ރައްޔިތުންގެ މަޖިލިހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ ރައްޔިތުންގެ މަޖިލިހުގައި ކުރިޔަށް ނުގޮސްގެން، މަސްލަހަތު ހިމެނޭ މެމްބަރަކަށް ނަޝީދު ވަކިކުރުމުގެ ޖަލްސާގައި ނީންނެވޭނެކަމަށް ދައުލަތުގެ ބަންޑާރަ ނައިބު ލަފާ ދެއްވާފައި ވަނިކޮށް، މިއަދުގެ ޖަލްސާއަށް ރައްޔިތުންގެ މަޖިލިހުގެ މާމިގިލީ ދާއިރާގެ މެމްބަރު ގާސިމް އިބުރާހިމް ވަޑައިގެންފިއެވެ.

ގާސިމް މިއަދުގެ ޖަލްސާއަށް ވަޑައިގެންނެވިއިރު، ގާސިމް ހިމެނިވަޑައިގަންނަވަނީ ސީނިއަރިޓީއަށް ބަލާ، ރިޔާސަތާއި ހަވާލުވެވޭ ބޭފުޅުންގެ ލިސްޓުގައި ހިމެނިވަޑައިގަންނަވާ މެމްބަރެއްގެ ގޮތުގައެވެ.

މަޖިލިހުގެ ރިޔާސަތާއި ހަވާލުވެވަޑައިގަންނަވަންޖެހޭ މެމްބަރުންގެ ތެރެއިން، މަޖިލިސް ރައީސް އަދި ނާއިބު ރައީސަށް ރިޔާސަތުގައި ނީންނެވޭނަމަ ދެން ރިޔާސަތުގައި އިންނަވަންޖެހެނީ ވިލިފުށީ ދާއިރާގެ މެމްބަރުން ހަސަން އަފީފެވެ. ހަސަން އަފީފަށް ރިޔާތުގައި ނީންނެވޭނަމަ ދެން ރިޔާސަތު ބަލަހައްޓަވަންޖެހޭ މެމްބަރުންގެ ލިސްޓުގައި ގާސިމް އިބުރާހިމްގެ ނަންވެސް ހިމެނެއެވެ.

ފަހަކަށް އައިސް ގާސިމް ޖަލްސާތަކަށް ވަޑައިގަންނަވަނީ ވަރަށް މަދުންނެވެ. އަދި އެމަނުކުފާނު ދިރިއުޅުއްވަނީވެސް އަމިއްލަފުޅު ރިސޯޓު ސަން އައިލޭންޑުގައެވެ.

މިހަފްތާގަ 3 ވަނަ ފަހަރަށް، ނަޝީދު ރިޔާސަތުން ދުރުކުރުމުގެ ޖަލްސާ ބޭއްވުމަށް ތައްޔާރުވަމުން ދާއިރު، ރައްޔިތުންގެ މަޖިލީހުގެ ރައީސް މަޤާމުން ވަކިކުރުމުގެ މައްސަލައެއް ބެލުމުގައި، ރިޔާސަތު ބެލެއްޓުމަށް ދެކޮޅު ހަދައި ނުވަތަ އުޒުރުވެރިވާ މެންބަރުންނާއި އަދި މަސްލަޙަތު ފުށުއަރާ އެއްވެސް ފަރާތެއް ރިޔާސަތުގައި ނުބޭންދުމުގެ މުޙިއްމުކަމަށް އިސްކަންދޭންޖެހޭނެ ކަމުގައި ވިދާޅުވެ ބަންޑާރަ ނައިބުވަނީ ރައްޔިތުންގެ މަޖިލިހަށް ގާނޫނީ ލަފާ ދީފައެވެ.

ރިއްފަތު މިހެން ވިދާޅުވީރައްޔިތުންގެ މަޖިލިހުގެ ރައީސް މުހައްމަދު ނަޝީދު ރިޔާސަތުން ވަކިކުރުމަށް މިހާރު މަޖިލިހަށް ހުށަހެޅިފައިވާ ގަރާރު އިތުރަށް ކުރިޔަށް ގެންދިއުމަށް ބަންޑާރަ ނައިބުގެ ލަފާ ހޯދުމަށް ރައްޔިތުންގެ މަޖިލިހުގެ އާންމު ކޮމިޓީން ނިންމާ އެމައްސަލާގައި ކުރިޔަށް ދާނެ ގޮތުގެ ލަފަޔަކަށް އެދުމާއި ގުޅިގެންނެވެ.

މިމައްސަލައާއި ގުޅޭގޮތުން ރިއްފަތު މިރޭ ކުރި ޓުވީޓުގައި 7 ނުކުތާއެެއް ފާހަގަ ކުރައްވާފައި ވެެއެވެ.

