ކުރީގެ ރައީސް ޔާމިން އަލަށް އުފައްދަވާ ސިޔާސީ ޕާޓީގެ ނަމަކީ "ޕީޕަލްސް ނޭޝަނަލް ފްރޮންޓް" ކަން ހާމަކޮށްފި އެވެ.

ރައީސް ޔާމިން އުފައްދަވާ އާ ސިޔާސީ ޕާޓީގެ ނަމާއި ލޯގޯ މިރޭގެ ވަގުތެއްގައި ވަނީ ސޯޝަލް މީޑިއާގައިހިއްސާކޮށްފަ އެވެ. އަދި ފާޓީ އުފެއްދުމަށް މާދަމާގެ ވަގުތެއްގައި އިލެކްޝަންސް ކޮމިޝަނަށް ހުއްދަށް އެދޭނެކަން ޕާޓީ ހެދުމުގައި އިސްކޮށް ހަރަކާތްތެރިވަމުންދާ ފަރާތްތަކުން ވަނީ ހާމަކޮށްފައެވެ.

بِسْمِ اللهِ الرَّحْمٰنِ الرَّحِيْمِ pic.twitter.com/ZWe0bLPoJN

— People’s National Front (@PNFront) November 25, 2023

ޕީޕީއެމްގެ ރައީސްކަމުން ރައީސް ޔާމިން ވަކިވެވަޑައިގެން، އާ ޕާޓީއެއް އުފެއްދެވުމަށް މަސައްކަތް ކުރައްވަމުން ގެންދަވާއިރު، ޕީޕީއެމްގެ ލީޑަރޝިޕް އެކީކަހަލަ ގޮތަކަށް މިހާރުވަނީ ރައީސް މުއިއްޒުއަށް ބައިއަަތު ހިފާފައެވެ. އެގޮތުން ސަރުކާރުގެ އިސް މަގާމްތަކުގަ ތިއްބެވި ޕީޕީއެމް ޕީއެންސީގެ އިސް ބޭފުޅުން މިހާރު ގެންދަވަނީ ރައީސް މުއިއްޒުއަށް ތާއީދުކުރާކަން ހާމަކޮށް ޓުވީޓު ކުރައްވަމުންނެވެ.

ރައީސް ޔާމިން އުފައްދަވާ އާ ޕާޓީ އުފެއްދެވުމުގައި އެންމެ އިސްކޮށް ހަރަކާތްތެރި ވަމުންދާ ކުރީގެ ނާއިބު ރައީސް ޑރ. ޖަމީލް ވިދާޅުވެފައިވަނީ، ވެރިކަން ކުރާ ކޯލިޝަންގައި ހިމެނޭ އެންމެ ބޮޑު ޕާޓީ، ޕީޕީއެމްގެ އެތެރޭގައި ބަޔަކު ކޮށްފަ އޮތީ ވަރަށް ބޮޑު ބަޢާވާތެއް ކަމުގައެވެ.

ރޭ އޮންލައިން ނޫހަކަށް ދެއްވި އިންޓަރވިއުއެއްގައި ވާހަކަ ދައްކަވަމުން ޑރ. ޖަމީލް ވިދާޅުވީ ޕީޕީއެމްގެ އެތެރޭގައި ކަން ހިނގައިދިޔަ ގޮތް އެންމެނަށްވެސް އެނގެންޖެހޭ ކަމަށާއި، ޕީޕީއެމްގެ އެތެރޭގައި ވެފައިވަނީ ހީނުކުރާ ވަރުގެ ބޭވަފާތެރިކަމެއް ކަމުގައެވެ. ޖަމީލް ވިދާޅުވީ ރައީސް މުއިއްޒުއަށް ވެރިކަން ލިބުނު ހިސާބުން ރައީސް ޔާމިންއަކީ ނެތް ބޭފުޅަކަށް ހަދާފައިވާ ކަމަށާއި، އެކަން ކުރީ ޕީޕީއެމްގެ ލީޑަރޝިޕުން ކަމަށެވެ.