ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތް ކަމުގެ މައްސަލަ ކުރިއަށް ގެންދެވޭނެ ގޮތެއް ހޯދަން އެމްޑީޕީން ސުޕްރީމް ކޯޓަށް ހުށަހެޅި މައްސަލައިގައި ރައްޔިތުންގެ މަޖިލިސް ތަމްސީލުކުރައްވަމުން، އެ މައްސަލާގައި ރައްޔިތުންގެ މަޖިލިހުން ކުރިން ދެކެމުން އައިގޮތާއި ޚިލާފަށް ސުޕްރިމް ކޯޓުގައި ބަންޑާރަނައިބު ވަކާލާތު ކުރައްވައިފިއެވެ.
މިހާރު ރައްޔިތުންގެ މަޖިލިހަށް ހުށަހަޅާފައިވާ، ނަޝީދުގެ އިތުބާރު ނެތްކަމުގެ މައްސަލަ، މަޖިލިހުގެ ނާއިބުރައީސް އީވާ ރިޔާސަތަށް ވަޑައި ނުގަތުމާއި ގުޅިގެން މުޅި މަޖިލިހުގެ މަސައްކަތް ވަނީ ހުއްޓުމަކަށް އައިސްފައެވެ.
މަޖިލީހުގެ ގަވާއިދު ބުނާގޮތުން މަޖިލީހުގެ ރައީސްގެ އިތުބާރު ނެތްކަމުގެ މައްސަލަގައި ރިޔާސަތު ބަލަހައްޓަވަންޖެހޭނީ މަޖިލީހުގެ ނައިބު ރައީސްއެވެ. މަޖިލީހުގެ ނައިބު ރައީސް ނެތް ހާލަތެއްގައި ކަންކުރަންވީ ގޮތެއް މަޖިލީހުގެ ގަވައިދުގައި ހިމަނާފައެއްނުވެއެވެ.
ފާއިތުވެދިޔަ ހަފްތާއެއްހާ ދުވަހުވެސް ނަޝީދުގެ އިތުބާރު ނެތްކަމުގެ މައްސަލަ މަޖިލިހުގައި އެޖެންޑާ ކުރުމަށްފަހު، މަޖިލިހުން ޖަލްސާތައް ކެންސަލް ކޮށްފައިވަނީ، މަޖިލިހުގެ ގާވާއިދުގައިވާގޮތުން، ނާއިބު ރައީސް ރިޔާސަތު ނުބަހައްޓާ ހާލަތުގައި އިތުބާރު ނެތްކަމުގެ މައްސަލަ ކުރިޔަށް ނުގެންދެވޭނެކަމަށް ބުނެއެވެ. އަދި މިއަދުގެ ސުޕްރިމް ކޯޓުގެ އަޑުއެހުމުގައި ވާހަކަ ދައްކަވަމުންވެސް މަޖިލިހުގެ ކައުންސިލް ޖެނެރަލް ފިލްޒާ ވިދާޅުވެފައިވަނީ މިހާލަތުގައި މަޖިލިހުގެ ޖަލްސާތައް ކުރިޔަށް ގެންދެވޭނީ މަޖިލިހުގެ ގާވާއިދު ބަދަލު ކޮށްގެން ކަމުގައެވެ.
އެހެންނަމަވެސް އެމްޑީޕީގެ ޕާލިމަންޓްރީ ގްރޫޕުގެ މެންބަރުން ވިދާޅުވަމުން ގެންދަވަނީ މަޖިލީހުގެ ރައީސްއާއި ނާއިބު ރައީސް ނެތި މަޖިލިސް ހުއްޓުވާފައި ބޭއްވޭނެ ގޮތެއް ޤަވާއިދުގައިވެސް ނެތްކަމަށެވެ.
އެމްޑީޕީން ސުޕްރިމް ކޯޓަށް ހުށަހެޅި މައްސަލާގައި މަޖިލިސް ތަމްސީލުކޮށްފައިވަނީ ދައުލަތުގެ ބަންޑާރަނައިބުގެ ފަރާތުންނެވެ. އެހެންނަމަވެސް ދައުލަތުގެ ބަންޑާރަ ނައިބު މިއަދު މަޖިލިހުގައި ވަކާލާތު ކުރައްވަމުން ވިދާޅުވެފައިވަނީ، އެމްޑީޕީގެ ސްޓޭންޑާއި އެއްގޮތަށް، މިމައްސަލާގައި ރައްޔިތުންގެ މަޖިލިހުގެ އިދާރާއިން ވަކާލާތު ކުރަމުން ގެންދާ ގޮތާއި ދެކޮޅަށެވެ.
