އިންތިޚާބީ ރައީސް ޑރ. މުއިއްޒުގެ ސަރުކާރު ހުވާކުރުމަށް އެންމެ ހަފްތާއަކަށް ވެފައުިވާއިރު، ތައުލީމީ އަދި ޒުވާން ބޭފުޅުންގެ މައްޗަށް އެކުލެވޭ، އެމަނިކުފާނުގެ ކެބިނެޓް ލިސްޓެއް މީޑިއާތަކުގައި ރިޕޯޓު ކޮށްފިއެވެ.
ފާއިތުވި ރިޔާސީ އިންތިޚާބު ކާމިޔާބު ކުރައްވާ، ރާއްޖޭގެ ރައީސުލް ޖުމުހޫރިއްޔާގެ މަގާމާ މިމަހުގެ 17ވަނަ ދުވަހު ޑރ. މުއިއްޒު ހަވާލުވެވަޑައިގަންނަވާނެއެވެ. އެގޮތުން އެދުވަހު ހަވީރު ޑރ. މުއިއްޒު ރާއްޖޭގެ ރައީސުލްޖުމުހޫރިއްޔާގެ މަގާމާ ހަވާލުވެވަޑައިގެންނެވުމަށްފަހު، އެރޭގެ އިރާކޮޅުގެ ވަގުތެއްގައި ޑރ. މުއިއްޒުގެ ކެބިނެޓްވެސް ހުވާ ކުރައްވާނެއެވެ.
އެހެންނަމަވެސް މިހާތަަނަށް އައިއިރުވެސް ޑރ. މުއިއްޒުގެ ކެބިނެޓްގައި ހިމެނިވަޑައިގަންނަވަނީ ކޮން ބޭފުޅުންނެއްކަމައެއް އިންތިޚާބީ ރައީސްގެ އޮފީހުން ރަސްމީކޮށް ހާމަކޮށްފައެއް ނުވެއެވެ. އަދި ގިނަ މީޑިއާތަކުގެ މިއަދު ރިޕޯޓު ކޮށްފައިވާ ލިސްޓާއި ގުޅޭގޮތުންވެސް އިންތިޚާބީ ރައީސްގެ ފަރާތުން ރަސްމީ އެއްވެސް ކޮމެންޓެއް އަދި ކޮށްފައެއް ނުވެއެވެ.
އެހެންނަމަވެސް، މީޑިއާގެ ބައެއް ރިޕޯޓުތަކުންނާއި، އަދި ބައެއް މަސްދަރުތަކުން ވަނީ ޑރ. މުއިއްޒުގެ ކެބިނެޓަށް ވަޑައިގަންނަވާނޭކަމަށް ބެލެވޭ ބައެއް ބޭފުޅުންގެ ނަންތައް މިހާރު ހާމަވެފައެވެ. އޭގެ ތެރޭގައި ހިމެނޭ ގިނަ ބޭފުޅުންނަށް ބަލާއިރު، ޕީއެޗްޑީ ހާސިލް ކުރައްވާފައިވާ ބޭފުޅުން ޑރ. މުއިއްޒުގެ ކެބިނެޓްގައި ގިނަ އަދަދަކަށް ހިމެނޭކަން ފާހަގަ ކޮށްލެވެއެވެ.
މިގޮތުން ޑރ. މުއިއްޒުގެ ކެބިނެޓަށް ވަޑައިގަންނަވާނޭކަމަށް މީޑިއާތަކުގައި ރިޕޯޓު ކޮށްފައިވާ ބޭފުޅުންގެ ނަންތައް ތިރީގައި މިވަނީއެވެ.
- ހޯމް މިނިސްޓަރު – އަލީ އިހްސާން
- ޑިފެންސް މިނިސްޓަރު – ގައްސާން މައުމޫން (ތ. ގުރައިދޫ ދާއިރާގެ މެންބަރު)
- ޕްލޭނިން އެންޑް އެންވަޔަރަމަންޓް މިނިސްޓަރު – ތޯރިގް އިބްރާހީމް
- ފިޝަރީޒް މިނިސްޓަރު – އަހްމަދު ޝިޔާމް
- ލޯކަލް ގަވާނަންސް މިނިސްޓަރު – އާދަމް ޝަރީފު
- އިސްލާމިކް މިނިސްޓަރު – ޑރ. މުހައްމަދު ޝަހީމް އަލީ ސައީދު
- ޓޫރިޒަމް މިނިސްޓަރު – އިބްރާހީމް ފައިސަލް
- ޔޫތު އެންޑް ޓެކްނޮލޮޖީ – އިބްރާހީމް ވަހީދު (އަސްވާޑް)
- ޖެންޑާ މިނިސްޓަރު – ޑރ. އައިޝަތު ޝިހާމް
- އެގްރިކަލްޗާ މިނިސްޓަރު – ޑރ. އައިޝަތު ރަމީލާ
- ޓްރާންސްޕޯޓް މިނިސްޓަރު – މުހައްމަދު އަމީން (ކެޕްޓަން އަމީން)
- ހަޔާ އެޑިއުކޭޝަން މިނިސްޓަރު – ޑރ. ،މަރިޔަމް މާރިޔާ
- ފޮރިން މިނިސްޓަރު – މޫސާ ޒަމީރު
- ހެލްތު މިނިސްޓަރު – ޑރ. އަބްދުﷲ ޚަލީލް
- އެޑިޔުކޭޝަން މިނިސްޓަރު – ޑރ. އިސްމާއީލް ޝަފީއު
- ފިނޭންސް މިނިސްޓަރު – ޑރ. މުހައްމަދު ޝަފީގް
- އިކޮނޮމިކް މިނިސްޓަރު – މުހައްމަދު ސައީދު
- ސްޕޯޓްސް މިނިސްޓަރު – ޑރ. އަބްދުﷲ ރާފިއު
- އިންފްރާސްޓްރަކްޗާ އެންޑް ކޮންސްޓްރަކްޝަން މިނިސްޓަރު – ޑރ. އަބްދުﷲ މުއްތަލިބް
- ހައުސިން މިނިސްޓަރު – ޑރ. އަލީ ހައިދަރު އަހްމަދު
- ބަންޑާރަ ނައިބު – އަހްމަދު އުޝާމް
މި ލިސްޓަށް ބަލާއިރު، ރާއްޖޭގެ އުފެދިފައިވާ ސިޔާސީ ޕާޓީތަކުގެ ތެރެއިން ޕީޕީއެމް/ޕީއެންސީ ފިޔަވާ ދެން ބޭފުޅަކު ހިމެނެނީ ހަމައެކަނި ކާނަލް ނާޒިމް ހިންގަވާ އެމްއެންޕީންނެވެ. އޭގެ އިތުރުން ދެން މި ލިސްޓުގައި ހިމެނެނީ ޑރ. މުއިއްޒު ވަރަށް ގާތް ބައެއް ބޭފުޅުންނާއި ތައުލީމީ ބޭފުޅުންނެވެ.
