އިންޑިއާއި ރާއްޖޭގެ ސަލާމަތާއި ރައްކާތެރިމާއި ގުޅޭގޮތުން އިތުރަށް ގުޅުން ބަދަހި ކުރުމަށް އިންޑިއާއިން ބޭނުންވާކަމުގައި އެގައުމުގެ ދިފާޢީ ވަޒީރު ރަޖްނަތު ސިންގް ވިދާޅުވެއްޖެއެވެ.
ރަޖްނަތު ސިންގް މިހެން ވިދާޅުވީ، މިމަހުގެ 17 ވަނަ ދުވަހު ރާއްޖޭގެ ރައީސްކަމުގެ ހުވާކުރެއްވި ޑރ. މުއިއްޒުގެ ކެބިނެޓް ޑިފެންސް މިނިސްޓަރުކަމަށް އައްޔަން ކުރެއްވި ޢައްސާން މައުމޫނަށް މަރުހަބާ ވިދާޅުވެ ކުރެއްވި ޓުވީޓެއްގައެވެ.
މި ޓުވީޓުގައި ރަޖްނަތު ސިންގް ވިދާޅުވެފައިވަނީ އަލަށް ރާއްޖޭގެ ޑިފެންސް މިނިސްޓަރުކަމަށް އައްޔަން ކުރެވުނު ޢައްސާން މައުމޫނަށް މަރުހަބާ ވިދާޅުވާ ކަމަށާއި، ގޮންޖެހުންތަކާ ކުރިމަތިލާ، ސަލާމަތީ ކަންކަމުގައި ގުޅިގެން މަސައްކަތް ކުރުމަށް އިންޑިއާއިން ބޭނުންވާ ކަމުގައެވެ.
ރައީސް މުއިއްޒު ވެރިކަމުގެ ހުވާ ކުރެއްވުމަށްފަހު، ރައްޔިތުންގެ މަޖިލިހުގެ މެމްބަރުންނާ މުޚާތަބްކޮށް ވާހަކަ ދައްކަވަމުން ވިދާޅުވެފައިވަނީ ބޭރުގެ އެއްވެސް ގައުމެއްގެ ސިފައިން ރާއްޖޭގައި ނުބައިތިއްބާނެ ކަމުގައެވެ. އަދި އެމަނިކުފާނުން "ހަފްތާ 14″ގެ ނަމުގައި ނެރުއްވި 100 ދުވަހުގެ މަގު ޗާޓުގައި އެންމެ ފުރަތަމަ ހާސިލްކުރާ ކަމެއްގެ ގޮތުގައި ހިމަނާފައިވަނީ ރާއްޖޭގައި ތިބި އިންޑިއާ ސިފައި ބޭލުމުގެ މަސައްކަތް ފުރަތަމަ ދުވަހު ފެށުމަށެވެ.
އެހެންނަމަވެސް ރައީސް މުއިއްޒު ވިދާޅުވެފައިވަނީ ރާއްޖެއަކީ އިންޑިއާއި ދެކޮޅު ގައުމެއް ނޫން ކަމަށާއި، ދުނިޔޭގެ ހުރިހާ ގައުމަކާއެކީވެސް ރާއްޖެއިން ގުޅުން ބާއްވާނެ ކަމަށެވެ. އަދި ވިދާޅުވެފައިވަނީ އެމަނިކުފާނުގެ ސިޔާސަތަކީ "ޕްރޯ މޯލްޑިވްސް" ސިޔާސަތެއް ކަމުގައެވެ.
ރައީސް މުއިއްޒުގެ ހުވާ ކުރުމުގެ ރަސްމިއްޔާތަށް އިންޑިއާގެ ބޮޑުވަޒީރު ވަޑައިގެންފައި ނުވިނަމަވެސް، މޯދީގެ ޚާއްސަ މަންދޫބެއްގެ ހައިސިއްޔަތުން އިންޑިއާގެ ސައިންސް މިނިސްޓަރު މުއިއްޒު ހުވާކުރުމުގެ ރަސްމިއްޔާތުގައި ބައިވެރި ވެފައި ވެއެވެ.
