ރައްޔިތުންގެ މަޖިލިހުގެ ރައީސްކަމުގެ މަގާމުން ނަޝީދު ވަކިކުރުމަށް ބާއްވާ ޖަލްސާ މިއަދު ހަވީރު 4:00 އަށް ތާވަލް ކޮށްފިއެވެ. މިއަދު ހަވީރަށް ޖަލްސާ ތާވަލްކޮށް، މަޖިލީހުން މިހާރުވަނީ މެމްބަރުންނަށް ނޯޓިސްވެސް ފޮނުވާފައެވެ.
މިއަދު ހަވީރަށް ނަޝީދު މަގާމުން ވަކިކުރާ ޖަލްސާ ތާވަލް ކޮށްފައިމިވަނީ މިއަދު ހެނދުނު އޮތް ޖަލްސާގެ ރިޔާސަތުން ނައިބު ރައީސް އީވާ ފައިބައިވަޑައިގެން އިންނަވާ، ބަޖެޓްސާ ނިމުނުކަން އިއުލާނު ނުކުރެއްވުމުންނެވެ.
އަދި މި ޖަލްސާ ތާވަލް ކޮށްފައި މިވަނީ ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެ މަގާމުން ވަކިކުރަން އެމްޑީޕީން ހުށަހަޅާފައިވާ ގަރާރާ ގުޅޭ ގޮތުން އެޓާނީ ޖެނަރަލް އިބްރާހިިމް ރިފްއަތު ދެއްވި ލަފާ އަމީންއާންމު ފާތިމަތު ނިއުޝާ އަށް އެންގުމަށް މަޖިލީހުގެ އާންމު ކޮމިޓީން މިއަދު ފާސްކޮށްފައި ވަނިކޮށްވެސް މެއެވެ.
އާންމު ކޮމިޓީން މި ގޮތަށް ނިންމީ މަޖިލީހުގެ ރައީސް ނަޝީދު މަގާމުން ވަކިކުރުމުގެ ގަރާރު ކުރިއަށް ގެންދަން އިއްޔެއަށް އެޖެންޑާކުރި ދެ ޖަލްސާގައިވެސް ގަރާރު ކުރިއަށް ނުގެންގޮސް ރިޔާސަތުން ޖަލްސާ ނިންމާލާފައިވަނިކޮށެވެ. އެގޮތުން އިއްޔެގެ ފުރަތަމަ ޖަލްސާ އެޖެންޑާކުރީ ހެނދުނު 9:00 އަށެވެ.
Miadhu haveeru 4.00 ah ithubaaru neiy massala agenda kurevijje. pic.twitter.com/3ZJYFuVaaN
— 𝐌𝐏 𝐑𝐨𝐳𝐚𝐢𝐧𝐚 𝐀𝐝𝐚𝐦 (@Roxeyna) November 13, 2023
މަޖިލީހުގެ ރައީސް ނަޝީދު މަގާމުން ވަކިކުރުމުގެ ގަރާރު ހުށަހަޅާފައިވަނީ މަޖިލީހުގެ ގަވާއިދާ ހިލާފަށް ކަމަށް ވިދާޅުވެ އެ ޖަލްސާގައި ދަ ޑިމޮކްރެޓްސްގެ ޕީޖީ ލީޑަރު އަދި މެދު ހެންވޭރު ދާއިރާގެ މެންބަރު އަލީ އާޒިމް ނެންގެވި ނިޒާމީ މައްސަލަ ބަލައިގަންނަ ކަމަށް ވިދާޅުވެ ޖަލްސާގެ ރިޔާސަތުގައި އިންނެވި ހަސަން އަފީފު ވަނީ ގަރާރު ބޭރުކޮށްލާފައެވެ.
