އިންތިގާލީ އިންސާފުގެ އޮފީހަށް އޭސީސީގެ ޓީމަކުން ވަދެއްޖެއެވެ.
"ޚަބަރު އޮންލައިން"އަށް މައުލޫމާތު ލިބިފައިވާ ގޮތުގައި އިންތިގާލި އިންސާފުގެ އޮފީހަށް އޭސީސީން ވަދެފައިވަނީ އެއޮފީހުން ކުރިން ނިންމާފައި ހުރި ބައެއް ނިންމުންތައް ބަދަލުކުރާކަމުގެ ތުހުމަތުތަކާ އެކީއެވެ.
އޭސީސީން އޮމްބަޑްސްޕާސަން އޮފީހުގެ މައްސަލަތަކެއް ތަހުގީގުކުރަމުން އަންނަކަމަށް ބުނިނަމަވެސް އެއީ ސީދާ ކޮން މައްސަލަތަކެއް ކަމެއް ހާމަކޮށްފައެއް ނުވެއެވެ.
އެނގިފައިވާ ގޮތުގައި އޮމްބަޑްސްޕާސަން އޮފީހުގެ އިސްވެރިންވަނީ އޭސީސީއަށް އެއްބާރުލުން ނުދިނުމަށް އަންގާފައެވެ. އަދި އެ އޮފީހުގެ ކޮޓަރިތައް ހުޅުވައި ނުދީ، އެތައްތަނަށް ވަނަ ނުދިނުމަށްވެސް ވަނީ އަންގާފައެވެ. އެހެންނަމަވެސް އެސީސީގެ ތަހުގީގަށް އެއްބާރުލުން ނުދިނުމަށް އެންގި ސަބަބެއް ސާފުވެފައެއް ނުވެއެވެ.
މީގެ ދެދުވަސްކުރިން އެ އޮފީހަށް ބޮޑެތި ތުހުމަތުތަކެއް ކޮށް، އެ އޮފީހުގެ އޮމްބަޑްސްޕާސަން ޖިހާދާ އަނީސް ވަނީ އިސްތިއުފާ ދެއްވައިފައެވެ. އޭނާވަނީ އެ އޮފީހުގެ މަސައްކަތްތައް ކުރިޔަށްދާ ގޮތާމެދު ކަންބޮޑުވުން ފާޅު ކުރައްވާފައެވެ.
ސަރުކާރު ބަދަލުވުމުގެ މަރުހަލާގައި އޮތް މިދުވަސްކޮޅު އޭސީސީގެ ޓީމުތަކުން ދަނީ ސަރުކާރުގެ ބައެއް އޮފީސްތަކަށް ވަދެ، ތަހުގީގަށް ބޭނުންވާ ބައެއްތަކެތި އެތަންތަނުން ފުލުހުންގެ ބެލުމުގެދަށަށް ގެންދަމުންނެވެ. އެގޮތުން މިހަފްތާގައި ފުލުހުންވަނީ އާރުޑީސީއަށް ވަދެއް ފުލުހުންގެ ތަހުގީގަށް ބޭނުންވާ ބައެއް ލިޔެކިޔުންތައް ފުލުހުންގެ ބެލުމުގެދަށަށް ގެންގޮސްފައެވެ.
