ވޭތުވެދިޔަ ނޮވެމްބަރުމަހު ބޭއްވުނު އެމެރިކާގެ ރިޔާސީ އިންތިޚާބުގައި، ހަތަރު ސްޓޭޓެއްގެ ނަތީޖާ ބާތިލް ކުރުމަށް އެމެރިކާގެ ރައީސް ޑޮނަލްޑް ޓްރަމްޕްގެ ތާއީދާއެކު ސުޕްރީމް ކޯޓަށް ހުށަހެޅުއްވި މައްސަލަ ބަލައިނުގަނެ، ބޭރު ކޮށްލައިފިއެވެ.
ޓްރަމްޕްގެ ތާއީދާއެކު، އެމެރިކާގެ ޓެކްސަސް ސްޓޭޓުގެ އެޓާނީ ސުޕްކޯޓަށް ހުށަހެޅުއްވީ، 4 ސްޓޭޓެއް ކަމުގައިވާ، ޖޯޖިއާ، މިޗިގަން، ޕެންސިލެވީނިއާ އަދި ވިސްކަޒިންގެ ނަތީޖާ ބާތިލް ކުރުމަށެވެ.
މި 4 ސްޓޭޓަކީވެސް، ޑިމޮކްރަޓިކް ޕާޓީގެ ކެޑިޑޭޓް ޖޯ ބައިޑްން ކާމިޔާބު ކޮށްފައިވާ ސްޓޭޓުތަކެވެ.
ސުޕްރީމްކޯޓަށް ހުށެހަޅި މި މައްސަލައަކީ، އެމެރިކާގެ 19 ސްޓޭޓެއްގެ އެޓާނީ ޖެނެރަލްއަކާއި، އަދި މީގެ އިތުރުން ރިޕްބަލިކަން ޕާޓީއަށް ނިސްބަތްވާ، ގާނޫނު ހަދާ މަޖިލިސް، ކޮންގްރެސްގެ 127 މެމްބަރުންގެ ތާއީދާވެސް އެކީ ސުޕްރީމްކޯޓަށް ހުށަހެޅި މައްސަލައެކެވެ.
މިމައްސަލަ ބަލައިނުގަތުމަށް ނިންމާ ސުޕްރީމް ކޯޓުން ނެރުއްވި އަމުރުގައި ވަނީ، އިންތިޚާބީ މިމައްސަލަ ސުޕްރީމް ކޯޓަށް ހުށަހެޅުމުގެ އިޙުތިސާސް ޓެކްސަސްގެ އެޓާނީއަށް ލިބިގެން ނުވާ ކަމަށެވެ.
"އެހެން ސްޓޭޓެއްގެ އިންތިޚާބީ މައްސަލައެއްގެ ކޯޓަށް ހުށަހެޅުމުގެ ގާނޫނީ ހުއްޖަތު ޓެކްސަސްއަށް ސާބިތު ކޮށްދެވިފައެއް ނުވޭ،" ސުޕްރީމް ކޯޓުގެ ނިންމުމުގައި ވެއެވެ.
އެމެރިކާގެ ސުޕްރީމްކޯޓުން މިމައްސަލަ ބޭރުކޮށްލުމާއެކު، އިންތިޚާބުގައި އޮޅުވާލާ މަކަރު ހަދާފައިވާ ކަމަށް ބުނެ، ސުޕްރީމް ކޯޓުން އިންސާފު ލިބޭނެ ކަމަށް ޓްރަމްޕް ކުރައްވަމުން އައި އުމީދުތަކަށް މިވަނީ ވަރަށްބޮޑު ފަނޑުކަމެއް އައިސްފައެވެ. ޓްރަމްޕް މިހާތަނަށް ވިދާޅުވަމުން ގެންދަވާފައިވަނީ، ރިޔާސީ އިންތިޚާބުގެ މައްސަލާގައި ސުޕްރީމްކޯޓުން އިންސާފު ހޯއްދަވާނެ ކަމަށެވެ.
މި ހަފްތާގެ ކުރީކޮޅު، ސުޕްރީމް ކޯޓުންވަނީ، ޕެންސެލްވީނިއާ ސްޓޭޓުގައި ބައިޑްންއަށް ލިބިގެން ދިޔަ ކާމިޔާބީއާ ދެކޮޅަށް ހުށަހެޅިގެން ދިޔަ އެހެން މައްސަލައއެއްވެސް އެންމެ ފޮޅުވަތެއްގެ އަމުރަކުން، ބަލައި ނުގަނެ ބޭރު ކޮށްލާފައެވެ.
