ރައީސް އިބުރާހިމް މުހައްމަދު ސާލިހުގެ ސަރުކާރުން ފްލެޓް ދީފައިވަނީ އޭގެ ހައްގުވެރިންނަށްތޯ ބަލާ، އެ ސަރުކާރުން އެކުލަވާލި ފްލެޓް ރިވިވް ކުރަން ނިންމައިފިއެވެ.
ދަރުބާރުގޭގައި ކުރިޔަށްދާ ނޫސްވެރިންގެ ބައްދަލުވުމުގައި ވާހަކަ ދައްކަވަމުން އާ ހައުސިން މިނިސްޓަރު ޑރ. އަލީ ހައިދަރު ވިދާޅުވީ، ފާއިތުވި ރިޔާސީ ކެމްޕޭންގެ ފުރަތަމަ ބުރާއި ދެވަނަ ބުރުގައި އޭރިގެ ސަރުކާރުން ފްލެޓް ދޫކޮށްފައިވަނީ އޭގެ ހައްގުވެރިންނަށްތޯ ބައްލަވާނެ ކަމުގައެވެ.
އަދި އޭނާ ވިދާޅުވީ ރައީސް މުއިއްޒުއަށް ރިޔާސީ އިންތިޚާބު ކާމިޔާވުމަށްފަހު، ފެލެޓާއި ގޯތި ދޫކުރުން މަޑުޖައްސާލުމަށް އޭސީސީން އަންގާފައި ވަނިކޮށް ދޫކޮށްފައިވާ ބިމާއި ގޯއްޗަށް މިސަރުކާރުން އިހުތިރާމް ނުކުރާނެ ކަމުގައެވެ. އަދި އޭނާ ވިދާޅުވީ މިމައްސަލާއާއި ގުޅޭގޮތުން އޭސީސީގެ ލަފައަށްވެސް ބައްލަވާނެ ކަމުގައެވެ.
މި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ. ހައިދަރު ވިދާޅުވީ ބައެއް މީހުންނަށް ގޯތީގެ ރަޖިސްޓްރީ ދޫކޮށްފައިވަނީ ބިމެއް ނުވެސް ނެތި ކަމަށާއި، ނެތް ބިމަކަށް ގޯތީގެ ރަޖިސްޓްރީ ނުދެވޭނެކަމަށް ގާނޫނުގައި ބުނެފައިވާ ކަމުގައެވެ. އެހެންކަމުން އެއީ ގޮތެއް ނިންމަންޖެހޭ މައްސަލައެއްކަމަށްވެސް އޭނާ ވިދާޅުވިއެވެ.
ރައީސް ސާލިހުގެ ސަރުކާރުން ކުރިޔަށް ގެންދިޔަ ގެދޮރުވެރިޔާ ސްކީމުގެ ދަށުން ހުޅުމާލޭގެ ދެވަނަ ފިޔަވަހީގައި ސަރުކާރުން އަންނަނީ 18 ބުރީގެ 32 ޓަވަރު އިމާރާތް ކުރަމުންނެވެ. އޭގެތެރޭގައި ހިމެނެނީ ދެ ކޮޓަރީގެ 1200 އެޕާޓުމެންޓާއި ތިން ކޮޓަރީގެ 2800 އެޕާޓުމެންޓެވެ.
ފާއިތުވި އޮގަސްޓްމަހުގެ 8 ވަނަ ދުވަހު ރައީސް ސާލިހުގެ ސަރުކާރުން އިއުލާނު ކުރި ފްލެޓް ލިސްޓުގައި ހައުސިން މިނިސްޓަރީން ވަނީ ޝަރުތު ހަމަވާ ހުރިހާ އެންމެންނަށް ފްލެޓު ދޭން ނިންމާފައެވެ.
މާލެއަށް ކުރިމަތިވެފައިވާ ބޯހިޔާވަހިކަމުގެ މައްސަލައަށް ހައްލެއް ހޯދުމަށް މިސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ފްލެޓުތަކަށް އެދުމުގެ ފުރުސަތު ހުޅުވާލީ މިދިޔަ އަހަރުގެ ޖޫން 26 ގައެވެ. ފޯމު ހުށަހެޅުމުގެ ސުންގަޑި ހަމަވިއިރު 4000 ފްލެޓަށް އެދި 20،697 މީހުން ފޯމު ހުށަހެޅިއެވެ. އޭގެ ތެރެއިން 13000 އަށްވުރެ ގިނަ މީހުން ފްލެޓަށް ޝަރުތު ހަމަވާކަމަށް ސަރުކާރުން ނިންމެވިއެވެ.
