ރައީސް ޑރ. މުހައްމަދު މުއިއްޒު، ޕީއެންސީގެ ނައިބު ރައީސް މުހައްމަދު ހުސެއިން ޝަރީފް (މުންދު) އަށާއި ޖުމްހޫރީ ޕާޓީ (ޖޭޕީ) ގެ ކުރީގެ ޑެޕިއުޓީ ލީޑަރު އިގްބާލް އާދަމަށް މިނިސްޓަރުން ފެންވަރުގެ މަގާމެއް ދެއްވައިފިއެވެ.
ރައީސް އޮފީހުން މިރޭ ބުނި ގޮތުގައި ސަރުކާރުގެ ބައެއް އިސް މަގާމުތަކަށް ބޭފުޅުން އައްޔަން ކުރައްވައި އެ ބޭފުޅުންނަށް މަގާމުގެ ފަތްކޮޅު ވަނީ އަރުވައިފައެވެ. މިކަމަށްޓަކައި ހާއްސަ ރަސްމިއްޔާތެއް ބާއްވާނީ މިއަދު ރައީސުލްޖުމްހޫރިއްޔާގެ އޮފީހުގައެވެ.
މި ރަސްމިއްޔާތުގައި މިނިސްޓަރުންގެ ފެންވަރުގައި އައްޔަން ކުރައްވައި ފަތްކޮޅު އެރުވީ މުންދު އާއި އިގްބާލަށެވެ.
ރައީސުލްޖުމްހޫރިއްޔާގެ އޮފީހުގެ މިނިސްޓާ އެޓް ދަ ޕްރެޒިޑެންޓްސް އޮފީސްގެ މަގާމަށް އިގްބާލް އައްޔަން ކުރެއްވި އިރު، މުންދު އައްޔަން ކުރައްވާފައި ވަނީ މިނިސްޓްރީ އޮފް ފޮރިން އެފެއާޒްގެ އެމްބެސެޑާ އެޓް ލާޖްގެ މަގާމަށެވެ.
މި ދެ ބޭފުޅުން ވަނީ ނިމިދިޔަ ރިޔާސީ އިންތިހާބު ރައީސް މުއިއްޒަށް ކާމިޔާބުކޮށް ދިނުމަށްޓަކައި ބުރަ މަސައްކަތްތަކެއް ކުރައްވައިފައެވެ. އެކަމަކު، އިގްބާލް މުއިއްޒުގެ ކެމްޕެއިނާ ގުޅިވަޑައިގެން މަސައްކަތް ކުރައްވާފައި ވަނީ ރިޔާސީ އިންތިހާބުގެ ދެވަނަ ބުރާ ހިސާބުންނެވެ.
އިގްބާލާއި ޖޭޕީގެ ކުރީގެ ސެކްރެޓަރީ ޖެނެރަލް އަލީ އާރިފަކީ ރައީސް މުއިއްޒުގެ އުފަން ރަށް ހއ. ވަށަވަރު ދެ ބޭފުޅުންނެވެ. އެ ބޭފުޅުންނަކީ ރައީސް މުއިއްޒުއާ ދެބެންގެ ދެދަރި ބޭފުޅުންވެސް މެއެވެ. އަލީ އާރިފް މީގެކުރިން ވަނީ މިނިސްޓާ އެޓް ދަ ޕްރެޒިޑެންޓްސް އޮފީސް ފޯ ޕްރެޒިޑެންޝަލް އެފެއާޒްގެ މަގާމަށް އައްޔަން ކުރައްވައިފައެވެ.
