބަރުންނަށް މަހަކު 20،000 ރުފިޔާ ލިބެއެވެ.

ބައެއް މެމްބަރުން ޚަބަރު އޮންލައިންއަށް މައުލޫމާތު ދީފައިވާ ގޮތުގައި ރައީސް، ނައިބު ރައީސް، މިނިސްޓަރުން އަދި މިނިވަން މުއައްސަސާތަކުގެ މުސާރައަށް މިއަދު ކޮމިޓީން ގެނައި ބަދަލާއެކު، ކޮންމެ މަގާމަކަށްވެސް މުސާރައަށް ގާތްގަނޑަކަށް 25 ނުވަތަ 30 އިންސައްތަ ބޮޑުވެގެންދާނެއެވެ.

• ކޮމިޓިން ބެނައި ބައެއް ބަދަލުތަކުގެ ތަފްސީލު:
• މަޖިލީހުގެ ރައީސްއަށް 90،000 ރުފިޔާއަށް ބޮޑު ކުރުމަށް
• މަޖިލީހުގެ ނައިބު ރައީސްއަށް 88،000 ރުފިޔާއަށް ބޮޑު ކުރުމަށް
• އުއްތަމަ ފަނޑިޔާރަށް 91،000 ރުފިޔާއަށް ބޮޑު ކުރުމަށް
• އެމްއެމްއޭގެ ގަވަރުނަރަށް 74،000 ރުފިޔާއަށް ބޮޑު ކުރުމަށް
• އޮޑިޓާ ޖެނެރަލް އާއި ޕްރޮސެކިއުޓަ ޖެނެރަލަށް 74،000 ރުފިޔާއަށް ބޮޑު ކުރުމަށް

މިނިވަން މުވައްސަސާތަކުގެ މެންބަރުންނާއި އިދާރާތަކުގެ ޑިރެކްޓަރުންނާއި ބޯޑު މެންބަރުންނާއި ސިޓީ އަދި ރަށު ކައުންސިލަރުންގެ މުސާރަ ބޮޑުކުރުމަށް ފާސްކުރި ގޮތް:

• ސިޓީ ކައުންސިލްތަކުގެ މޭޔަރުންގެ މުސާރަ 46،000 އަށް ރުފިޔާއަށް ބޮޑު ކުރުމަށް
• ޑެޕިއުޓީ މޭޔަރުންގެ މުސާރަ 40،500 އަށް ބޮޑު ކުރުމަށް
• ސިޓީ ކައުންސިލް މެމްބަރުންގެ މުސާރަ 35،000 އަށް ބޮޑު ކުރުމަށް
• އަތޮޅު ކައުންސިލްގެ ރައީސުންނަށް 33،000 އަށް ބޮޑު ކުރުމަށް
• ރަށު ކައުންސިލްގެ ރައީސުންގެ މުސާރަ 25،500 އަށް ބޮޑު ކުރުމަށް
• ރަށު ކައުންސިލްގެ ނައިބުންގެ މުސާރަ 20،000 އަށް ބޮޑު ކުރުމަށް
• ރަށު ކައުންސިލަރުންގެ މުސާރަ 18،000 ރުފިޔާއަށް ބޮޑު ކުރުމަށް