ރައީސުލްޖުމުހޫރިއްޔާގެ ނައިބު ފައިސަލް ނަސީމު، ނާއިބު ރައީސްގެ ރަސްމީ ގެކޮޅު، ހިލާލީގެ ދޫކުރައްވައިފިއެވެ.
ފައިސަލް ނަސީމު ހިލާލީގެއަށް ބަދަލުވެވަޑައިގެންނެވީ ރައީސް ސާލިހު 2018 ވަނަ އަހަރު ރައީސް ސާލިހު ވެރިކަމުގެ ހުވާ ކުރެއްވުމަށްފަހު ދެ މަހެއްހާ ދުވަސް ފަހުން، 2019 ވަނަ އަހަރުގެ ޖެނުއަރީމަހުގެ 7 ވަނަ ދުވަހުއެވެ.
ނާއިބު ރައީސް ހިލާލީގެ ދޫކޮށްލެއްވީ އިއްޔެ ހަވީރުގެ ވަގުތެއްގައެވެ. ރައީސް ސާލިހުވެސް ވަނީ ފާއިތުވި ހަފްތާގައި މުލިއާގެ ދޫކުރައްވާފައެވެ. ރައީސް ސާލިހުއާއި ނާއިބު ރައީސް ފައިސަލް ނަސީމުއާއި ދެބޭފުޅުންގެ ރިޔާސީ ދައުރު ހަމަވާނީ މާދަމާ އާ ރައީސް މަގާމުގެ ހުވާކުރައްވާ ވަގުތުން ފެށިގެންނެވެ.
ހިލާލީގެއަކީ ރާއްޖޭގެ ނައިބު ރައީސްގެ ރަސްމީ ގެކޮޅެވެ. ރައީސް ޔާމިންގެ ފުރަތަ ނައިބު ރައީސް ޑރ. ޖަމީލް އެގޭގައި ދިރިއުޅުއްވާފައިވާއިރި، އޭގެ ކުރިން ރައީސް ނަޝީދުގެ ނާއިބު ރައީސް ޑރ. ވަހީދުވެސް އެގޭގައި ދިރިއުޅުއްވާފައި ވެއެވެ. އަދި ނަޝީދު މަގާމުން އިސްތިއުފާ ދެއްވާ ރައީސްކަމާއި ހަވާލުވެވަޑައިގެންނެވުމަށްފަހުވެސް ދިރިއުޅުއްވާފައިވަނީ ހިލާލީ ގޭގައެވެ.
ދެން ހިލާލީގޭގައި ދިރިއުޅުއްވާނީ އާ ރައީސް ޑރ. މުއިއްޒުގެ ނާއިބު ރައީސް ހުސެއިން މުހައްމަދު ލަތީފު، ސެމްބެ އެވެ.
