ރައީސް ޑރ. މުހައްމަދު މުއިއްޒު ސަރުކާރުގެ އަމާޒަކީ ރާއްޖޭގެ ފަތުރުވެރިކަމުން މިހާރު ލިބޭ އާމްދަނީ ހަ ބިލިއަން ޑޮލަރާ ހަމައަށް މައްޗަށް ޖެއްސުން ކަމަށް "ވިޒިޓާ އިކޮނޮމިކް ކައުންސިލް"ގެ ކޯ ޗެއާ އަދި އިކޮނޮމިކް މިނިސްޓަރު މުހައްމަދު ސައީދު މިއަދު ވިދާޅުވެއްޖެއެވެ.
ރާއްޖޭގެ ފަތުރުވެރިކަން ކުރިއެރުވުމަށް މި ސަރުކާރުން އަލަށް އުފެއްދި ވިޒިޓާ އިކޮނޮމިކް ކައުންސިލުގެ ފަރާތުން ބޭއްވި ނޫސްވެރިންގެ ބައްދަލުވުމުގައި ސައީދު ވިދާޅުވީ ރާއްޖޭގެ އިގްތިސާދީ މައި ހަރަކާތުގެ ގޮތުގައި ފަތުރުވެރިކަން އޮތް ކަމުގައި ވިޔަސް، އެކަމާ ގުޅުން ހުރި އިތުރު ސިނާއަތްތައް ތައާރަފް ކުރުމަކީ ރައީސް މުއިއްޒާއި ސަރުކާރުގެ ވިސްނުމެއް ކަމަށާއި ކައުންސިލްގައި ހިމެނިވަޑައިގަންނަވާ ހުރިހާ ކައުންސިލަރުން ވެސް ތިއްބެވީ އެ ވިސްނެވުމުގައި ކަމަށެވެ.
އެގޮތުން ފަތުރުވެރިކަމުގެ ތެރެއިން އެ ސިނާއަތް ޑައިވާސިފައި ކުރުމަށާއި އިގްތިސާދު ހަމައެކަނި އެއް ކަމަކަށް އަމާޒު ނުކުރުމަށް އެކިއެކި މިނިސްޓްރީތަކުން ސިޔާސަތުތައް ގެންގުޅުއްވާ ކަމަށް ސައީދު ވިދާޅުވިއެވެ. ނަމަވެސް އޭގެ މާ ބޮޑު ތަފްސީލެއް ސައީދާއި ނޫސްވެރިންގެ ބައްދަލުވުމުގައި ބައިވެރިވެވަޑައިގެންނެވި އެހެން ވަޒީރުން ނުދެއްވައެވެ.
ސައީދު ވިދާޅުވީ ރާއްޖޭގެ ޖީޑީޕީ ހަ ބިލިއަން އެމެރިކާ ޑޮލަރުގައި އެވްރެޖްކޮށް ހުރިއިރު، އޭގެ ތެރެއިން 4.5 ބިލިއަން އެމެރިކާ ޑޮލަރު ލިބެނީ ފަތުރުވެރިކަމުން ކަމަށެވެ. އަދި އަމާޒަކީ ޓޫރިޒަމުން ލިބޭ އާމްދަނީ ހަ ބިލިއަން އެމެރިކާ ޑޮލަރަށް ޖެއްސުން ކަމަށް ވެސް އޭނާ ވިދާޅުވިއެވެ.
"މީގައި ކުރު ރާސްތާގެ ޓާގެޓެއް އެބައޮތް. އެއީ ހަ ބިލިއަން އެމެރިކާ ޑޮލަރަށް ޓޫރިޒަމް ރެވެނިއު ޖެއްސުން. މިއީ މިހާރުގެ ޓޯޓަލް ޖީޑީޕީ ސީލިން ހަމައެކަނި ޓޫރިޒަމް ސެކްޓާ އަށް ޓާގެޓްކޮށްފައި ޕުޝްކޮށްލުން. އެހެންވީމަ އެހެން ސެކްޓާތަކާ އެކުގައި ވަރަށް ބޮޑު ތަން އިތުރުވެގެން ދާނެ." ސައީދު ވިދާޅުވިއެވެ.
ކުރީގެ ރައީސް އަބްދުﷲ ޔާމީންގެ ސަރުކާރުގައި ވެސް އިކޮނޮމިކް މިނިސްޓަރު ކަން ކުރެއްވި ސައީދު ވިދާޅުވީ ބައެއް ގައުމުތަކުގައި މިހާރު ވެސް ވިޒިޓާ އިކޮނޮމީ ކައުންސިލް އުފައްދައިގެން މަސައްކަތް ކުރަމުންދާ ކަމަށެވެ. އެގޮތުން ކޮވިޑް-19 ގެ ބަލިމަޑުކަމަށް ފަހު، ވިޒިޓާ ޑިވެލޮޕްމަންޓް ކުރިއަށް ގެންދާ ކަމަށް ވިދާޅުވިއެވެ.
އޭގެއިތުރުން އިނގިރޭސި ވިލާތުގެ ބައެއް ތަންތަނުގައި ފަތުރުވެރިކަން ތައާރަފްކޮށް ކުރިއަށް ގެންދިއުމަށް ވިޒިޓާ އިކޮނޮމީ އެކްޓިވިޓީސްތަކެއް ކުރިއަށް ގެންދާ ކަމަށް އޭނާ ވިދާޅުވިއެވެ.
ސައީދު ވިދާޅުވި ގޮތުގައި މިކަމުގެ ސަބަބުން ދެ ކަމެއް ހާސިލްވެއެވެ. އެގޮތުން ފަތުރުވެރިންނަށް ވޯލްޑް ސްޓޭންޑަޑްގައި ކަންތައްތަކެއް ކުރެވޭ އިރު، ރާއްޖޭގައި ތިބި ދިވެހިންނަށް ފެންވަރު ރަނގަޅު ހިދުމަތްތަކެއް ހެޔޮ އަގުގައި ލިބިގެންދާ ކަމަށް ވެސް އޭނާ ވިދާޅުވިއެވެ.
"އެންމެ ބޮޑު ބޭނުމަކީ ދެކޮޅު ޖެހޭ އިންކަމެއް ރައީސް މުއިއްޒުގެ ވެރިކަމުގައި ތައާރަފްކޮށް ސަސްޓެއިނަބަލް ދެމެހެއްޓެނިވި ކޭޝްފްލޯއެއް/އިގްތިސާދެއް ގެންގުޅެވި ތަރައްގީވެފައިވާ ގައުމަކަށް ހެއްދެވުން." ސައީދު ވިދާޅުވިއެވެ.
