1992 ވަނަ އަހަރު ރިލީޒްކުރި ބޮލީވުޑްގެ ފިލްމު "ބާޒީގަރް" ގެނެސްދިންތާ 30 އަހަރު ފުރުން ފާހަގަ ކޮށްފިއެވެ. އެ ފިލްމަށް 30 އަހަރު ފުރުމުގެ މުނާސަބަތުގައި އެފިލްމުގެ ލީޑު ކާޖޮލް މިވަނީ އޭގެ ހަނދާންތައް އާކޮށްފަ އެވެ.
ފޮޓޯތަކަކާ އެކީ ސޯޝަލް މީޑިއާގައި މިހާރު އުމުރުން 49 އަހަރުގެ ބަތަލާ ބުނީ ނޮވެމްބަރު 12، 1993 ގައި ރިލީޒްކުރި ފިލްމުގެ ޝޫޓިން ފެށި އިރު އޭނަގެ އުމުރަކީ 17 އަހަރު ކަމަށެވެ. ކާޖޮލްގެ ފުރަމަ ފިލްމަކީ 1992 ގެ "ބޭހުދީ" އެވެ.
އިންސްޓަގްރާމްގައި ކާޖޮލް ކުރި ޕޯސްޓެއްގައި އޭނާ ބުނެފައިވަނީ "ބާޒީގަރް"އަކީ ހަނދާނުން ފުހެލަން ދަތި ފިލްމެއް ކަމަށާއި އެއީ އެތައް ތަރިންނަކާއެކު ފުރަތަމަ ފަހަރަށް މަސައްކަތް ކުރަން ލިބުނު ފުރުސަތު ކަމަށް ބުނެފަ އެވެ.
އައްބާސް-މަސްތާން ޑައިރެކްޓްކުރި ރޮމޭންޓިކް ތުރިލާ "ބާޒީގަރު" ގެ ހަނދާންތައް އާކުރަމުން ކާޖޮލް ބުނީ މި ފިލްމަކީ އޭނަ އަލަށް ޝާހްރުކް ޚާނާ ދިމާވި ފިލްމު ކަމަށެވެ. މި ފިލްމުގެ ބޮޑު ކާމިޔާބީ އަށް ފަހު، މި ދެ ތަރިން އެކީގައި ބޮޑެތި ބްލޮކްބަސްޓާތަކެއް ގެނެސްދިނެވެ. އެއާއި އެކުގައި މިދެތަރިން ވެފައި ވަނީ ބޮލީވުޑްގެ އެންމެ ކާމިޔާބު ޖޯޑު ކަމުގައިއެވެ.
ބާޒީގަރް ފިލްމަކީ އާއިލީ މައްސަލަތަކެއްގެ ތެރެއިން ބަދަލު ހިފުން ދައްކުވައިދޭ ފިލްމެކެވެ. އެކްޓަރު އަޖޭ ދޭވްގަންގެ އަންހެނުން ކާޖޮލް ބުނީ "ބާޒީގަރު" އަކީ އޭނަ އަލަށް ކޮރިއޯގްރާފަރު ސަރޯޖް ޚާންގެ އިތުރުން މިއުޒިކް ޑައިރެކްޓަރު އައްނޫ މަލިކާ އެކީ ވެސް މަސައްކަތްކުރަން ލިބުނު ފިލްމު ކަމަށެވެ. ކާޖޮލްގެ ޕޯސްޓްގައި ފިލްމުގައި އޭނަގެ ދައްތަގެ ރޯލު ކުޅުނު ޝިލްޕާ ޝެޓީ އާއި ކޮމީޑިއަން ޖޯނީ ލީވާގެ ނަން ވެސް ފާހަގަކޮށްފައިވެ އެވެ.
View this post on Instagram
"ބާޒީގަރް" އަކީ ބޮކްސް އޮފީހުގައި 29 މިލިއަން ޑޮލަރުގެ އާމްދަނީއެއް ހޯދި ފިލްމެކެވެ. މި ފިލްމު ހަދާފައި ވަނީ ހޮލީވުޑްގެ 1991 ގެ ފިލްމު "އަ ކިސް ބިފޯ ޑައިން" އަސްލަކަށް ބަލައިގެންނެވެ. "ބާޒީގަރް" ފިލްމު ވަނީ ދިވެހި ބަހުން ވެސް ރިމޭކް ކުރެވިފަ އެވެ. އަސްލަމް ރަޝީދު ޕްރޮޑިއުސްކޮށް "ހީލަތް"ގެ ނަމުގައި އުފެއްދި އެ ފިލްމުން ފެނިގެން ދިޔައީ ރީކޯ މޫސާ މަނިކުއާއި އައިޝަތު ޝިރާނީ އެވެ.