އެ ނުކުތާތަކަކީ:

‏1. މަޖިލީހުގެ ގަވާއިދުގެ 205 ވަނަ މާއްދާގައިވާ ގޮތުގެ މަތިން މަޖިލީހުގެ ރައީސް، މަޤާމުން ވަކިކުރުމުގެ ޤަރާރަކީ މަޖިލީހުގެ ގަވާއިދުގެ 168،167 އަދި 169ވަނަ މާއްދާގައި ބަޔާންކުރާ މެންބަރުން ހުށަހަޅާ 'ޢާންމު' ޤަރާރުތަކާ ގުޅިގެން ފުރިހަމަކުރަންޖެހޭ އިޖުރާއަތުތައް ހިނގާ ޤަރާރެއް ނޫން.

‏2. މަޖިލީހުގެ ރައީސް މަޤާމުން ވަކިކުރުމުގެ ޤަރާރުގައި ފުރިހަމަވާންޖެހޭ ހަމައެކަނި ޝަރުޠުތަކަކީ،ޖުމްލަ މެންބަރުންގެ ހަތަރުބައިކުޅަ އެއްބައި މެންބަރުންނަށްވުރެ މަދުނޫން މެންބަރުން، ލިޔެ، ސޮއިކޮށް، މައްސަލައެއްގެ ގޮތުގައި ހުށަހަޅާ ޤަރާރުގައި ވަކިކުރުމަށް ފެންނަ ސަބަބު.

‏3. މެންބަރަކު ޖަލްސާގައި ހުށަހެޅި ނިޒާމީ މައްސަލައަކާ ގުޅިގެން، މަޖިލީހުގެ ރައީސް މަޤާމުން ވަކިކުރުމުގެ ޤަރާރު، ރައްޔިތުންގެ މަޖިލީހުގެ ގަވާއިދުގެ ތެރެއިން ކުރިއަށް ނުގެންދެވޭނެކަމަށް މަޖިލީހުގެ ރިޔާސަތު ބަލަހައްޓާ ފަރާތުން ނިންމާފައިވަނީ މަޖިލީހުގެ ގަވާއިދާ ޚިލާފަށް.

‏4. ރައްޔިތުންގެ މަޖިލީހުގެ ޖަލްސާތަކަކީ ޤާނޫނުއަސާސީގެ 82 ވަނަ މާއްދާއާއި ރައްޔިތުންގެ މަޖިލީހުގެ ގަވާއިދުގެ 44 ވަނަ މާއްދާގައި ބަޔާންކުރާ ގޮތުގެމަތިން ހުއްޓުމެއްނެތި ކުރިއަށް ގެންދަންޖެހޭ ޖަލްސާތަކެއް.

‏5. ރައްޔިތުންގެ މަޖިލީހުގެ ރައީސް ވަކިކުރުމުގެ ޤަރާރު ހުށަހެޅުމަށް އެޖެންޑާ ކުރެވޭ ޖަލްސާއެއްގެ ރިޔާސަތު މަޖިލީހުގެ ރައީސްގެ ނުފޫޒު އޮތް މެންބަރަކު ބެލެހެއްޓުމަކީ މަޖިލީހުގެ ގަވާއިދުގެ 205 ވަނަ މާއްދާގެ (ބ) ގައި ބުނާ މަސްލަޙަތު ފުށުއެރުމުގެ އުޞޫލާ ދިމާ އިދިކޮޅު މާނަކުރުމެއް.

‏6. ރައްޔިތުންގެ މަޖިލީހުގެ ރައީސް މަޤާމުން ވަކިކުރުމުގެ މައްސަލައެއް ބެލުމުގައި، ރިޔާސަތު ބެލެއްޓުމަށް ދެކޮޅު ހަދައި ނުވަތަ އުޒުރުވެރިވާ މެންބަރުންނާއި އަދި މަސްލަޙަތު ފުށުއަރާ އެއްވެސް ފަރާތެއް ރިޔާސަތުގައި ނުބޭންދުމުގެ މުޙިއްމުކަމަށް އިސްކަންދޭންޖެހޭ.

‏7. މަޖިލީހުގެ ގަވާއިދުގެ 44 ވަނަ މާއްދާ ބުނާގޮތަށް ރިޔާސަތު ބެލެހެއްޓުމަށް ކަނޑައެޅިފައިވާ ތަރުތީބުން އަމީންޢާންމު މަޖިލީހުގެ ޖަލްސާގެ ރިޔާސަތު ބަލަހައްޓާނެ ފަރާތެއް ކަނޑައަޅައި، ޖަލްސާތައް ކުރިއަށް ގެންދިއުމަކީ ޤާނޫނުއަސާސީއާއި މަޖިލީހުގެ ގަވާއިދު ތަޞައްވުރުކުރާ ހަމައެކަނި ގޮތް.

ރިއްފަތުގެ ގާނޫނީ ލަފައާއެކު މިއަދުގެ ޖަލްސާގެ ރިޔާސަތު ބެލެހެއްޓުމުގެ ފުރުސަތު ދަޑިމޮކްރެޓްސްގެ ދެ މެމްބަރުން ކަމަށްވާ، މަޖިލިސް ނާއިބު ރައީސް އީވާއާއި ވިލިފުށީ ދާއިރޭގެ މެމްބަރު ހަސަން އަފީފަށް ލިބިގެންދާނޭކަމެއް އަދި ޔަގީނެއް ނުވެއެވެ.