ފަލަސްތީނުގެ މިނިވަންކަމަށް ޖިހާދު ކުރާ ހަމާސް ޖަމާއަތާއި އިސްރާއީލާއެކު ވެފައިވާ، ވަގުތީގޮތުން ހަނގުރާމަ ހުއްޓާލުމުގެ އެއްބަސްވުމުގެ މުއްދަތު އިތުރު ދެ ދުވަހަށް އިތުރު ކުރުމަށް ދެފަރާތުން އެއްބަސް ވެއްޖެއެވެ.
ހަމާސް އިން ބުނެފައިވަނީ ގަތަރާއި މިސްރާއެކު އެއްބަސްވެފައި ވަނީ އިސްރާއީލާއެކު ކުރިން ހަތަރު ދުވަހުގެ ހަނގުރާމަ ހުއްޓާލުމުގެ ޝަރުތުތަކާ އެއްގޮތަށް ދެ ދުވަހުގެ މުއްދަތަށް ހަނގުރާމައިގެ މުއްދަތު އިތުރުކުރުމަށް ކަމަށެވެ.
ހަމާސްގެ އޮފިޝަލަކު ރޮއިޓާސްއަށް ފޯނުން ގުޅުއްވައި ވިދާޅުވީ ގަތަރާއި މިސްރުގައި ތިބި އަޚުންނާއެކު ވަގުތީ އިންސާނީ ހަނގުރާމައިގެ މުއްދަތު އިތުރު ދެ ދުވަހަށް އިތުރުކުރުމަށް އެއްބަސްވުމަކަށް އާދެވިފައިވާ ކަމަށެވެ. ގަތަރުގެ ޚާރިޖީ ވުޒާރާގެ ތަރުޖަމާނަކު ސޯޝަލް މީޑިއާ ޕްލެޓްފޯމް އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ ޣައްޒާގައި ހަނގުރާމަ ހުއްޓާލުމުގެ މުއްދަތު އިތުރު ދެ ދުވަހަށް އިތުރުކުރުމަށް އެއްބަސްވުމަކަށް އާދެވިފައިވާ ކަމަށެވެ.
ހަނގުރާމައިގެ އެއްބަސްވުމުގެ ދަށުން ހަމާސް ޖަމާއަތުން މިހާތަނަށް އިސްރާއީލުގެ 39 މީހަކު ދޫކޮށްލާފައިވާއިރު، އޭގެ ތެރޭގައި އޮކްޓޯބަރު މަހުގެ 7 ވަނަ ދުވަހު ދިން ހަމަލާގައި ޔަތީމްވެފައިވާ ހަތަރު އަހަރުގެ އަންހެން ކުއްޖަކު ވެސް ހިމެނެއެވެ. އެއްބަސްވުމުގެ ޝަރުތުތަކުގެ ބަދަލުގައި އިޒްރޭލުން ވަނީ ފަލަސްތީނުގެ 117 ގައިދީއަކު މިނިވަންކޮށްފަ އެވެ. މީގެ އިތުރުން ޣައްޒާއިން، ދުނިޔޭގެ އެކި ގައުމުތަކަށް ނިސްބަތްވާ އިތުރު 19 މީހަކުވެސް ވަނީ ވަކި އިންތިޒާމްތަކެއްގެ ދަށުން ދޫކޮށްލާފައެވެ.