މަޖިލީހުގެ މިއަދުގެ ޖަލްސާގެ ރިޔާސަތު ބަލަހައްޓަވަމުން ގެންދެވި މަޖިލީހުގެ ނައިބު ރައީސް އީވާ ވިދާޅުވީ މަޖިލީހުގެ ކުޑަ ދަށުގައި މެމްބަރުން ތިއްބެވި ކަމަށާއި، ކޯރަމް ބެލް ޖެހުމުންވެސް ތަޅުމަށް މެމްބަރުން ހާޒިރުނުވުމުން ޖަލްސާގެ ކޯރަމް ހަމަވެފައި ނުވާ ކަމަށެވެ. އެހެންނަމަވެސް ކޯރަމް ހަމަވޭތޯ މަޑުކުރައްވާނެ ކަމަށާއި، ކޯރަމް ބެލް ޖަހައިގެން ކޯރަމް ހަމަވޭތޯ މަސައްކަތް ކުރައްވާނެ ކަމަށެވެ.
އީވާ ވިދާޅުވީ މަޖިލީހަށް ބަޖެޓް ހުށަހަޅާ ބަޖެޓްގެ މަސައްކަތް ކުރިއަށް ގެންދިއުމަށް ޤާނޫން އަސާސީއާއި، މާލިއްޔަތުގެ ޤާނޫނާއި، މަޖިލީހުގެ ޤަވާއިދުންވެސް ލާޒިމްކުރާ ކަަން މަޖިލީހުގެ މެމްބަރުންނަށްވެސް އެނގިވަޑައިގަންނަވާ ކަމަށެވެ. އަދި މަޖިލީހުގައި ބަޖެޓްގެ މަސައްކަތް ކުރިއަށްގޮސް ނިންމާ ނުލެވިއްޖެނަމަ ކުރިއަށް އޮތް ސަރުކާރަށް އެތައް ދަތިތައް ކުރިމަތިވާނެ ކަމަށެވެ. މިދަތިތައް ކުރިމަތވާނީ ސަރުކާރަށް އެކަނި ނޫން ކަމަށް ހާމަކުރައްވަމުން އީވާ ވިދާޅުވީ ތަރައްޤީގެ ހުރިހާ މަޝްރޫއަކާއި، އަމިއްލަ ރައްޔިތުންނާއި ރައްޔިތުންގެ ވިޔަފާރިތަކަށް ކުރާ ހުރިހާ މަސައްކަތެއްވެސް ގުޅިފައިވަނީ ދައުލަތުގެ ބަޖެޓާ ކަމަށެވެ.
އަދި ސުޕްރީމް ކޯޓުން ނިމުނު ހަފްތާގައި ކުރެއްވި ހުކުމުގައިވެސް އިތުބާރު ނެތް ކަމުގެ މައްސަލައެއް ލާފައ އޮތް ނަމަވެސް މަޖިލީހުގައި ކޮންމެ ކުރަންޖެހޭ ކަންކަން ކުރަން ޖެހޭނެކަން ވަރަށް ސާފުކޮށް އެނގެން އޮތް ކަމަށެވެ. އަދި ދައުލަތުގެ ބަޖެޓް ކުރިއަށް ގެންދަންޖެހޭ ކަމަށް ސުޕްރީމް ކޯޓުގެ ހުކުމުންވެސް ލާޒިމްވާ ކަމަށް އީވާ ވިދާޅުވިއެވެ.
ޖަލްސާ މެދު ކަނޑުއްވާލައްވަމުން އީވާ ވިދާޅުވީ ޖަލްސާ ނިންމާ ނުލައްވާނެ ކަމަށާއި މެމްބަރުން ހަމަކޮށްގެން ޖަލްސާ ކުރިއަށް ގެންދެވޭތޯ މަސައްކަތް ކުރައްވާނެ ކަމަށެވެ. މިއަދު ނަޝީދު ވަކި ކުރުމަށް ބޭއްވި ޖަލްސާގައިވެސް ރިޔާސަތުގައި އީވާ އިނުމުން ޖަލްސާ ކުރިއަށް ގެންދިއުމަށް ޖާގަ ނުދީ އެމްޑީޕީ މެމްބަރުން ވަނީ މިއަދުވެސް މަޖިލިހުގެ ފްލޯގައި އިހުތިޖާޖު ކޮށްފައެވެ.
