ސަރުކާރުގެ މަޢުލޫމާތު ނުލިބިގެން، ރައިޓު ޓު އިންފޮމޭޝަން، އާރުޓީއައި ހުށައަޅަން ޖެހޭ ހިސާބަށް މިސަރުކާރުން ނުދާނެކަމަށް ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
ދައުލަތުގެ އެއްވެސް މުއައްސްަސާއަކުން ނުވަތަ އިދާރާއަކުން މަޢުލޫމާތެއް ހަމަނުކޮށްފިނަމަ، މަޢުލޫމާތު ހޯދައި ލިބިގަތުމުގެ ޤާނޫނުގެ ދަށުން، އާރުއައިޓީ ފޯމު ހުށައަޅައިގެން އެ މަޢުލޫމާތެއް ފޯރުކޮށްދޭން އެ ޤާނޫނުން ލާޒިމްކުރެއެވެ. ނިމިދިޔަ ސަރުކާރުގައި ދައުލަތުގެ ގިނަ މުއައްސަސާތަކުންނާއި، ވުޒާރާތަކުން ގިނަ މަޢުލޫމާތުތަކެއް ނޫސްވެރިން ހޯދަމުން ދިޔައީ އާރުޓީއައި ފޯމު ހުށައަޅައިގެންނެވެ. އަދި ބައެއް މަޢުލޫމާތު އެގޮތަށްވެސް ހާމަނުކުރުމަށް ދައުލަތުން ކޯޓަށްވެސް މައްސަލަ ހުށައަޅާފައިވެއެވެ.
ނަމަވެސް ޑރ. މުޢިއްޒުގެ ސަރުކާރުން އައީ ދެފުށްފެންނަ ހާމަކަން ބޮޑު ވެރިކަމެއް ކުރައްވާނެކަމުގެ ވަޢުދާއެކުއެވެ. ދައުލަތުގެ ހުރިހާ ވުޒާރާތަކާ އިދާރާތަކުން ނޫސްވެރިންނަށް އެ މަޢުލޫމާތު ދޭނެކަމަށް ހާމަކޮށްފައިވެއެވެ.
އިއްޔެ ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި ރައީސް ޑރ. މުޙައްމަދު މުޢިއްޒު ވިދާޅުވީ، ސަރުކާރުން މަސައްކަތް ކުރާނީ ދެފުށް ފެންނަ ގޮތަށް ކަމަށާއި އެއްވެސް ކަމެއް ނުފޮރުވާނެކަމަށެވެ. އަދި ޖަވާބުދާރީ ނުވެވޭނެ އެއްވެސް ކަމެއް ނޯންނާނެކަމަށްވެސް ރައީސް ވިދާޅުވިއެވެ.
ތިބޭފުޅުން [އެއީ ނުސްވެރިން] އެކަހަލަ ހާލަތެއް ދިމާވެއްޖެއްޔާ އަޅުގަނޑަށްވެސް އިޝާރާތެއް ކޮށްލަންވީ. ހަމަ ޔަގީން އެ މަޢުލޫމާތު ނުލިބޭނެ ހާލަތެއް ދިމައެއް ނުވާނެ. އާރްޓީއައި ލާންޖެހޭ ހިސާބަށް ނުދާނެ. އަޅުގަނޑަށް ހިއެއްނުވޭ ލާންޖެހޭނެ ހެނެއްވެސް.
– ރައީސް ވިދާޅުވިއެވެ.
ރައީސް ވިދާޅުވީ ހުރިހާ ވުޒާރާއެއްގައިވެސް މީޑިއާ ޔުނިޓް އުފައްދާނެކަމަށެވެ. އެގޮތުން މިހާރު ބައެއް ވުޒާރާތަކުގައި އެ ޔުނިޓް އުފައްދާފައިވާކަން ރައީސް ފާހަގަކުރެއްވިއެވެ. އެތަންތަނުން މަޢުލޫމާތުތައް ހާމަކުރަމުން ގެންދާނެކަމަށް ރައީސް ވިދާޅުވިއެވެ.
ރައީސް ދާދިފަހުން ވަނީ އެމަނިކުފާނު ކުރައްވާ ރަސްމީ ދަތުރުފުޅުތަކުގެ މަޢުލޫމާތުތައް 15 ދުވަސްތެރޭގައި ހާމަކުރައްވާނެކަމަށްވެސް ވިދާޅުވެފައެވެ.
