އިސްރާއީލްގެ ރައްޔިތުން ރާއްޖެ ދަތުރު ނުކުރުމަށާއި ރާއްޖޭގައި ތިބި އިސްރާއީލްގެ ރައްޔިތުން ރާއްޖެ އިން ފޭބުމަށް އިސްރާއީލްގެ ފޮރިން މިނިސްޓްރީން މިއަދު އެދިއްޖެއެވެ.
އިސްރާއީލްގެ ފޮރިން މިނިސްޓްރީން ނެރުނު ބަޔާނެއްގައި ބުނީ ރާއްޖޭގައި އިސްރާއީލްއާ ދެކޮޅު ހިޔާލުތަކާއި ހަރަކާތްތައް އިތުރުވެފައިވާ ކަމަށެވެ. އަދި ސަރުކާރުގެ އޮފިޝަލުން ވެސް އިސްރާއީލާ ދެކޮޅަށް ހިޔާލު ފާޅުކުރަމުން އަންނަ ކަން އެ ބަޔާނުގައި ވަނީ ފާހަގަކޮށްފައެވެ.
އެހެންވެ، މިވަގުތު އިސްރާއީލަށް ދަތުރު ނުކުރުމަށާއި ރާއްޖޭގައި ތިބި އިސްރާއީލްގެ ރައްޔިތުން ވެސް ރާއްޖެ ދޫކޮށް ދިއުމަށް އެ ބަޔާނުގައި ވަނީ އަންގައިފައެވެ. ރާއްޖޭގައި ތިބި އިސްރާއީލްގެ ރައްޔިތުންނަށް އެހީތެރިކަން ފޯރުކޮށްދޭން އިސްރާއީލްގެ ސަރުކާރަށް އުނދަގޫ ވާނެ ކަމަށް ވެސް ބުނެފައިވެއެވެ.
އިސްރާއީލާއި ރާއްޖެއާ ދެމެދުގައި ޑިޕްލޮމެޓިކް ގުޅުން ގާއިމުކޮށްފައެއް ނުވެއެވެ. ނަމަވެސް އިސްރާއީލްގެ ރައްޔިތުން ރާއްޖެ އަށް ޒިޔާރަތް ކުރުމަކަށް ހުރަހެއް ނޯވެއެވެ. އެހެންވެ، އިސްރާއީލްގެ ޕާސްޕޯޓު ރާއްޖެ އިން މަނާ ކުރުމަށާއި އިސްރާއީލްގެ ރައްޔިތުން ރާއްޖެ އަށް އެތެރެ ނުވެވޭ ގޮތް ހަދަން ގޮވާލައި ސިލްސިލާ މުޒާހަރާތަކެއް ކުރަމުން އަންނަތާ މިހާރު ދުވަސްކޮޅެއްވެއްޖެއެވެ.
އިސްރާއީލްގެ އުދުވާންތަކާ ގުޅިގެން ރާއްޖޭގެ އެކިކަންކޮޅުތަކުގައި މީގެކުރިން ވަނީ އެކިއެކި ހަރަކާތްތައް ހިންގައިފައެވެ. އަދި ފަލަސްތީނުގެ ރައްޔިތުންނަށް އެހީވުމަށްޓަކައި ދިވެހިން ގުޅިގެން ހިންގި ހަރަކާތުގައި ވެސް 15 މިލިއަނަށް ވުރެ ގިނަ ރުފިޔާ ވަނީ އެއްކޮށްފައެވެ. ދިވެހިން ފަލަސްތީނަށް ދިން އެހީ ފޯރުކޮށްދިނުމުގެ މަސައްކަތް މިހާރު ދަނީ ކުރަމުންނެވެ.
ދިވެހި ސަރުކާރުން އަބަދުވެސް އަންނަނީ ފަލަސްތީނުގެ މީހުންގެ ދިފާއުގައި އަޑު އުފުލައި، ބައިނަލްއަގްވާމީ މައިދާނުގައި ވެސް އެ މީހުންގެ ހައްގުތައް ހޯދައިދޭން ގޮވާލަމުންނެވެ. އަދި އިސްރާއީލު ރައްޔިތުން އެތެރެވުން މަނާ ކުރާ ގޮވާލެއް ވެސް ދާދި ފަހުން ވަނީ ފާސްކޮށްފައެވެ.
އިސްރާއީލާއި ފަލަސްތީނުގެ ހަމާސް ޖަމާއަތާ ދެމެދު ހަނގުރާމަ ފެށުނީ މިދިޔަ އޮކްޓޯބަރު 7 ގައެވެ. އިސްރާއީލްގެ ހަމަލާތަކުގައި މިހާތަނަށް އައިއިރު ފަލަސްތީނުގެ 19،000 އަށް ވުރެ ގިނަ ރައްޔިތުން ޝަހީދުވި އިރު، ހަމާސްގެ ހަމަލާތަކުގައި 1،200 ވުރެ ގިނަ މީހުން ވަނީ މަރާލައިފައެވެ. އޭގެ ތެރޭގައި 400 އަށް ވުރެ ގިނަ އިސްރާއީލް ސިފައިން ހިމެނެއެވެ.
