މިއަދު ރާއްޖޭގެ ރައީސްކަމައި ހަވާލުވެވަޑައިގަންނަވާ ޑރ. މުއިއްޒު ރައީސްކަމުގެ ހުވާކުރައްވާ ރަސްމިއްޔާތަށް ރައީސް ސާލިހުގެ ދެކަނބަލުން ވަޑައިގެންފިއެވެ.
ސަރުކާރުގެ އިސް އޮފިޝަލަކު "ޚަބަރު އޮންލައި"އަށް މައުލޫމާތު ދީފައިވާ ގޮތުގައި މިއަދު ހަވީރު ބޭއްވުމަށް ހަމަޖެހިފައިވާ އާ ރައީސް ހުވާކުރައްވާ ރަސްމިއްޔާތަށް ވަޑައިގަތުމަށް ރައްޔިތުންގެ މަޖިލިހުން ފޮނުއްވި ދައުވަތު ރައީސް ސާލިހު ވަނީ ގަބޫލުފުޅު ކުރައްވާފައެވެ.
އެހެންނަމަވެސް ޑރ. މުއިއްޒު ހުވާކުރައްވާ ރަސްމިއްޔާތުގައި އެމަނިކުފާނު ވެރިކަމަށް ގެނައުމަށް އެންމެ އެހީތެރިވެދުން ކުރީގެ ރައީސް ޔާމިން ބައިވެރިވެވަޑައި ނުގަންނަވާނެއެވެ.
މުއިއްޒު ހުވާ ކުރައްވާ ރަސްމިއްޔާތުގައި ޔާމީން ބައިވެރިވެވަޑައިނުގަތުމަށް ނިންމެވީ އެ ރަސްމިއްޔާތުގައި ބައިވެރިވެވަޑައިގަތުމަށް ރައްޔިތުންގެ މަޖިލިހުގެ އިދާރާ އިން އެމަނިކުފާނަށް ދައުވަތު ވެސް ފޮނުއްވާފައި ވަނިކޮށެވެ.
ޔާމީން އެގޮތަށް ނިންމެވީ ޖިނާއީ ކުށެއް ސާބިތުވެފައިވާ މީހަކު އެފަދަ ކަރާމާތްތެރި އައި ހައިބަތު ބޮޑު ޖަލްސާއެއްގައި ބައިވެރިވުމަކީ އެ ޖަލްސާގެ ކަރާމާތާއި ހައިބަތަށް އުނިކަން ލިބޭނެ ކަމެއް ކަމަށް އެމަނިކުފާނަށް ފެނިވަޑައިގަންނަވާތީކަމަށް އެމަނިކުފާނުގެ ގާނޫނީ ޓީމުގެ ފަރާތުން ވިދާޅުވެފައި ވެއެވެ.
އަދި އެއީ ތަހުޒީބީ މުޖުތަމައުތަކުގައި ވެސް ގަބޫލު ކުރާ އުސޫލުތަކާ ހިލާފު ކަމެއް ކަމަށް ފެނިވަޑައިގަންނަވާތީ އެ ރަސްމިއްޔާތުގައި ބައިވެރިވެވަޑައިނުގަތުމަށް ނިންމަވައި ޔާމީންގެ ފަރާތްޕުޅުން އެކަން މަޖިލިހުގެ ރައީސް މުހައްމަދު އަސްލަމަށް ދަންނަވާފައިވާ ކަން އެނގިފައިވެއެވެ.
ރާއްޖޭގެ ދެވަނަ ޖުމުހޫރިއްޔާގެ 8 ވަނަ ރައީސްކަމާއި ޑރ. މުއިއްޒު ހަވާލުވެވަޑައިގަންނަވާނީ މިއަދު ހަވީރު 4:45 ގައި ޖުމުހޫރީ މައިދާނުގައި ބާއްވާ ޚާއްސަ ރަސްމިއްޔާތެއްގައެވެ.
ކޮމެންޓު ފޮނުވާ