އަންނަ އަހަރަށް ލަފާކޮށް ރައްޔިތުންގެ މަޖިލިހަށް ފޮނުވާފައިވާ 49.5 ބިލިއަން ރުފިޔާގެ ބަޖެޓުގެ މަސައްކަތް މަޖިލިހުގައި ނުނިމިއްޖެ ނަމަ، ދަތިވާނީ އާ ސަރުކާރާއި ރައްޔިތުންނަށް ކަމަށް މަޖިލިހުގެ ނައިބު ރައީސް އީވާ އަބްދުﷲ މިއަދު ވިދާޅުވެއްޖެއެވެ.
މަޖިލިހުގެ ވެބްސައިޓުގައި އާންމުކޮށްފައިވާ ގޮތުން މިއަދު ބާއްވަން ހަމަޖެއްސި ދެ ޖަލްސާގެ ތެރެއިން 9:00 ގައި ބާއްވަން އޮތް ޖަލްސާއަކީ އަންނަ އަހަރަށް ލަފާ ކުރާ ބަޖެޓު ހުށަހެޅުމަށާއި ސަޕްލިމެންޓްރީ ބަޖެޓު ހުށަހެޅުމަށް ބާއްވާ ޖަލްސާއެކެވެ. އެކަމަކު، ކޯރަމް ހަމަނުވެގެން ޖަލްސާ މިހާރު ވަނީ މެދުކަނޑާލައިފައެވެ.
ޖަލްސާ މެދުކަނޑާލުމުގެ ކުރިން މަޖިލިހުގެ ރިޔާސަތުގައި އިންނެވި އީވާ ވިދާޅުވީ ބަޖެޓުގެ މަސައްކަތް ކުރިއަށް ގެންދިއުމަށް ގާނޫނުއަސާސީ އާއި މާލިއްޔަތު ގާނޫނާއި މަޖިލިހުގެ ގަވައިދު ލާޒިމް ކުރާ ކަމަށެވެ. އަދި ބަޖެޓުގެ މަސައްކަތް ކުރިއަށް ގެންގޮސް ނުނިންމިއްޖެ ނަމަ، ވާނެ ދަތިތައް އެންމެންނަށް އެނގޭ ކަމަށް އީވާ ވިދާޅުވިއެވެ.
"ދަތިތައް ދިމާވާނީ ސަރުކާރަށް އެކަންޏެއް ނޫން. ބަޖެޓާ ގުޅިފައިވާނީ ތަރައްގީގެ ހުރިހާ މަޝްރޫއެއް. ބަޖެޓާ ގުޅިފައިވާނީ އަމިއްލަ ރައްޔިތުން، އަމިއްލަ ވިޔަފާރިތައް ކުރާ ހުރިހާ މަސައްކަތެއް ވެސް ގުޅިފައިވާނީ ދައުލަތުގެ ބަޖެޓާ،" އީވާ ވިދާޅުވިއެވެ.
އީވާ ވިދާޅުވީ އިތުބާރު ނެތް ކަމުގެ މައްސަލައެއް މަޖިލިހަށް ފޮނުވާފައި އޮތް ކަމުގައި ވިޔަސް، މިދިޔަ ހަފްތާގައި ސުޕްރީމް ކޯޓުން ކުރި ހުކުމްގައި މަޖިލިހުގައި ކޮންމެހެން ކުރަން ޖެހޭ ކަންކަން ވަރަށް ސާފުކޮށް އެނގޭނެ ކަމަށެވެ. އެގޮތުން އެއް ކަމަކަށް ދައުލަތުގެ ބަޖެޓުގެ މަސައްކަތް ކުރިއަށް ގެންދަން ޖެހޭނެ ކަމަށް ކޯޓުގެ ހުކުމުން ލާޒިމް ކުރާ ކަމަށް އީވާ ވިދާޅުވިއެވެ.
މާލިއްޔަތު ގާނޫނާއި މަޖިލީހުގެ ގަވައިދުގައިވާ ގޮތުން، ކޮންމެ އަހަރެއްގެ 1 ނޮވެމްބަރުގެ ކުރިން، އަންނަ އަހަރަށް ލަފާކޮށް ހުށަހަޅާ ބަޖެޓު ފިނޭންސް މިނިސްޓަރު މަޖިލީހަށް ހުށަހަޅަން ޖެހޭ އިރު، ގާނޫނުގައި ބުނާ މުއްދަތުގެ ކުރިން ފިނޭންސް މިނިސްޓަރު ވަޑައިގެން މަޖިލިހަށް ބަޖެޓު ހުށަހެޅުއްވުމަށް ދައުވަތު ދެއްވި ކަމަށް އީވާ ވިދާޅުވިއެވެ. އެކަމަކު، ބަންޑާރަ ނައިބު އިބްރާހިމް ރިފްއަތުގެ ލަފައާ އެކީގައި އަމީރު މަޖިލިހަށް ވަޑައިގެންނެވުމަށް ދެކޮޅު ހެއްދެވި ކަމަށް އީވާ ވިދާޅުވިއެވެ.
"ނަމަވެސް މި މައްސަލައާ ގުޅޭ މިދިޔަ ހަފްތާގެ ސުޕްރީމް ކޯޓުގެ ހުކުމުން ވަރަށް ސާފު ބަންޑާރަ މަނިކުފާނު ދެއްވާފައިވާ ލަފައަކީ ގޯސް ލަފައެއް ކަމަށް،" އީވާ ވިދާޅުވިއެވެ.
އީވާ ވިދާޅުވީ ޖަލްސާގެ ކޯރަމް ހަމަވޭތޯ ބަލަން މަސައްކަތް ކުރައްވާނެކަމަށެވެ. މީގެ އިތުރުން އީވާ ވިދާޅުވީ އަންނަ އަހަރަށް ލަފާކުރާ ދައުލަތުގެ ބަޖެޓާއި މި އަހަރުގެ ބަޖެޓަށް އިތުރުކުރާ ސަޕްލިމަންޓްރީ ބަޖެޓު ހުށަހަޅަން ތާވަލުކޮށްފައިވާ ޖަލްސާއަށް ބަލި ހާލަތު ހުރި ގޮތުން ވަޑައިގެންނެވެން ނެތް ކަމަށް ފިނޭންސް މިނިސްޓަރު އިބްރާހިމް އަމީރު މަޖިލީހަށް އަންގަވާފައިވާކަމަށެވެ.
މިކަމުގައިވެސް ވަކި ގޮތެއް ނިންމޭނީ ޖަލްސާގެ ކޯރަމް ހަމަވެ މަޖިލީހުން ވަކި ގޮތެއް ނިންމައިގެން ކަމަށް އީވާ ވިދާޅުވިއެވެ. މަޖިލީހުގެ ދެވަނަ ޖަލްސާ ބޭއްވުމަށް އެޖެންޑާކޮށްފައި ވަނީ މިއަދު ހެނދުނު 11 ޖަހާއިރުއެވެ. އެ ޖަލްސާގެ އެޖެންޑާގައި އޮތީ ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް ކަމަށް ހުށަހަޅާފައިވާ ގަރާރާ މެދުގައި ގޮތެއް ނިންމުމެވެ.
