މޯލްޑިވްސް މާކެޓިން އެންޑް ޕީއާރު ކޯޕަރޭޝަން (އެމްއެމްޕީއާރުސީ) ރީބްރޭންޑްކޮށް އިތުރު މާކެޓްތަކުގައި ރާއްޖެ އިސްތިހާރު ކުރަން ނިންމާފައިވާ ކަމަށް އާ ސަރުކާރުގެ ޓޫރިޒަމް މިނިސްޓަރު އިބްރާހިމް ފައިސަލް މިއަދު ވިދާޅުވެއްޖެއެވެ.
ރައީސް ޑރ. މުހައްމަދު މުއިއްޒުގެ ސަރުކާރުން އިއްޔެ ބޭއްވި ކެބިނެޓް ބައްދަލުވުމުގައި ވަނީ ރާއްޖޭގެ ފަތުރުވެރިކަން ކުރިއެރުވުމަށް "ވިޒިޓާ އިކޮނޮމީ ކައުންސިލް" ގެ ނަމުގައި ކައުންސިލެއް އުފައްދަން ނިންމައިފައެވެ. މި ކައުންސިިލް ޗެއާ ކުރައްވަނީ ރައީސް މުއިއްޒެވެ. ކޯ ޗެއާއިންގެ ގޮތުގައި ތިއްބަވާނީ ޓޫރިޒަމް މިނިސްޓަރު ފައިސަލްގެ އިތުރުން އިކޮނޮމިކް މިނިސްޓަރު މުހައްމަދު ސައީދެވެ. އެ ބޭފުޅުންގެ އިތުރުން ބައެއް އެހެން ވަޒީރުން ވެސް ކައުންސިލްގައި ތިއްބަވައެވެ.
ވިޒިޓާ އިކޮނޮމީ ކައުންސިލުގެ ފަރާތުން ބޭއްވި ފުރަތަމަ ނޫސްވެރިންގެ ބައްދަލުވުމުގައި ފައިސަލް ވިދާޅުވީ ރައީސް މުއިއްޒު އެމްއެމްޕީއާރުސީ ރީބްރޭންޑް ކުރަން ވަރަށް ބޭނުންފުޅުވާ ކަމަށާއި އެހެންވެ އެކަމަށް މަސައްކަތްތަކެއް ކުރައްވަން ނިންމަވާފައިވާ ކަމަށެވެ. ފައިސަލް ވިދާޅުވީ، ކައުންސިލެއް އެކުލަވާލި ނަމަވެސް އެ ކައުންސިލާ ގުޅިގެން ރާއްޖެ އިޝްތިހާރު ކުރުމުގެ މަސައްކަތް މައިގަނޑު ގޮތެއްގައި ކުރަމުންދާނީ މިހާރު ވެސް އެ މަސްއޫލިއްޔަތު އޮންނަ އެމްއެމްޕީއާރުސީން ކަމަށެވެ.
"އަޅުގަނޑު މި ފުރުސަތުގައި ފާހަގަކޮށްލަން ބޭނުން، ރައީސް މުއިއްޒު ވަރަށް ބޮޑަށް ބޭނުންފުޅުވޭ އެމްއެމްޕީއާރުސީ ރީބްރޭންޑު ކުރަން. މިހާރު އެ ތަނަށް އެމްޑީން އެސައިން ކުރެވުނީމަ، އެ މަސައްކަތް ވެސް ފަށައިގަން ވަރަށް ބާރަށް ކުރިއަށްގެންދާނަން." ފައިސަލް ވިދާޅުވިއެވެ.
ފައިސަލް ވިދާޅުވި ގޮތުގައި، އެމްއެމްޕީއާރުސީ ރީބްރޭންޑު ކުރުމަށް ފަހު އެމްއެމްޕީއާރުސީގެ މަސައްކަތްތައް ބައްޓަން ކުރާނީ މިހާރު ހުރި މާކެޓުތަކަށް އެކަނި މަސައްކަތް ކުރުމުގެ ބަދަލުގައި އާ މާކެޓުތައް ވެސް ހޯދައިގެން ފަތުރުވެރިން އަންނަ އަދަދު އިތުރު ކުރުމަށެވެ.
އެމްއެމްޕީއާރުސީ ރީބްރޭންޑު ކުރުމުގެ ވިިސްނުމެއް ކުރީގެ ރައީސް އިބްރާހިމް މުހައްމަދު ސޯލިހްގެ ސަރުކާރުން ވެސް ގެންގުޅުނެވެ. އެކަމަކު، ވެރިކަން ނިމިގެން ދިޔައިރު ވެސް އެކަން ކޮށްފައެއް ނުވެއެވެ. ރީބްރޭންޑް ނުކުރި ނަމަވެސް އެމްއެމްޕީއާރުސީން ރާއްޖެ ޕްރޮމޯޓް ކުރުމަށް ގިނަ މަސައްކަތްތަކެއް ކުރިއެވެ.
ރާއްޖޭގައި މި ފަހުގެ ތާރީހެއްގައި ހިނގައިދިޔަ އެންމެ ބޮޑު އެއް ހިޔާނާތަކީ އެމްއެމްޕީއާރުސީގެ ކޮރަޕްޝަނެވެ. ކުރީގެ ރައީސް އަބްދުﷲ ޔާމީންގެ ވެރިކަމުގައި އެމްއެމްޕީއާރުސީ މެދުވެރިކޮށް ހިންގި ހިޔާނާތުގެ ތެރެއިން ރާއްޖޭގެ ރަށްތަކާއި ފަޅުތައް ކުއްޔަށް ދީގެން ދައުލަތަށް ލިބެން ޖެހޭ 3.2 ބިލިއަަނަށް ވުރެ ގިނަ ރުފިޔާ އަމިއްލަ ފަރާތްތަކުގެ އެކައުންޓުތަކަށް ވަދެފައިވެއެވެ.
