ރައްޔިތުންގެ މަޖިލިހުގެ ނައިބު ރައީސްގެ މަގާމުގެ މަސްއޫލިއްޔަތު އަދާކުރެއްވުމުގައި ނާގާބިލް ކަމަށް ގަބޫލު ކުރައްވާ އެއްވެސް މެމްބަރަކު މަޖިލިހުގައި ނެތް ކަމަށް މަޖިލިހުގެ ނައިބު ރައީސް ކަމުން އިސްތިއުފާ ދެއްވި ގަލޮޅު އުތުރު ދާއިރާގެ މެމްބަރު އީވާ އަބްދުﷲ މިއަދު ވިދާޅުވެއްޖެއެވެ.
މަޖިލިހުގެ ނައިބު ރައީސް ކަމުން އީވާ ވަކި ކުރަން ހުށަހެޅި ގަރާރަށް މަޖިލިހުގެ ތަޅުމުގައި ޖަވާބުދާރީވެވަޑައިގަންނަވަމުން އީވާ ވިދާޅުވީ މަޖިލިހުގެ ނައިބު ރައީސް ކަން ކުރެއްވުމުގައި ގާނޫނުއަސާސީ އާއި ގާނޫނުތަކާއި މަޖިލިހުގެ ގަވައިދަކާ ހިލާފުވެ ވަޑައިގެންފައި ނޯންނާނެ ކަމަށެވެ.
"އެމްޑީޕީއެއް، ޕީޕީއެމެއް، ޕީއެންސީއެއް، ޖުމްހޫރީ ޕާޓީއެއް، އަދި އެހެން ސިޔާސީ ޕާޓީއެއްގެ ނުވަތަ އަމިއްލަ އިއްޒަތްތެރި މެމްބަރަކު ވެސް މި ތަނުގައި ނީންނަވާނެ ރައްޔިތުންގެ މަޖިލިހުގެ ނައިބު ރައީސް ކަން ކުރުމަށް އަޅުގަނޑު ނާގާބިލްއޭ ވިދާޅުވާނެ. އަދި ގާނޫނުއަސާސީ އާއި މަޖިލިހުގެ ގަވައިދާއި ގާނޫނަކާ ވެސް އަޅުގަނޑު މަޖިލިހުގެ ނައިބު ރައީސް ކަން ކުރުމުގައި ހިލާފުވެފައެއް ނޯންނާނެ. އަދި އިހަކަށް ދުވަހަކު ނެރުނު ސުޕްރީމް ކޯޓުގެ ހުކުމަކާ ވެސް އަޅުގަނޑު ހިލާފުވެފައެއް ނޯންނާނެ،" އީވާ ވިދާޅުވިއެވެ.
ސުޕްރީމް ކޯޓުގެ ހުކުމާ ހިލާފު ނުވާނެ ކަން ތަކުރާރު ކުރައްވައި އީވާ ވިދާޅުވީ ރިޔާސަތު ބަލަހައްޓާފައި ވާނީ، އެކަން ކުރުމަށް މަޖިލީހުގެ އަމީން އާންމު އަންގަވައި އެކަމުގެ ސިޓީ ފޮނުއްވި ޖަލްސާތަކުގައި އެކަނި ކަމަށެވެ.
"ރައީސްކަމުން ނަޝީދު ވަކިކުރުމަށް ސުޕްރީމް ކޯޓުގެ ހުކުމާ ހިލާފުވީ ކާކުކަން ތާރީހަށްޓަކައި ކޮންމެވެސް ދުވަހަކުން ހާމަވާނެ، ރައީސް ނަޝީދު ވަކިކުރުމުގެ ޖަލްސާ ކުރިއަށް ގެންދިޔައީ އަޅުގަނޑު މިތާ އިންދާ ގަވާއިދާ ހިލާފަށް އެހެން ބޭފުޅަކު ރިޔާސަތަށް އަރުވައިގެން،" އީވާ ވިދާޅުވިއެވެ.
އީވާ ވިދާޅުވި ގޮތުގައި މިއީ އެމްޑީޕީ އާއި ކުރީގެ ސަރުކާރުން އޭނާ އަށް ދޭ އަދަބެކެވެ. އީވާ ވިދާޅުވީ އޭނާ މަގާމުން ވަކިކުރަން ހުށަހެޅި މައިގަނޑު ސަބަބަކީ، "ނާގާބާލު، ކިބުރުވެރި" ސަރުކާރަކާ ދެކޮޅަށް ތެދުވެ، އެ ސަރުކާރަށް "ނާގާބިލު ކިބުރުވެރި ސަރުކާރެކޭ ބުނުން" ކަމަށެވެ.
"ހަގީގަތަކީ، އެ ސަރުކާރުން މާ ބޮޑަށް އަޅުގަނޑާ ނުުރުހުނީ. އަދި އަޅުގަނޑު ވެސް މާ ބޮޑަށް އެ ސަރުކާރާ ނުރުހުނީ. އެހެންވީމަ، އިއްޔެގެ އެމްޑީޕީގެ ސަރުކާރާ ނުރުހިގެން، އަޅުގަނޑު ބަސް ބުނެގެން، އަޅުގަނޑަށް ދޭ އަދަބު މިއީ." އީވާ ވިދާޅުވިއެވެ.
"އިއްޒަތްތެރި ރައީސް. ތިޔަ ޒާތީ، ސިޔާސީ، ނުވަތަ ބުރުގައި އިރާދަކުރެއްވިއްޔާ އަޅުގަނޑު ތާއްޓެއް ނުވާނަން. ވައްކަމުގެ ހާއްޔެއްގައި އަޅުގަނޑު ތާއްޓެއް ނުވާނަން. އަމިއްލަ މަގާމެއް [ނުވަތަ] މަންފާއެއް ދިފާއުކުރުމަށްޓަކައި ޑިމޮކްރެޓިކް އުސޫލުތަކާއި ހަމަތައް ކަފުން ކުރާ މީހަކަށް އަޅުގަނޑު ނުވާނަން،"
އީވާ ގާތްގަނޑަކަށް ބައިގަޑިއިރެއްހާ އިރު، ޖަވާބުދާރީވެވަޑައިގަތުމަށް ފަހު، އޭނާ ވަނީ އިސްތިއުފާގެ ސިޓީ އިދާރީ މޭޒަށް ހުށަހަޅުއްވައިފައެވެ. އެއާއެކު، މަޖިލިހުގެ ރިޔާސަތު ބެލެހެއްޓެވި މަޖިލިހުގެ ރައީސް މުހައްމަދު އަސްލަމް ވަނީ އީވާ އިސްތިއުފާ ދެއްވިކަން އިއުލާން ކުރައްވައިފައެވެ.
