ދިރާސީ އާ އަހަރު ޖެނުއަރީމަހުން ފެށިގެން ފަށާގޮތަށް ބަދަލު ކުރާނީ 2025 ވަނަ އަހަރު ކަމަށް، އާ އެޑިއުކޭޝަން މިނިސްޓަރު ވިދާޅުވެއްޖެއެވެ.
ރައީސް މުއިއްޒުގެ ސަރުކާރުގައި އެޑިއުކޭޝަން މިނިސްޓަރުކަމަށް އައްޔަން ކުރި ޑރ. އިސްމާއިލް ޝަފީއު މިކަން ހާމަކުރެއްވީ ޕްރިންސިޕަލުންނާއެކު ބޭއްވި ބައްދަލު ކުރެއްވުމުގައި ވާހަކަ ދައްކަވަމުންނެވެ. މި ބައްދަލު ކުރެއްވުމުގައި ވާހަކަ ދައްކަވަމުން އިސްމާއިލުވަނީ ޕްރިންސިޕަލުންގެ ޝަކުވާތަކުގެ އަޑު އައްސަވާފައެވެ.
ރާއްޖޭގައި އާންމު ގޮތެއްގައި ދިރާސީ އަހަރު ފަށަނީ ޖެނުއަރީގައެވެ. އެހެންނަމަވެސް އެ އުސޫލަށް ބަދަލު ގެނައީ ކޯވިޑް ހާލަތާއި ގުޅިގެންނާއި ޓުއަރިޒަމް އިންޑަސްޓްރީގެ ގިނަ ބައެއްގެ އެދުމުގެ މަތިން 2021 ވަނަ އަހަރުއެވެ.
އެހެންނަމަވެސް ކުރީ ސަރުކާރުން މިނިންމުމަކީ ގިނަބަޔަކަށް ކަމުދިޔަ ނިންމުމަކަށް ނުވިއެވެ. އަދި ތައުލީމީ ދާއިރާގެ ގިނަބަޔަކު ބޭނުންވަނީ ދިރާސީ އާއަހަރުގެ ފެށުން ކުރިންވެސް އޮތްގޮތަށް ބޭއްވުމަށެވެ.
މި ބައްދަލުވުމުގައި ބައިވެރިވި ބައެއް ޕްރިންސިޕަލުން ވިދާޅުވި ގޮތުގައި، މާލީ އަހަރުގެ ފަހުކޮޅު ސްކޫލުތައް ހުޅުވުމާއި އަދި އަހަރުގެ މެދުތެރެއިން ސްކޫލުތައް ހުޅުވަން ޖެހުމުން ކުރާންޖެހޭ މަރާމާތުތަށްވެސް އުދަގޫތައް ކުރިމަތިވެ، ގޮންޖެހުންތަކާ ކުރިމަތިލާން ޖެހޭކަމަށް މިނިސްޓަރު ވިދާޅުވިއެވެ.
ދިރާސީ އާއަހަރުގެ ފެށުމަށް ބަދަލު ގެނައުމަކީ ރައީސް މުއިއްޒުގެ ރިޔާސީ ވައުދެކެވެ.
