އިންތިޚާބީ ރައީސް ޑރ. މުހައްމަދު މުއިއްޒު ފާއިތުވި ރިޔާސީ ކެމްޕޭންގައި ދެއްކެވި ހުރިހާ ވާހަކަފުޅުތަކެއް ހިމަނައިގެން ދައްޔާރު ކޮށްފައިވާ ފޮތެއް މާދަމާ ނެރޭގޮތަށް ހަމަޖައްސައިފިއެވެ.
މިކަން ހާމަކޮށްފައިވަނީ ރާއްޖޭގެ ނޫސްވެރިންނާއި ބައްދަލުކޮށް ޑރ. މުއިއްޒު ރޭ ދެއްކެވި ވާހަކަފުޅުގައެވެ.
ރޭ ސޯޝަލް ސެންޓަރުގައި ނޫސްވެރިންގެ ގުންޒަރުގެ ނަމުގައި ބޭއްވި ޚާއްސަ ހަފްލާގައި ވާހަކަ ދައްކަވަމުން ޑރ. މުއިއްޒު ވިދާޅުވީ އެމަނިކުފާނުގެ ސަރުކާރެއްގައި ފޮރުވާނެ އެއްވެސް ކަމެއް ނޯންނާނެ ކަމަށާއި، އިންތިޚާބުގައި ދެއްކެވި ހުރިހާ ވާހަކައެއް ހިމެނޭ ފޮތެއް ނެރުއްވުމަށް ގަސްތު ކުރެއްވި ސަބަބަކީވެސް މިއީ ކަމުގައެވެ. އަދި ރައްޔިތުންނަށް ފޮރުވަންޖެހޭ އެއްވެސް ކަމެއް އޮވެގެން ނުވާނެކަމުގައިވެސް ޑރ. މުއިއްޒު ވިދާޅުވިއެވެ.
ފުރަތަމަ ދުވަހު، ކެނޑިޑޭޓަކަށް ވުމަށްޓަކައި ފޯމު ލީ ދުވަހު ނުކުމެ ނޫސްވެރިންނާ ދެއްކި ވާހަކައިން ފެށިގެން، ދެބުރުގައި ދެއްކި ހުރިހާ ވާހަކައެއް، ހުރިހާ ރަށަކަށް ގޮސް، ހުރިހާ ތަނެއްގަ ދެއްކި ހުރިހާ ވާހަކައަކާ، އަދި އިންތިހާބު ކާމިޔާބުވެގެން މިތަނުގައި ބޭއްވި ޖަލްސާގައި ދެއްކި ވާހަކައާ ހަމައަށް ހުރިހާ ވާހަކައެއް އަކުރުން އަކުރަށް ލިޔެފައިވާ ފޮތެއް، އެ ފޮތުގައި އަދި ހުރިހާ ވައުދެއް ވެސް ހިމަނާފަ، ފޮތެއް އެބަ ނެރެން. އެއްވެސް ކަމެއް ފޮރުވަން ބޭނުން ނުވާތީ. އެ ފޮތުން ފެނިވަޑައިގަންނަވާނެ ހުރިހާ ވާހަކައެއް.
ރޭގެ ހަފްލާގައި ވާހަކަ ދައްކަވަމުން ޑރ. މުއިއްޒު ވިދާޅުވިއެވެ.
ޑރ. މުއްއިޒު ވިދާޅުވީ އެމަނިކުފާނާ ޓީމު ނިކުންނަނީ އެ ފޮތުގައިވާ ވައުދުތައް ފުއްދުމަށް ކަމުގައެވެ.
