ރާއްޖެއަށް އެތެރެކުރަން އުޅުނު 2 ކިލޯއަށް ވުރެ ގިނަ މަސްތުވާތަކެތި ކަސްޓަމްސްއިން އަތުލާގަނެފިއެވެ.
އަތިލާގަން މަސްތުވާތަކެއްޗަކީ މިދިޔަ އޮކްޓޫބަރު މަހާއި ސެޕްޓެމްބަރުމަހު ކުރިއަރ އަދި ޕޯސްޓް މެދުވެރިކޮށް 5 ޕާރުސަލެއްގައި ރައްކާކޮށް ރާއްޖެ އެތެރެކުރަން މަސައްކަތްކޮށްފައިވާ ތަކެއްޗެވެ. ކަސްތަމްސްއިން ބުނީ، މި ޕާރުސަލްތައް ރާއްޖެ އައިސްފައިވަނީ ތަފާތު 5 ޤައުމަކުންކަމަށެވެ.
އެގޮތުން 4 ޕާރުސަލްގައި ހުރި މަސްތުވާތަކެތި ބަލާ ތަހުލީލް ކުރުމުން އެތަކެތި މަސްތުވާތަކެތީގެ ބާވަތެއް ކަމަށްވާ ސިންތެޓިކް ކެތިނޯންއަށް ޕޮޒިޓިވްވެފައިވާ ކަމަށް ކަސްޓަމްސްއިން ބުންޏެވެ. އަދި އަނެއް ޕާރުސަލުގައި ހުރި ތަކެތި މެފެޑްރޯންއަށް ޕޮޒިޓިވް ވެފައިވާ ކަމަށްވެސް ކަސްޓަމްސްއިން ބުންޏެވެ.
މިތަކެތި އެތެރެކުރަން މަސައްކަތްކުރީ ކޮން ގައުމަކުންކަމެއް ކަސްޓަމްސްއިން ނުބުނެއެވެ. އެތަކެތި ފުލުހުންނާ ހަވާލުކޮށްފައިވާކަމަށާއި، އެ މައްސަލަ ތަހްގީގްކުރާކަމަށް ކަސްޓަމްސްއިން ބުންޏެވެ.
