ރައްޔިތުންގެ މަޖިލިހުގެ ނާއިބު ރައީސް އީވާގެ އިތުބާރު ނެތްކަމުގެ މައްސަލަ ރައްޔިތުންގެ މަޖިލީހަށް ހުށަހެޅުމަށް ރައްޔިތުންގެ މަޖިލިހުގެ އެމްޑީޕީގެ މެމްބަރުން ތައްޔާރުވާން ފަށައިފިއެވެ.
"ޚަބަރު އޮންލައިން"އަށް މައުލޫމާތު ދެމުން އެމްޑީޕީގެ ޕީޖީ ގުރޫޕުގެ މެމްބަރަކު ވިދާޅުވީ އީވާގެ އިތުބާރު ނެތްކަމުގެ މައްސަލަ މަޖިލީހަށް ހުށަހެޅުމަށް ސޮއި ހޯދުމުގެ މަސައްކަތް މިހާރު ފަށާފައިވާ ކަމުގައެވެ.
އީވާގެ އިތުބާރު ނެތްކަމުގެ މައްސަލަ މަޖިލިހަށް ހުށަހެޅުމަށް މަސައްކަތް ފަށާފައިވާއިރު، މިއަދު ހެނދުނު ބޭއްވުނު މަޖިލިސް ޖަލްސާގައި ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ މައްޗަށް އިތުބާރު ނެތް ކަމަށް ނިންމައި މަޖިލިހަށް ހުށަހެޅި ގަރާރު ބޭރު ކޮށްލަން މަޖިލީހުގެ ރިޔާސަތު މިއަދު ބެލެހެއްޓެވި ވިލުފުށީ ދާއިރާގެ މެންބަރު ހަސަން އަފީފް ވަނީ ނިންމަވާފައެވެ. އެމައްސަ މަޖިލިހުން ބޭރުކޮށްލީ ނިންމެވީ އިތުބާރު ނެތްކަމަށް ހުށަހެޅި ގަރާރުގައި ދީބާޖާއެއް ނެތިގެން ކަމަށް ބުނެއެވެ.
މިއަދު ހެނދުނު ބޭއްވުނު ޖަލްސާގައި ރިޔާސަތު ބެލެހެއްޓެވި ހަސަން އަފީފު މަޖިލިހުގެ ޖަލްސާ ފެށުމާއެކު ނިޒާމީ ނުކުތާ ނަންގަވާ، މެދުހެންވޭރު ދާއިރާގެ މެމްބަރު އަލީ އާޒިމް ވިދާޅުވީ ގަރާރު މަޖިލީހަށް ހުށަހަޅާފައިވަނީ މަޖިލިހުގެ ގަވާއިދާ ޚިލާފަށް ކަމުގައެވެ. އޭނާ ވިދާޅުވީ ގަރާރުތައް ހުށަހަޅަންޖެހޭ ގޮތް މަޖިލިސް ގަވާއިދުގައި އެބައޮތް ކަމަށެވެ. އެހެންކަމުން، ގަވާއިދު ހިފެހެއްޓުމަށްޓަކާ ގަރާރު އަބުރާ ގެންގޮސް އަލުން މަޖިލިހަށް ހުށަހަޅަންޖެހޭކަމަށް އޭނާ ވިދާޅުވިއެވެ.
ގަރާރު އޮންނަންޖެހޭނީ ގަރާރެއްގެ ސިފައިގައޭ. މިގަވައިދު މިބުނާ ގޮތަށް ގަރާރު ނެތް. އަޅުގަޑަކަށް ނުފެނޭ ގަރާރު އެގޮތަކަށް. އެންމެ ބޮޑު އެއްކަމަކީ ގަރާރު ދީބާޖާއެއް އޮންނަންޖެހޭނެކަމަށް މިގަވާއިދު އެބަ ބުނޭ. މިހާރު ހުށަހެޅިފަ އޮތް ކަރުދާހުގައި އަޅުގަޑު ބަލާއިރުގަ ދީބާޖާއެއް ނެތް. އެހެންވީމަ އަޅުގަޑު ދެކެނީ މިއީ ނިޒާމީ މައްސަލައެއް ކަމަށް. ބޮޑު މައްސަލައެއް ކަމަށް. އަނެއްކާވެސް މި ބޭފުޅުންނަށް ދެވިދާނެ، ސުޕްރިމް ކޯޓަށް ގެންގޮސްގެން ހޯދަންވީ ކޮބައިތޯ އެކަން ކުރަންވީ ގޮތަކީ. އެހެންނަމަވެސް މި ގަވައިދުގަ ވަކި ގޮތަކަށް ބުނެފަ އޮއްވާ، ވަކިކަމެއް ވަކިގޮތަކަށް ކުރަން ބުނެފަ އޮއްވަކައެއް ދެނެއް އެހެން ގޮތަކަށް ކުރުމުގެ ފުރުސަތެއް އަޅުގަޑެއް ޔަގީންނުންވެސް ދީގެން މިތާކު ނީންނާނަން.
