"ތިމާވެށި"ގެ ނަމުގައި އެފްއެސްއެމްއިންގެ ސީއެސްއާރު އިނީޝިއޭޓިވްގެ ދަށުން ރީޔޫސަބަލް އިކޯ ބޭގެއް ތައާރަފް ކޮށްފިއެވެ.
އެފްއެސްއެމްއިން ބުނެފައިވަނީ "ތިމާވެށި" އަކީ އެކުންފުނީގެ ސީއެސްއާރު އިނީޝިއޭޓިވްގެ ދަށުން ކުންފުނިން ތައާރަފްކުރި ރީޔޫސަބަލް އިކޯ ބޭގެއް އެއްކަމުގައެވެ. އެފްއެސްއެމްއިން ބުނެފައިވަނީ މިކަމަށް ހިތްވަރު ލިބުނީ އެއްފަހަރު ބޭނުންކޮށްފައި އުކާލާ ޕްލާސްޓިކް ބޭނުންކުރުން މަނާކުރުމަށް ސަރުކާރުން ނިންމި ނިންމުމާއި ގުޅިގެން ކަމުގައެވެ.
އަދި އެ ކުންފުނިން ބުނެފައިވަނީ މިއީ އެއްފަހަރު ބޭނުންކޮށްފައި އުކާލާ ޕްލާސްޓިކް ކޮތަޅު ބޭނުންކުރުން މަދުކޮށް ތިމާވެއްޓާ ރައްޓެހި އިތުރު ގޮތްތައް ތައާރަފް ކުރުމަށާއި އުފެއްދުމަށް ކުރާ މަސައްކަތް ރަމްޒުކޮށްދޭކަމެއް ކަމުގައެވެ.
އެފްއެސްއެމްއިން އިތުރަށް ބުނެފައިވަނީ، އިކޯ-ބޭގް ދެ ސައިޒަކަށް ލިބެން ހުންނާނެ ކަމަށެވެ. މިގޮތުން ބޮޑު ސައިޒު ފަސޭހައިން ޕޮކެޓް ސައިޒަށް ފޯލްޑްކޮށްގެން ފަސޭހަ ބޭނުންކުރެވޭއިރު، މި ކޮތަޅުތައް ސްކޫލްތަކާއި އެންޖީއޯތަކަށް، ކުންފުނިން އެހެންފަރާތްތަކާއި ބާއްވާ ގުޅުމުގެ ތެރެއިން، ބެހުމުގެ ވިސްނުން ގެންގުޅޭ ކަމަށްވެސް އެފްއެސްއެމްއިން ބުނެފައި ވެއެވެ.