ޓަރަމްޕަ މިހާތަނަށް ވިދާޅުވަމުން ގެންދަވާފައިވަނީ، އޭނާއަށް ރިޔާސީ އިންތިޚާބުގެ ދެވަނަ ދައުރެއް ގެންލިގެން ދިޔައީ، ގަވާއިދާ ޚިލާފަށް އެތައް މިލިއަން ވޯޓެއް ލައިގެން ކަމުގައެވެ.
ނޮވެމްބަރު 3 ވަނަ ދުވަހު ބޭއްވުނު އިންތިޚާބަށްފަހު، މިހާތަނަށް އައިއިރު، ޓްރަމްޕްގެ ލޯޔަރުންވެސް އަދި ތާއީދު ކުރާ ފަރާތްތަކުންވެސް ވަނީ، ރިޔާސީ އިންތިޚާބާ ގުޅޭ އެތަކެއް މައްސަލައެއް އެމެރިކާގެ ކޯޓުތަކަށް ހުށަހަޅާފައެވެ. އެހެންނަމަވެސް، މިއިން އެއްވެސް މައްސަލައެއްގެ ނަތީޖާއެއްގެ ގޮތުން، އިންތިޚާބުގެ ނަތީޖާއަށް ބަދަލެއް އައިސްފައެއް ނުވެއެވެ.
ބައިޑްން ރިޔާސީ އިންތިޚާބު ކާމިޔާބު ކުރައްވާފައިވަނީ، 306 އިލެކްޓޯރަލް ވޯޓު ކާމިޔާބު ކުރައްވައިގެންނެވެ. ޓަރަމްޕަށް ލިބިވަޑައިގެންނެވީ 232 އިލެކްޓޯރަލް ވޯޓެވެ. އެމެރިކާގެ ރިޔާސީ އިންތިޚާބު ކާމިޔާބު ކުރެވޭނީ، ޖުމްލަ 538 އިލެކްޓޯރަލް ވޯޓުގެ ތެރެއިން 278 ވޯޓު ކާމިޔާބު ކުރައްވާ ކެޑިޑޭޓަކަށެވެ. ރިޔާސީ އިންތިޚާބުގައި ބައިޑްން ވަނީ 7 މިލިއަން ވޯޓު ޓަރަމްޕަށްވުރެ އިތުރަށް ހޯއްދަވާފައެވެ.
ގިނަ ގާނޫނީ ބޭފުޅުން ކުރިންވެސް ގަބޫލު ކޮށްފައި ވަނީ، ޓެކްސަސް ސްޓޭޓުން މިހުށަހެޅި މައްސަލައާ ގުޅޭގޮތުން ސުޕްރީމް ކޯޓުން ގޮތެއް ނިންމަން ބޭނުން ނުވާނެ ކަމަށެވެ.
ސުޕްރީމް ކޯޓުގެ މިފަހަރުގެ ނިންމުން އައީ، ޕެންސިލްވޭނިއާގެ ނަތީޖާއާއި ގުޅޭގޮތުން ސުޕްރީމް ކޯޓުން ނިންމި ނިންމުމާ ޚިލާފަށް ތަންކޮޅެއް ދިގުކޮށް ލިއްޔުއްވާ ނެރުއްވި އަމުރަކުންނެވެ. ޕެންސިލްވޭނިއާ ސްޓޭޓުގެ ނަތީޖާ ބާތިލް ކުރުމަށް ހުށަހެޅިގެން ދިޔަ މައްސަލަ ކޯޓުން ބަލައި ނުގަތުމަށް ނިންމާފައިވަނީ، "މައްސަލަ ބަލައެއް ނުގަނެވޭނެ" މިގޮތަށް އެންމެ ފޮޅުވަތަކުން ލިޔުއްވާ ނެރުއްވި އަމުރަކުންނެވެ.
ގާނޫނީ ބޭފުޅުން ވިދާޅުވާ ގޮތުގައި، ސުޕްރީމް ކޯޓުން މައްސަލަ ބަލައިގަނެ، މައްސަލައާމެދު ފައިސަލާ ކުރަނިވި ހުކުމެއް ކުރަންޖެހުނު ނަމަ، 9 ފަޑިޔާރުންގެ ތެރެއިން 2 ފަޑިޔާރަކު މައްްސަލައާއި ދެކޮޅަށް ވޯޓެއް ނުދެއްވާނެއެވެ. އެހެންނަމަވެސް، އެތައް މިލިއަން ރައްޔިތުންގެ ވޯޓު ބާތިލް ކުރުމަށް މި 2 ފަޑިޔާރުންވެސް ވޯޓު ދެއްވާނެ ކަމަށް ބެލެވިފައެއް ނުވެއެވެ.
