ގައުމު ކުރިއެރުވުމަށް އެންމެން އެކަތިގަނޑަކަށްވާން ޖެހޭކަމަށް އިންތިހާބީ ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.
މިއަދު ފާހަގަކުރާ ޖުމްހޫރީ ދުވަހުގެ މުނާސަބަތުގައި ޢާންމުކުރެއްވި ވީޑިއޯ މެސެޖުގައި މުޢިއްޒު ވިދާޅުވީ، ޖުމްހޫރީ ވެރިކަމުގެ ފޮނިމީރުކަން ރައްޔިތުންނަށް ލިބޭނީ ރައްޔިތުންނާއި ސަރުކާރު ގުޅިގެން ގައުމު އިސްކޮށް މަސައްކަތްތަކެއް ކުރެވިގެންކަމަށެވެ. އެމަނިކުފާނު ވަނީ ޖުމްހޫރީ ނިޒާމު މިއަދާ ހަމައަށް ގެނެސްދިނުމުގައި މަސައްކަތް ކުރެއްވި ހުރިހާ ބޭފުޅުންނަށް ޝުކުރު އަދާކުރައްވާފައެވެ.
އެގޮތުން ޖުމްހޫރީ ނިޒާމު މިއަދާ ހަމައަށް ގެނެސްދިނުމުގައި މަސައްކަތް ކުރެއްވި ހުރިހާ ރައީސުންނާއި ކެބިނެޓްތަކުގައި މަސައްކަތް ކުރެއްވި ބޭފުޅުންނާއި، ވިޔަފާރިވެރިންނާއި ސިޔާސީ ޕާޓީތަކުގެ ވެރިންނަށް އިންތިޚާބީ ރައީސް ވަނީ ޝުކުރު އަދާކުރައްވާފައެވެ.
އެމަނިކުފާނުގެ މެސެޖުގައި ގައުމަށް ހަމަޖެހުން ގެނެސް ގައުމު ކުރިއަރުވަން އެންމެން އެކަތިގަނޑަކަށްވުމަށް އިލްތިމާސްކުރެއްވިއެވެ.
އަޅުގަނޑުމެންގެ ގައުމަށް ހަމަޖެހުން ބޭނުންވޭ. ގައުމު ކުރިއަރުވަން އެންމެން އެކަތިގަނޑަކަށްވާން އެބަޖެހޭ. އެހެންވީމަ މިގޮތުގައި ކުރިއަށް ދިއުމަށް ހުރިހާ ބޭފުޅުންނަށް މި ދުވަހުގެ ތަހުނިޔާ އަރިސްކުރަމުން އިލްތިމާސްކުރަން.
– އިންތިޚާބީ ރައީސް ފޮނުއްވި ތަހުނިޔާގެ މެސެޖުގައި ވިދާޅުވިއެވެ.
މިއަދު ފާހަގަކުރަނީ ރާއްޖޭގެ 56 ވަނަ ޖުމްހޫރީ ދުވަހެވެ. އިންތިޚާބީ ރައީސް މިމަހުގެ 17ގައި ހުވާކުރައްވާނެއެވެ. އެމަނިކުފާނު ވެވަޑައިގަންނަވާނީ ދެވަނަ ޖުމްހޫރިއްޔާގެ 7 ވަނަ ރައީސަށެވެ.
