ރާއްޖެއިން އދ. އަށް ކަނޑައަޅާ ދާއިމީ މަންދޫބަކަށް ފޮރިން މިނިސްޓްރީގެ އެބަސަޑާ އެޓް ލާޖްގެ މަގާމުގައި ހުންނެވި ޑރ. އަލީ ނަސީރު ހަމަޖެއްސެވުމަށް ނިންމަވައި އޭނާ އަށް ރުހުން ދިނުމަށް ރައީސް މުހައްމަދު މުއިއްޒު ރައްޔިތުންގެ މަޖިލީހަށް މިއަދު ފޮނުއްވައިފިއެވެ.
އަލީ ނަސީރަށް ރުހުން ހޯދަން ރައީސް މުއިއްޒު މަޖިލިހަށް ފޮނުއްވި ސިޓީ މިއަދުގެ ޖަލްސާގައި ވަނީ އިއްވައިފައެވެ. އޭނާ އަށް ރުހުން ދިނުމުގެ މައްސަލަ މަޖިލިހުގެ ހާރިޖީ ގުޅުންތަކާ ބެހޭ ކޮމިޓީ އަށް މިހާރު ވަނީ ފޮނުވައިފައެވެ. އަލީ ނަސީރަށް ރުހުން ދިނުމާ މެދު ގޮތެއް ނިންމާނީ، ކޮމިޓީގެ މަސައްކަތް ނިންމައި ތަޅުމަށް ފޮނުވުމުންނެވެ.
ސްޓޭޓް މިނިސްޓަރުގެ ފެންވަރުގައި ފޮރިން މިނިސްޓްރީގެ އެމްބަސަޑާ އެޓް ލާޖުގެ މަގާމަށް އަލީ ނަސީރު އައްޔަން ކުރައްވާފައި ވަނީ، މިދިޔަ މަހުގެ 17 ގައެވެ.
ރާއްޖޭގެ ހާރިޖީ ދާއިރާ އާ 1985 ވަނަ އަހަރު ގުޅިވަޑައިގެންނެވި އަލީ ނަސީރު ވަނީ ފޮރިން މިނިސްޓްރީގައި އެކިއެކި މަގާމުތައް ފުރުއްވައިފައެވެ. އޮސްޓްރޭލިއާގެ ނެޝަނަލް ޔުނިވަސިޓީން ޕީއެޗްޑީ އަދި އިނގިރޭސި ވިލާތުގެ ލެސްޓާ ޔުނިވާސީޓީން މާސްޓާސް ހާސިލް ކުރެއްވެވި އަލީ ނަސީރު ވަނީ ކުރީގެ ރައީސް އަބްދުﷲ ޔާމީންގެ ވެރިކަމުގައި ވެސް އދ.ގެ ސަފީރުކަމުގެ މަގާމު ފުރުއްވައިފައެވެ.
ކުރީގެ ރައީސް އިބްރާހިމް މުހައްމަދު ސޯލިހްގެ ސަރުކާރުގައި ފޮރިން މިނިސްޓްރީގެ މަލްޓިލެޓްރަލް ސެކެޓްރީގެ މަގާމު ވެސް އޭނާ އަދާކުރެއްވިއެވެ.