އެމްޑީޕީން ހުށެހެޅި ގަރާރުގައި ދީބާޖާއެއް ނެތްކަމަށް ވިދާޅުވަމުން އަލީ އާޒިމް ވިދާޅުވިއެވެ.
އަލީ އާޒިމްގެ ނިޒާމީ ނުކުތާ ގަބޫލު ކުރައްވަމުން ރިޔާސަތުގައި އިންނެވި ހަސަން އަފީފު ވިދާޅުވީ އެއީ ނިޒާމީ މައްސަލައެއް ކަމަށާއި، ގަރާރު މަޖިލީހުން ބަލައިނުގަނެ ބޭރު ކޮށްލީ ކަމުގައެވެ.
އޭރުވެސް އެމްޑީޕީގެ މެމްބަރުން ދިޔައީ މަޖިލިހުގައި އިހުތުޖާޖް ކުރަމުންނެނެވެ.
ރައްޔިތުންގެ މަޖިލީހަށް މިއަދު އެޖެންޑާކޮށްފައި އޮތް މައްސަލަ ހެނދުނުގެ ޖަލްސާގައި ރިޔާސަތުން ބޭރުކޮށްފައި ވަނިކޮށް، އެ މައްސަލަ އަލުން ކުރިއަށްގެންދެވޭނެ ކަމަށް ގަބޫލު ނުކުރައްވާ ކަމަށް ވިދާޅުވެ، އެ މައްސަލަ ކުރިއަށްގެންދަވަން މަޖިލީހުގެ ނައިބު ރައީސް އީވާ ދެކޮޅު ހައްދަވައި، މަޖިލިހުގެ ދެވަނަ ޖަލްސާވެސް ކުރިޔަށް ނުގެންގޮސް ވަނީ ނިންމާލާފައެވެ.
މެންދުރަށް ތާވަލުކުރި ޖަލްސާ ފައްޓަވަމުން ރިޔާސަތު ބެލެހެއްޓެވި އީވާ ވިދާޅުވީ، ނަޝީދު ވަކިކުރުނަށް ހުށަހަޅާފައި އޮތް ގަރާރަކީ މަޖިލީހުން ބޭރިކޮށްފައިވާ ގަރާރަކަށް ވާތީ އެއީ މިހާރު ސައްހަ ގަރާރެއް ނޫން ކަމުގައެވެ. އެހެންކަމުން ޖަލްސާ ނިންމާލީކަމަށް ވިދާޅުވެ އީވާ ޖަލްސާ ނިންމާލީއެވެ.
މިއީ އީވާގެ އިތުބާރު ނެތްކަމުގެ މައްސަލަ މަޖިލިހަށް ހުށަހެޅުމަށް އެމްޑީޕީގެ މެމްބަރުން މަޖިލިހަށް ހުށަހަޅާ ދެވަނަފަހަރެވެ. މީގެ ކުރިން ހުށަހެޅި މައްސަލަ، ފާއިތުވި ރިޔާސީ އިންތިޚާބުގެ ފުރަތަމަ ބުރަށްފަހު އެމްޑީޕީންވަނީ އަނބުރާ ގެންގޮސްފައެވެ. އެހެންނަމަވެސް ރިޔާސީ އިންތިޚާބުގައި ރައީސް ސާލިހަށް ނާލާމިޔާބު ވުމަށްފަހު އަނެއްކާވެސް އެމްޑީޕީންވަނީ ނަޝީދުގެ އިތުބާރު ނެތްކަމުގެ މައްސަލަ އަލުން މަޖިލިހަށް ވައްދާފައެވެ.
