ރާއްޖޭގެ އިގްތިސާދު އޮތީ ވަރަށް ނާޒުކު ހާލަތެއްގައި ކަމަށާއި، ރައީސް ސޯލިހްއާއި އެމްޑީޕީ ދައުރު މި ނިންމަމީ މަދޫން ނޫނީ ރާއްޖޭގެ ވެރިކަމެއްގައި ޚަޒާނާ ދަތި ނުވާ މިންވަރާ ދަތި ކޮފައި ކަމުގައި ރައްޔިތުންގެ މަޖިލިހުގެ ކުރީގެ ރައީސް މުހައްމަދު ނަޝީދު ވިދާޅުވެއެވެ.

މިއަދު ރާއްޖޭގެ ރައީސްކަމުގެ ހުވާ، ޑރ. މުއިއްޒު ކުރެއްވުމަށް ކުޑަ ވަގުތުކޮޅަކަށް ވެފައިވަނިކޮށް ނަޝީދު ކުރެއްވި ޓުވީޓެއްގައި ވިދާޅުވެފައިވަނީ، "އަޅުގަޑުމެން މިތިބީ ވަރަށް ނާޒުކު ފައްތަރެއްގައި" ކަމުގައެވެ. އަދި ނަޝީދު ވިދާޅުވީ ޑރ. މުއިއްޒަށްވެސް އެހާއަވަހަށް ބަޖެޓް ސަޕޯޓު ހޯދަން ދަތިވާނެކަމަށާއި، ކުރިޔަށް އޮތް ޑިސެމްބަރުމަސް ވާނީ ވަަރށް ދަތި މަހަކަށް ކަމުގައެވެ.

Raees Solih aai MDP dhauru mi ninmanee madhun noonee Dhivehi verikameh Dhivehi khazaanaa ah dhathi nuvaa minvarah dhathi kohfai. Alhugadumen mithibee varah naazuku fahtharehgai. Dr. Muizzu ahves avahah budget support hoadhaan dhathi vaane. December vaanee undhagoo mahakah.

— Mohamed Nasheed (@MohamedNasheed) November 17, 2023

ފިނޭންސް މިނިސްޓްރީގެ ތަފާސްހިސާބުތައް ދައްކާ ގޮތުން، ދައުލަތުގެ ދަރަނި މި ވަގުތު ހުރީ 108 ބިލިއަން ރުފިޔާގަ އެވެ. ވޯލްޑް ބޭންކުން އެ ލަފާކުރާ ގޮތަށް ދަރަނި ޖީޑީޕީގެ ނިސްބަތުން 115 ޕަސެންޓަށް އަރައިފި ނަމަ ދައުލަތުގެ ދަރަނި އެ އަށް ވުރެ ވެސް އިތުރުވާނެ އެވެ. ދައުލަތުގެ ދަރަނީގެ ތެރެއިން 49 ބިލިއަން ރުފިޔާ އަކީ ބޭރުގެ ދަރަންޏެވެ. އެތެރޭގެ ދަރަންޏަކީ 59 ބިލިއަން ރުފިޔާ އެވެ.

ދައުލަތުގެ ޚަރަދުތައް ހަމަޖެއްސުމަށްޓަކާ ސަރުކާރުން ވަނީ 6.5 ބިލިއަން ރުފިޔާގެ ސަޕްލިމެންޓްރީ ބަޖެޓެއް ރައްޔިތުންގެ މަޖިލިހަށް ހުށަހަޅާފައެވެ. އަންނަ އަހަރަށް ލަފާކޮށް ސަރުކާރުން ރައްޔިޔތުންގެ މަޖިލިހަށް ހުށަހަޅާފައިވަނީ 42.8 ބިލިއަން ރުފިޔާގެ ބަޖެޓެކެވެ.