ބާންލޭ ބަލިކޮށް, އިނގިރޭސި ޕްރިމިއަރ ލީގު ތާވަލްގެ ދެވަނަ އަށް އާސެނަލް ޖެހިލައިފިއެވެ.
ބާންލީގެ މައްޗަށް އާސެނަލް ކުރިހޯދީ 3-1 ނެވެ. އާސެނަލް އަށް ދެވަނައަށް ޖެހިލެވުނީ, ކުރިން އެމަގާމްގައި އޮތް ޓޮޓެންހަމް ވުލުވްސް އަތުން ބަލިވެ, އާސެނަލް އިން ބާންލޭ ބަލިކުރުމުނެވެ. މެޗުގައި އާސެނަލް އަށް ފުރަތަމަ ލަނޑު ޖަހާ ކުރި ހޯދައިދިނީ ފުރަތަމަ ހާފްގެ އިތުރު ވަގުތުގައި ޓްރޮސާޑްއެވެ.
ދެވަނަ ހާފް ފަށައިގެން ނުވަ ވަނަ މިނިޓްގައި ބާންލޭ އިން ނަތީޖާ ހަމަހަމަ ކުރިއެވެ. ނަތީޖާ ހަމަހަމަކޮށްދިނީ ބްރޯންހިލްއެވެ. އެކަމަކު ދެ މިނިޓް ތެރޭގައި އާސެނަލް އިން އަލުން ލީޑް ނެގިއެވެ. ދެވަނަ ފަހަރަށް ލީޑް ނަގައިދިނީ ވިލިއަމް ސަލިބާއެވެ. އާސެނަލްގެ ތިންވަނަ ލަނޑު ޖެހީ ޒިންޗެންކޯއެވެ. މެޗު އާސެނަލް އިން ނިންމާލަން ޖެހުނީ ދިހަ ކުޅުންތެރިންނާއެކުއެވެ. އެއީ މެޗު ނިމެން ހަތް މިނިޓަށް ވެފައިވަނިކޮށް ކުރި ފައުލަކަށް ފަބިއޯ ވިއެއިރާ އަށް ސީދާ ރަތްކާޑެއް ދެއްކުމުންނެވެ. ދެވަނަ ހާފްގައި ކުޅެން ނިކުމެ އޭނާ ރަތްކާޑެއް ހޯދީ ބްރޯންހިލްއަށް ކުރި ފައުލަކަށެވެ.
މެޗުން މޮޅުވެ އާސެނަލް ދެވަނާގައި އޮތީ އެއްވަނާގައި އޮތް މެންޗެސްޓަރ ސިޓީއަށްވުރެ އިތުރަށް މެޗެއް ކުޅެގެން, އެއް އަދަދަކަށް ޕޮއިންޓް ހޯދައިގެންނެވެ. ކުރިން ދެވަނާގައި އޮތް ޓޮޓެންހަމް ވަނީ ވުލުވްސް އަތުން 2-1 ން ބަލިވެ, ތިންވަނަ އަށް ސޮއްސާލާފައެވެ. ޓޮޓެންހަމްއާ އާސެނަލްއާ ދެމެދު ވެސް އޮތީ ޕޮއިންޓެއްގެ ފަރަގެކެވެ.
ލީގުގެ އެއްވަނައިގައި އޮތް ސިޓީ އަށް 11 މެޗުން 27 ޕޮއިންޓް ލިބިގެންނެވެ. މިރޭ ސިޓީ ނިކުންނާނީ ޗެލްސީއާއި ދެކޮޅަށެވެ.
