ކުރިޔަށް އޮތް ރައްޔިތުންގެ މަޖިލިހުގެ އިންތިޚާބުގައި ރައީސް ޔާމީން ތާއީދުކުރައްވާ އަދި އެންޑޯޒްކުރައްވާ ކެންޑިޑޭޓުން އެމަނިކުފާނުގެ ފޮޓޯފުޅު ބޭނުންކުރެެއްވުމުގެ ފުރުސަތު އޮންނާނެ ކަމުގައި، ޔާމިންގެ އާ ސިޔާސީ ޕާޓީ އުފެއްދުމުގައި އިސްކޮށް އުޅުއްވާ ކުރީގެ މިނިސްޓަރު މަލީހު ޖަމާލް ވިދާޅުވެއްޖެއެވެ.
މަލީހު ކުރެއްވި ޓުވީޓެއްގައި ވިދާޅުވީ އޭގެ އިތުރުން، ފާއިތުވި ތާގައި ރައީސް ޔާމިން ގެންގުޅުއްވާފައިވާ ޝިޢާރުތައްވެސް މިބީދައިން ބޭނުން ކުރެވޭނެ ކަމަށާއި، ރައީސް ޔާމިން އެންޑޯސް ކުރައްވާ ކެނޑިޑޭޓުން އިންތިޚާބު ކޮށްދިނުމަށް ސަޕޯޓަރުންގެ ކިބައިން އެދޭ ކަމުގައެވެ. މަލީހު އިތުރަށް ވިދާޅުވެފައިވަނީ ރައީސް ޔާމިން އަބަދުވެސް ދެމި ހުންނަވާނީ ދިވެހި ލޮބުވެތި ރައްޔިތުންނާއި އެކުގައި ކަމުގައެވެ.
ރައީސް ޔާމިން ވަނީ ދާދިފަހުން ޕީޕީއެމް ދޫކޮށް އެމަނިކުފާނު އަލަށް އުފައްދަވާ ޕީއެންއެފްއަށް ސޮއި ކުރައްވާފައެވެ.
ޕީޕަލްސް ނޭޝަނަލް ފްރޮންޓު (ޕީއެންއެފް)އިން ދާދިފަހުން ބުނެފައިވަނީ، ރަޖިސްޓްރީ ކުރުމަށް ބޭނުންވާ 3000 ސޮއި އެޕާޓީން ހަމަ ކޮށްފައިވާ ކަމުގައެވެ. އެހެންނަމަވެސް ޕާޓީ ރަޖިސްޓްރީ ކުރުމަށް ހުށަހަޅާނީ އެކަމަށް އެންމެ އެކަށިގެންވާ ވަގުތުގައިކަމަށްވެސް އެޕާޓީގެ ފަރާތުން ހާމަކޮށްފައި ވެއެވެ.
ޕީއެންއެފް ރަޖިސްޓްރީ ކުރުމުގެ ހުއްދަ ދޫކޮށްފައިވަނީ ފާއިތުވި ނޮވެމްބަރުމަހުގެ 19 ވަނަ ދުވަހުއެވެ.
ޕާޓީ އުފެއްދުމުގެ ހުއްދައާއި ހަވާލުވީ އެޕާޓީ އުފެއްދުމުގައި އިސްކޮށް ހަރަކާތްތެރިވަމުންދާ ޓީމުގެ މެމްބަންނެވެ. އޭގެ ތެރޭގައި ކުރީގެ ނާއިބު ރައީސް ޑރ. ޖަމީލްއާއި، ކުރީގެ މިނިސްޓަރ މަލީހުއާއި ކުރީގެ ކޮމިޝަނަރ އޮފް ޕޮލިސް ހުސެއިން ވަހީދުގެ އިތުރުން ޕީޕީއެމްގައި ކުރިން އިސްކޮށް ހަރަކާތްތެރިވި ބައެއް ފަރާތްތައްވެސް ހިމެނެއެވެ. ރައީސް ޔާމިން ގާނޫނީ ބަންދެއްގައި ހުންނެވުމާއި ގުޅިގެން ޕާޓީ އުފެއްދުމުގެ ހުއްދަ ދޫކޮށްފައިވަނީ ރައީސް ޔާމިންގެ ދަރިކަލުނ ޒެއިންގެ ނަމުގައެވެ.
