މާލެ ސިޓީގެ މޭޔަރާއި އިތުރު ދެ ކައުންސިލަރަކު އިސްތިއުފާ ދެއްވާފައިވާތީ ކައުންސިލަރުން ހޮވުމަށް އަންނަ އަހަރުގެ ޖެނުއަރީ މަހު ބައި-އިލެކްޝަން ބޭއްވުމަށް މަސައްކަތް ކުރައްވަމުން ގެންދަވާ ކަމަށް އިލެކްޝަންސް ކޮމިޝަން (އީސީ) އިން ބުނެފިއެވެ.
މާލޭގެ މޭޔަރުގެ މަގާމުގައި ހުންނެވި، ޑރ. މުހައްމަދު މުއިއްޒު އެ މަގާމުން އިސްތިއުފާ ދެއްވީ ރާއްޖޭގެ ރައްޔިތުންގެ ބޮޑުޢައުލަބިއްޔަތަކާއިއެކު އެމަނިކުފާނު ރާއްޖޭގެ ރައީސުލްޖުމްހޫރިއްޔާ ކަމުގެ މަޤާމަށް އިންތިޚާބު ކުރައްވުމުން މަޤާމާއި ހަވާލުވެ ވަޑައިގަންނަވާ މަސްއޫލިއްޔަތު އަދާ ކުރެއްވުމަށެވެ.
މާލޭގެ މެދު ހެންވޭރު ދާއިރާގެ ކައުންސިލަރު އާދަމް ރަމީޒާއި މާފަންނު ދެކުނު ދާއިރާގެ ކައުންސިލަރު ނަސީރު (ހެރިންސް) އިސްތިއުފާ ދެއްވީ އާ ސަރުކާރުގައި ރައީސް އޮފީހުގެ މިނިސްޓަރުކަމާ ހަވާލުވެވަޑައިގަތުމަށެވެ.
ލާމަރުކަޒީ ގާނޫނު މިހާރު އޮތް ގޮތުން ކައުންސިލަރުން އިސްތިއުފާ ދެއްވާފައިވާކަން އެލްޖީއޭ އިން އަންގާ ދުވަހުން ފެށިގެން 45 ދުވަސް ތެރޭގައި ބައި-އިލެކްޝަން ބާއްވަންޖެހެއެވެ.
އީސީގެ ނައިބް ރައީސް އިސްމާއީލް ހަބީބް ވިދާޅުވީ ކައުންސިލަރުން އިސްތިއުފާ ދެއްވާފައިވާކަން ލޯކަލް ގަވަރުމަންޓް އޮތޯރިޓީ (އެލްޖީއޭ) އިން ކޮމިޝަނަށް އެންގުމާ އެކު ބައި-އިލެކްޝަން ބާއްވާނެ ތާރީހެއް މާލަސްތަކެއް ނުވެ އިއުލާން ކުރާނެ ކަމަށެވެ. އިލެކްޝަންސް ކޮމިޝަނުން ތައްޔާރުވަނީ އަންނަ އަހަރުގެ ޖެނުއަރީ ކުރީކޮޅު ބައި-އިލެކްޝަން ބޭއްވުމަށެވެ.
މާލެ ސިޓީ ކައުންސިލްގައި މޭޔަރާއެކު 19 މެންބަރުން ތިއްބަވައެވެ. ހުސްވެފައިވާ މޭޔަރުގެ މަގާމަށް މިހާތަނަށް ޝައުގުވެރިކަން ފާޅުކޮށްފައިވަނީ ނިމިދިޔަ ސަރުކާރުގެ ޔޫތު މިނިސްޓަރާއި، ކުރީގެ ބަންޑާރަނައިބް އާއިޝަތު އާޒިމާ ޝަކޫރާއި، ކުރީގެ ކޮމިޝަނާ އޮފް ޕޮލިސް ހުސައިން ވަހީދުއެވެ.
