ދެގައުމުގެ ގުޅުންހުރި މައްސަލަތަކުގައި އެކުގައި މަސައްކަތްކޮށް ހައްލުކުރައްވަން ބޭނުންފުޅުވާކަމުގައި ރާއްޖޭގެ އައު ފޮރިން މިނިސްޓަރ މޫސާ ޒަމީރު، އިންޑިއާގެ އެކްސްޓަރނަލް އެފެއަރޒް މިނިސްޓަރ ޑރ. ސުބްރަމާނިއަމް ޖައިޝަންކަރަށް ދަންނަވައިފިއެވެ.
ފޮރިން މިނިސްޓަރ މިފަދައިން ދެންނެވީ ފޮރިން މިނިސްޓަރުކަމުގެ މަޤާމަށް މޫސާ ޒަމީރު އައްޔަންކުރެއްވުމާއި ގުޅިގެން މަރުހަބާއާއި ތަހުނިޔާ ދަންނަވައި ޖަޔަޝަންކަރު ކުރެއްވި ޓްވީޓަށް ދެއްވި ޖަވާބުގައެވެ.
މިނިސްޓަރ ޒަމީރަށް މަރުހަބާ ދަންނަވައި ޖަޔަޝަންކަރު ވިދާޅުވީ، ގާތުން މަސައްކަތް ކުރެއްވަން އުއްމީދުކުރައްވާކަމަށެވެ.
އެ ވާހަކަފުޅަށް ދެއްވި ރިޕްލައިގައި މިނިސްޓަރ ޒަމީރު ވިދާޅުވީ ދެ ގައުމުގެ މަސްލަހަތު އޮތް ކަންކަމާއި ކަންބޮޑުވުން ހުރި ކަންކަމުގައި ގުޅިގެން މަސައްކަތް ކުރައްވަން ހުންނެވި ކަމަށެވެ.
އަޅުގަނޑު އިންތިޒާރު ކުރަނީ، ދެ ގައުމާ ގުޅުން ހުރި މައްސަލަތަކާއި ކަންބޮޑުވާ މައްސަލަތަކުގައި ތިޔަ ބޭފުޅުންނާ އެކު މަސައްކަތް ކުރުމަށާއި އަޅުގަނޑުމެންގެ ދެ ގައުމުގެ ރައްޔިތުންގެ ލާބައަށްޓަކައި ދެ ގައުމުގެ މެދުގައިވާ ޒަމާންވީ ގުޅުން އަލުން ފާހަގަކޮށް ކުރިއެރުވުމަށް،.
– މިނިސްޓަރ ޒަމީރު ލިޔުއްވާފައިވެއެވެ.
އިންޑިއާ ސަރުކާރުންވެސް ރާއްޖެއާއެކު މަސައްކަތްކުރުމަށް ތައްޔާރަށް ހުރިކަން ހާމަކޮށްފައިވާއިރު، މިސަރުކާރަށް އައްޔަންކުރެވުނު ބޭފުޅުން ވިދާޅުވަމުން އައީ ރައީސް ޞާލިޙްގެ ސަރުކާރުން އިންޑިއާއަށް ބަރޯސާވެ، ރާއްޖޭގެ މިނިވަންކަމައި އިސްތިގްލާލަށް އުނިކަން އައިސްފައިވާކަމަށެވެ.
ރާއްޖޭގައި ޤާއިމްވެތިބި އިންޑިއާ ސިފައިން ޤައުމުން ބޭރުކުރުމަކީ އައު ސަރުކާރުގެ ވަޢުދެކެވެ. އެކަން ކުރާނީ ޑިޕްލޮމެޓިކް އުސޫލުންކަމަށް އައު ސަރުކާރުން ހާމަކޮށްފައިވެއެވެ.
