އިންޑިއާ ސިފައިން އަނބުރާ ގެންދިޔުމަށް، ޓެކްނިކަލް ލެވަލްގައި މަސައްކަތް އެބަ ކުރިއަށްދޭ، މިހާރު އެއްބަސްވެފައިމިވަނީ ހައި ލެވަލްގެ ކޮމެޓީއެއް އެކުލަވާލަން، މަޝްރޫޢުތައް ކުރިއަށްގެންދިިޔުމަށް ހުރި މައްސަލަތައް ހައްލުކުރުމަށް.

– ރައީސް ވިދާޅުވިއެވެ.

ރައީސް ވިދާޅުވީ އިންޑިއާ ސިފައިން އަނބުރާ ފޮނުވާލުމާއި ގުޅޭގޮތުން މިހާތަނަށް 5 ވަރަކަށް ބައްދަލުވުން އިންޑިއާގެ އިސްވެރިންނާއި އެކު ބާއްވާފައިވާ މަޝްވަރާކުރައްވާފައިވާކަމަށެވެ.

ރައީސްގެ އެވާހަކަފުޅާއި ގުޅިގެން އެޤައުމުންވެސް ވަނީ އެކަމުގެ މަޝްވަރާޔައް ކުރިއަށްދާކަމަށް ރަސްމީކޮށް ބުނެފައެވެ. އަދި ރާއްޖޭޣައި އޮތް މަތިންދާބޯޓާއި ހެލިކޮޕްޓަރުގެ މުހިންމުކަން ދެޤައުމަށްވެސް ޤަބޫލުކުރެވޭކަމަށް އެޤައުމުން ބުނެފައިވެއެވެ.

އިންޑިއާގެ ބައެއް މީޑިއާތަކުން އެޤައުމުގެ ސަރުކާރުގެ އިސް އޮފިޝަލުންނާ ހަވާލާދީ ބުނީ، އިންޑިއާއިން ބަލަނީ ރާއްޖޭގަިއ އޮޕަރޭޓުކުރާ އުޅަނދުތަކާއި ސިފައިން އަނބުރާ ނުގެންގޮސް ވޭތޯކަމަށެވެ.

ރާއްޖޭގައި ތިބި އިންޑިއާ ސިފައިން އަނބުރާ ފޮނުވާލުމަކީ ސަރުކާރުން ހާއްސަ އިސްކަމެއް ދީގެން ކުރަމުންދާ މަސައްކަތެކެވެ. އެގޮތުން މިހާތަނަށް ބެލި ބެލުމުން ރާއްޖޭގައި އިންޑިއާގެ 77 ސިފައިން ޤާއިމުވެފައި ތިބިކަން ދެނެގަނެވިފައިވާކަމަށް ސަރުކާރުން މީގެކުރިންވަނީ ހާމަކޮށްފައެވެ. އެއީ އިންޑިއާއިން ހަދިޔާކުރި 1 ހެލިކޮޕްޓަރު ދުއްވުމުގެ މަސައްކަތުގައި 24 ސިފައިން، 2 ވަނަ ހެލިކޮޕްޓަރު ދުއްވުމުގެ މަސައްކަތުގައި 26 ސިފައިން އަދި ޑޯނިއާ މަތިންދާބޯޓު ދުއްވުމުގައި 25 އިންޑިއާ ސިފައިން ހަރަކާތްތެރިވާކަމަށާއި މެއިންޓަނަންސްއާއި އިންޖިއަރިންގެ މަސައްކަތުގައި 2 ސިފައިން މަސައްކަތް ކުރާކަމަށް ސަރުކާރުން ވިދާޅުވެއެވެ.

ދެ ހެލިކޮޕްޓަރު ރާއްޖެ ގެނައީ، 2011 އަދި 2016 ވަނަ އަހަރު ކަމަށް، މިދިޔަ ސަރުކާރުން ވަނީ ވިދާޅުވެފައެވެ. ސަރުކާރުން އޭރު ބުނަމުން ދިޔައީ، އިންޑިއާ ސިފައިން ރާއްޖޭގައި ތިބީ، މި އުޅަނދުތައް ދުއްވުމާއި އޮޕަރޭޓްކުރަން ދިވެހި ސިފައިން ތަމްރީން ކުރެވެންދެންކަމަށް ކަމަށެވެ. ނަމަވެސް މިހާތަނަށް އައިއިރުވެސް އަދިވެސް، އެ އުޅަނދުތައް ދުއްވާ ބަލަހައްޓަނީ އިންޑިއާ ސިފައިންނެވެ. އަދި މިކަމުގެ ބޭސްތައް އުތުރާއި ދެކުނުގައިވެސް ޤާއިމުކޮށްފައިވެއެވެ.