ރާއްޖެއަށް އިންޑިއާއިން އެންމެ ގިނައިން އެތެރެކުރާ އެއް ބާވަތްކަމަށްވާ ފިޔާ އެގައުމުން އެކްސްޕޯޓު ކުރުން މަނާ ކޮށްފިއެވެ.
އިންޑިއާގެ ލޯކަލް ނޫސްތަކުން ރިޕޯޓު ކޮށްފައިވާ ގޮތުގައި އިންޑިއާއިން ފިޔާ އެކްސްޕޯޓު ކުރުން މަނާކުރުމަށް އަޅާފައިވާ ފިޔަވަޅުތަކުގެ މުއްދަތު މާރޗް 31، 2024 އާ ހަމައަށް އިތުރުކޮށްފައިވާކަމަށެވެ.
ފިޔާ ބޭރުކުރުން މަނާކުރުމަށް އެގައުމުގެ ސަރުކާރުން މަސައްކަތް ކުރަމުން ދަނީ އެޤައުމުގައި އެކަށީގެންވާ މިންވަރަށް ފިޔާގެ ސަޕްލައި އިތުރު ކުރުމަށާއި އަގުތައް އެކަށީގެންވާ މިންގަޑެއްގައި ހިފެހެއްޓުމަށް ކަމުގައެވެ.
ތަކެތީގެ އަގުތަށް އިންޑިއާގައި އުފުލިގެން ދިއުމަކީ މީގެ ކުރިން އިންޑިއާގެ ސަރަހައްދީ ސަރުކާރުތައް ވައްޓާލުމާ ގުޅިފައިވާ ކަމެއްކަމަށްވެސް އެގައުމުގެ ނޫސްތަކުގައި ރިޕޯޓު ކޮށްފައި ވެއެވެ.
ފާއިތިވެދިޔަ ތަނުގައި އިންޑިއާގެ ސަރުކާރުން ވަނީ މިއަހަރުގެ އޮކްޓޯބަރު މަހުގެ 28 ވަނަ ދުވަހުން ފެށިގެން މިއަހަރުގެ ޑިސެމްބަރު މަހުގެ 31 ވަނަ ދުވަހުގެ ނިޔަލަށް ފިޔާ އެކްސްޕޯޓުކުރުމަށް ޓަނަކަށް 800 ޑޮލަރުގެ މިނިމަމް އެކްސްޕޯޓް ޕްރައިސްއެއް (އެމްއީޕީ) ތައާރަފްކޮށްފައެވެ. މި ފިޔަވަޅަކީ އެތެރޭގެ ބާޒާރުގައި ފިޔާ ލިބެން ހުރި މިންވަރު އިތުރުކޮށް، ފިޔާގެ އަގު ތައް ކޮންޓްރޯލް ކުރުމުގެ ބޭނުމުގައި އެޅި ފިޔަވަޅެކެވެ.
ހަވާލާދީ ރޮއިޓާސް އިން ރިޕޯޓްކޮށްފައިވާ ގޮތުގައި ފިޔާ އެކްސްޕޯޓު ކުރުމުގައި ސަރުކާރުން އަޅާފައިވާ ހަމަ ފިޔަވަޅު މިއަދު ވަނީ އިތުރުކޮށްފަ އެވެ.
އިންޑިއާ ސަރުކާރުގެ ތަފާސް ހިސާބުތައް ދައްކާ ގޮތުން މިދިޔަ ނޮވެމްބަރު މަހުގެ 29 ވަނަ ދުވަހު މުޅި އިންޑިއާގައި ރީޓެއިލް ކޮށް ފިޔާ ކިލޯއެއްގެ އަގު ވަނީ 94.39 ޕަސެންޓް އިތުރުވެ، ކިލޯއަކަށް 57.85 ރުޕީސް ޖެހިފައެވެ.
މިދިޔަ އޮގަސްޓް މަހު އިންޑިއާ ސަރުކާރުން ވަނީ ފިޔާއިން 40 ޕަސެންޓްގެ އެކްސްޕޯޓް ޑިއުޓީއެއް ނަގައިފަ އެވެ. ނަމަވެސް އެކަމުގެ ސަބަބުން ފިޔާ އެކްސްޕޯޓް މާ ބޮޑުތަނުން ކުޑަކުރެވިފައެއް ނުވެއެވެ. އެކްސްޕޯޓް އަންޑަ އިންވޮއިސް ކުރުމުގެ ސަބަބުން ޑިއުޓީ ދަށްވެ، ސަރުކާރުން ފަހުން ވަނީ އެ ޑިއުޓީ އުވާލައި ފިޔާގެ އެކްސްޕޯޓު އަގަކީ މެޓްރިކް ޓަނަކަށް 800 ޑޮލަރު ކަމަށް ކަނޑައަޅައިފަ އެވެ.
