އައްޑޫގެ ގުޅިފައިވާ ރަށްތަކުން ފެން ސަޕްލައި ކުރުމުގައި ކުރިމަތިވި މައްސަލަ ހައްލުކޮށް ފެން ދޫކުރަން ފަށައިފިއެވެ.
އައްޑޫގެ ގުޅިފައިވާ ރަށްތަކަށް ފެންދޫކުރަން ފަށާފައި މިވަނީ ފެންކެނޑުނުތާ 3 ދުވަސް ފަހުންނެވެ. އައްޑޫގެ ގެތަކަށް އަލުން ފެން ދޫކުރަން ފަށާފައިވަނީ ރޭގެ ވަގުތެއްގައެވެ. އަދި މިހާރު ފެން ލިބެމުންދާކަމަށް "ޚަބަރު އޮންލައިން"އާ ވާހަކަ ދެއްކި ބައެއް ގެތަކުން ބުނެފައި ވެއެވެ.
ފެނަކައިން ރޭ ނެރުނު ނޫސް ބަޔާނެއްގައި ބުނެފައިވަނީ އައްޑޫ ސިޓީއަށް މިދިމާވި ފެނުގެ މައްސަލައަކީ ތާވަލުކުރެވިގެން ކުރާންޖެހޭ މާރާމާތު ކުރުމަށް އިސްކަން ދެވިފައި ނުވާތީއާއި، ޔޫޓިލިޓީ ރެގިއުލޭޓަރީ އޮތޯރިޓީން ނިޒާމު އިންސްޕެކްޓްކޮށް، ހައްލުކުރަންޖެހޭ ކަންކަން ހައްލު ކުރުމަށް އަންގަވާ ފޮނުވާފައިވާ ރިޕޯޓަށް، އެ އޮތޯރިޓީން ދީފައިވާ ޓައިމްލައިންއާ އެއްގޮތަށް އަމަލު ކުރެވިފައި ނުވުމުގެ ސަބަބުން ދިމާވި މައްސަލަތަކެއްކަން މިހާތަނަށް ބެލި ބެލުމުން އެނގިފައިވާ ކަމުގައެވެ.
އޭގެ އިތުރުން ފެނުގެ މައްސަލަ ކުރިމަތިވިތ ކުޑައިރުކޮޅެއްގެ ތެރޭ ފެނުގެ ޚިދުމަތް މެދުކެނޑިފައިވަނީ އެކަށީގެންވާ ފެނުގެ ސްޓޯރޭޖެއް ގާއިމް ކުރެވިފައި ނުވާތީކަމަށްވެސް ބުނެފައި ވެއެވެ. އެހެންކަމުން ކުރިޔަށް އޮތްތަނުގައި މިފަދަ މައްސަލައެއް ދިމާނުވާނެކަން ޔަގީން ކުރުމުގެ ގޮތުން، އައްޑޫ ސިޓީގެ ފެނުގެ ސްޓޯރޭޖް އިތުރުކުރުމަށް ކަމާއި ގުޅުންހުރި ވުޒާރާތަކާއި ގުޅިގެން މަސައްކަތް ކުރާނެކަމަށްވެސް އެކުންފުނިން ބުނެފައި ވެއެވެ.
ފެނަކައިންވަނީ ފެނުގެ މައްސަލަ ހައްލުކުރުމަށް އެހީތެރިކަން ފޯރުކޮށްދިން، އެމްޑަބްލިއުއެސްސީއަށާއި، މޯލްޑިވިއަންއަށް ޝުކުރު އަދާކޮށްފައެވެ.
އައްޑޫ ސިޓީގެ ގުޅިފައިވާ ރަށްތަކަށް ފެނުގެ ޚިދުމަތް ފޯރުކޮށްދިނުމަށް ފެނަކައިން ހިންގާ ފެން ޕްލާންޓަށް ޓެކްނިކަލް މައްސަލައެއް ދިމާވެ، ފެނުގެ ޚިދުމަތް ގިނަ ވަގުތުތަކަށް މެދުކެނޑުނު މައްސަލާގައި އެކަމުގެ ތަކުލީފު އުފުލަންޖެހުނު ހުރިހާ ރައްޔިތުންގެ އަރިހުން ނިހާޔަތަށް މާފަށް އެދޭކަމަށްވެސް ފެނަކައިގެ ނޫސްބަޔާނުގައި ބުނެފައި ވެއެވެ.
