ދިވެހިރާއްޖޭގެ ޖުމުހޫރީ ދުވަހުގެ މުނާސަބަތުގައި މާދަމާ ރައީސް ސާލިހު ގައުމާ މުޚާތަބް ކުރައްވާ ގޮތަށް ހަމަޖެހިއްޖެއެވެ. ރައީސް ސާލިހު މާދަމާ ގައުމާ މުޚާތަބް ކުރައްވާނީ ހެނދުނު 10:00 ގައެވެ. އަދި ރައީސްގެ ޚިޡާބު ރާއްޖޭގެ ގިނަ ޓީވީ ޗެނަލްތަކުން ބްރޯޑްކާސްޓު ކުރުމަށްވެސް ވަނީ ހަމަޖެހިފައެވެ.
ކޮންމެ އަހަރަކުވެސް ޖުމުހޫރީ ދުވަސް ފާހަގަ ކުރެވެނީ ރާއްޖޭގެ ވެރިކަން ދެވަނަ ފަހަރަށް ޖުމުހޫރިއްޔަތަކަށް ބަދަލުވި ތާރީޚާއި ދިމާކޮށެވެ. ދިވެހިރާއްޖެ ދެވަނަ ފަހަރަށް ޖުމުހޫރިއްތަކަށް ބަދަލުވީ 1968 ވަނަ އަހަރުގެ ނޮވެމްބަރުމަހުގެ 11 ވަނަ ދުވަހުއެވެ. ދެވަނަ ޖުމުހޫރިއްޔާގެ ފުރަތަމަ ރައީސްއަކީ އިބުރާހިމް ނާސިރެވެ.
ދިވެހިރާއްޖޭގެ ވެރިކަން ޖުމުހޫރިއްޔަތަކަށް އެންމެ ފުރަމަ ބަދަލުވީ 1 ޖެނުއަރީ 1953 ގައެވެ. އެ ޖުމުހޫރިއްޔަތުގެ ރައީސްއަކީ މުހައްމަދު އަމީންއެވެ. އެ ވެރިކަން ދެމިއޮތީ 7 މަހާއި ދުވަސްކޮޅަކުއެވެ.
އެޖުމުހޫރިއްޔަތު އުވި ދިއުމަށްފަހު ރާއްޖޭގެ ވެރިކަން އަނެއްކާވެސް ރަސްކަމަކަށް ބަދަލުވިއެވެ. ރާއްޖޭގެ ވެރިކަން ރަސްކަމަކަށް ބަދަލުވީ 7 މާރޗް 1954 ގައެވެ. އެފަހަރު ރަސްކަމަށް އިސްކުރެވުނީ އައްސުލްޠާން މުޙަންމަދު ފަރީދުލްއައްވަލްއެވެ.
އިބުރާހިމް މުހައްމަދު ސާލިހަކީ ރާއްޖޭގެ ދެވަނަ ޖުމުހޫރިއްޔާގެ 6 ވަނަ ރައީސްއެވެ. ދެވަނަ ޖުމުހޫރިއްޔާގެ 7 ވަނަ ރައީސް މިމަހުގެ 17 ވަނަ ދުވަހު ރައީސްކަމުގެ ހުވާކުރެއްވުމަށް ވަނީ ހަމަޖެހިފައެވެ.
ކޮމެންޓު ފޮނުވާ