ރައީސް ޔާމިންގެ މައްޗަށް އިއްވާފައިވާ 11 އަހަރުގެ ޖަލު ހުކުމްގެ އިތުރު ޝަރީއަތެއް މިހަފްތާގެ އަންގާރަ ދުވަހަށް ތާވަލު ކޮށްފިއެވެ. މިއީ ވ. އާރަށް ކުއްޔަށް ދިނުމުގައި އެމަނިކުފާނު ރިޝްވަތުހިފާ، އަދި މަނީ ލޯންޑަރ ކުރިކަމަށް ސާބިތުވެ އިއްވާފައިވާ ހުކުމްގެ އިސްތިއުނާފް ޝަރީއަތެކެވެ.
އެއަޑު އެހުން ތާވަލު ކޮށްފައިވަނި އެދުވަހުގެ 2:00 އަށެވެ.
ހައި ކޯޓުގައި ކުރިޔަށްދާ އިސްތިއުނާފްގެ މަރުހަލާގައި ދެން އޮންނާނީ މައްސަލާގައި ކޮންމެ ހަސްމަކުވެސް ފަހުބަސް އިއްވުމާއި، އަދި ޝަރީއަތުން ސާފުކުރާންޖެހޭ އިތުރުކަމެއް ނެތްނަމަ ހުކުމް އިއްވުމެވެ.
އާރަށުގެ މައްސަލައިގެ އިތުރުން ރ. ފުއްގިރި ކުއްޔަށް ދިނުމުގައި ޔާމިންގެ މައްޗަށް ކުރެވޭ ކޮރަޕްޝްނާއި ރިޝްވަތާއި މަނީ ލޯންޑަރ ކުުރުމުގެ ތުހުމަތުތަކާއި ގުޅޭ މައްސަލާގައިވެސް ވަނީ ދައުވާ އުފުލާފައެވެ. އެމައްސަލަ އަދިވެސް އޮތީ ކުރިމިނަލް ކޯޓުގައެވެ. އެމައްސަލާގެ އަޑުއެހުމެއް ނުބާއްވާތާ މިހާރުވަނީ ގިނަ ދުވަސްތަކެއް ވެފައެވެ.
ރައީސް ޔާމިންގެ މައްޗަށް 11 އަހަރުގެ ޖަލުހުކުމެއް އޮތްނަމަވެސް މިހާރު ހުންނެވީ ގޭ ބަންދުގައެވެ. ޔާމިން ގޭ ބަންދަށް ބަދަލުކުރީ މިހާރުގެ ރައީސް ޑރ. މުއިއްޒަށް ރިޔާސީ އިންތިޚާބު ކާމިޔާބު ކުރެވުމާއެކުއެވެ. އަދި ގޭބަންދުގައި މިހާރު ހުންނަވާއިރު، ކަރެކްޝަންސްއިންވަނީ އެމަނުކުފާނުގެ ގޭބަންދަށް ބޮޑެތި ލުއިތަކެއް ދީފައިވެސްމެއެވެ.
ރައީސް ޔާމިން މިނިވަން ކުރުމަކީ ރައީސް މުއިއްޒުގެ ރިޔާސީ ވައުދެއްވެސް މެއެވެ. އަދި ހުވާކުރާ ރަސްމިއްޔާތުގައި ރައީސް ޔާމިން ހުންނަވާނޭކަމަށް ޑރ. މުއިއްޒު ކުރިން ވިދާޅުވިނަމަވެސް، އެ ރަސްމިއްޔާތަށް ރައީސް ޔާމިނަށް ދިން ދައުވަތު އެމަނިކުފާނު ގަބޫލު ކުރައްވާފައެއް ނުވެއެވެ.
