ކުރީގެ ރައީސް ޔާމިންގެ ސަރުކާރުން ކުރިޔަށް ގެންދިޔަ އައި ހެވަން މަޝްރޫޢު މިސަރުކާރުން އަލުން ފެށުމަށް ނިންމާފައިވާކަން އިޤުތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުހައްމަދު ސައީދު ވިދާޅުވެއްޖެއެވެ.
ކުރީގެ ރައީސް ޔާމިންގެ ސަރުކާރުން ކުރިޔަށް ގެންދަން ރޭވި އައިހެވަން މަޝްރޫއަކީ އިހަވަންދިއްޕޮޅުގައި ޒަމާނީ ބަނދަރަކާ އެއާޕޯޓަކާއި، މުދާ އުފެއްދުމާއި ބަންދުކުރުމާއި ޕްރޮސެސްކުރުމާއި ގުދަންކުރުމުގެ އިތުރަށް، ބައިނަލްއަގުވާމީ ކްރޫޒް ފެސިލިޓީ އާއި ރިއަލް އެސްޓޭޓްގެ ފެސިލިޓީތައް ވެސް ހިމެނޭ ގޮތަށް ފަރުމާކުރި މަޝްރޫއެކެވެ.
އެހެންނަމަވެސް ރައީސް ޔާމިންގެ ސަރުކާރު ނިމިގެންދިޔައިރު އެ މަޝްރޫއަށް އަމަލީސިފަ ގެނެވިަފއެއް ނުވެއެވެ.
މިއަދު ރައްޔިތުންގެ މަޖިލިހުގެ ތަޅުމުގައި، ރައީސް ޔާމިންގެ ސަރުކާރުން ކުރިޔަށް ގެންދަން ރޭވި އައިހެވަން މަޝްރޫއު ކުރިޔަށްގެންދާނެތޯ ވިލުފުށި ދާއިރާގެ މެމްބަރި ހަސަަން އަފީފު ކުރެއްވި ސުވާލުގެ ޖަވާބުގައި އިކޮނޮމިކް މިނިސްޓަރ ސައީދު ވިދާޅުވީ އެ މަޝްރޫޢު ކުރިޔަށް ގެންދިއުމަކީ މި ސަރުކާރުގެ ވިސްނުމެއް ކަމުގައެވެ
ބަންކަރިންގެ ހިދުމަތަކީ ދޭންޖެހޭ ހިދުމަތެއް. އެ ސަރަހައްދުން ދަތުރުކުރާ ބޯޓު ފަހަރަށް ދޭން ޖެހޭ ހުރިހާ ހިދުމަތެއް ދިނުމަށް އަޅުގަނޑުމެންގެ ސަރުކާރުން މި ތިބީ ތައްޔާރަށް. އަދި ރާއްޖޭގެ އެހެން ދިމާލަކުން ވެސް ބައިނަލްއަގްވާމީ ބޯޓު ފަހަރަށް ދޭންޖެހޭ ހިދުމަތަކުން ރާއްޖޭގެ އިގްތިސޯދަށް ފައިދާވާކަމެއް ވަންޏާ އެކަން ކުރާނަން. އިހަވަންދިއްޕުޅުގެ މަސައްކަތް އިރާދަކުރެއްވިއްޔާ ފައްޓާނަން.
މެމްބަރުންގެ ސުވާލުތަކަށް ޖަވާބު ދެއްވަމުން މިނިސްޓަރ ސައީދު ވިދާޅުވިއެވެ.
މިއަދުގެ ޖަލްސާގައި ސައީދު ވިދާޅުވީ އެ ޕްރޮޖެކްޓަށް އަމަލީސިފަ ގެނެވުމުން އެތައްހާސް ވަޒީފާއެއް އުފެދިގެން ދާނެކަމުގައެވެ.