އެގޮތުން މައްސައާއި ގުޅުންހުރި ނުކުތާތައް ފާހަގަކުރެއްވުމަށްފަހު ބަންޑާރަނައިބުގެ ފަރާތުން ސުޕްރިމް ކޯޓުގެ ބެންޗުގެ ފަރާތުން އެދިފައިވަނީ، ރައްޔިތުންގެ މަޖިލިހުގެ އިދާރާއިން މަޖިލިހުގެ ގަވާއިދުގެ 44 ވަނަ މާއްދާއާއި 205 ވަނަ މާއްދާގެ (ބ) މާނަ ކޮށްފައިވަނީ ގާނޫނު އަސާސީގެ 82 ވަނަ މާއްދާ ގެ (ށ)ގެ މަގުސަދު ހާސިލް ނުވާނޭގޮތަށްކަމަށާއި ރައްޔިތުންގެ މަޖިލިހުގެ މަސައްކަތްތައް ހުއްޓޭ ގޮތަށްކަމަށް ކަނޑައަޅުއްވައި ދެއްވުމަށެވެ.
ރައްޔިތުންގެ މަޖިލިހެގެ ގަވާއިދުގެ 205 ވަނަ މާއްދާގެ (ނ) ގައި ބުނާ ނޯޓިހުގެ މުއްދަތު ހަމަވުމަށްފަހު އެންމެ އަވަހަށް އަންނަ ރަސްމީ ބަންދުނޫން ދުވަހެއްގައި މަޖިލިހުގެ ރައީސް މަގާމުން ވަކިކުރުމުގެ ގަރާރު މަޖިލިހުގެ ޖަލްސާއަށް ހުށަހަޅަން ވާނެކަަމަށް އެ މާއްދާގަ ބަޔާން ކޮށްފައިވާތީ އެމުއްދަތަށްފަހު އެ ޖަލްސާ ބޭއްވުން ލާޒިމްވާތީ، ގާނޫނު އަސާސީގެ 82 ވަމަ މާއްދާގެ (ށ)އާއި (ޅ) އަދި މަޖިލިހުގެ ގަވައިދުގެ 44 ވަނަ މާއްދާ އާއި ހަވާލާދީ ރައްޔިތުންގެ މަޖިލިހުގެ ގަވާއިދުގެ 205 ވަނަ މާއްދާގެ (ބ)ގައި ވާގޮތުގެމަތިން ރައްޔިތުންގެ މަޖިލިހުގެ ރައީސް މަގާމުން ވަކިކުރުމަށް ހުށަހަޅާފައިވާ މައްސަލައިގަ ގޮތެއް ނިންމުމުގެ ޖަލްސާގެ ރިޔާސަތު ބެލެހެއްޓުމަށް ރައްޔިތުންގެ މަޖިލިހުގެ ނާއިބު ރައީސް ހާޒިރު ނުވާ ހާލަތުގައި އަދި އެޖަލްސާ ނުބޭއްވި ކިތައްމެ ދިގު މުއްދަތެއް ފާއިތުވިޔަސް ނާއިބު ރައީސް ނޫން މީހަކަށް އެޖަލްސާގެ ރިޔާސަތު ނުބެލެހެއްޓޭނެ ގޮތަށް އެމާއްދާ މާނަކުރުމަކީ ގާނޫނީގޮތުން ސައްޙަ މާނަކުރުމެެއްކަމަށް ބަލާނެ ދުސްތޫރީ ހަމައެއް އަދި ގާނޫނީ ހުއްޖަތެއްވެސް ނެތަތީ، ރައްޔިތުންގެ މަޖިލިހުގެ ގަވާއިދުގެ 44 ވަނަ މައްދާގައި ބުނާ އިޖުރާއަތުގެ ދަށުން ރައްޔިތުންގެ މަޖިލިހުގެ ރައީސް މަގާމުން ވަކިކުރުމުގެ ޖަލްސާ ކުރިޔަށް ގެންދިއުމަށް ހުރަސްއަޅާ ދުސްތޫރީ ނުވަތަ ގާނޫނީ ސަބަބެއް ނެތްކަމަށް ކަނޑައަޅުއްވާ ދެއްވާ، މައްސަލާގައި ފައިސަލާކުރުވަނިވި ހުކުމެއް ކޮށްދެއްވާ މައްސަލަ ނިންމަވައި ދެއްވުމަށް.
ދައުލަތުން އެދޭގޮތް ހުށަހަޅުއްވަމުން ބަންޑާރަނައިބުގެ ފަރާތުން ވިދާޅުވެފައި ވެއެވެ.
މްޑީޕީން ސުޕްރީމް ކޯޓަށް ހުށަހެޅި މައްސަލައިގައި ކޯޓުން ވަކި ގޮތަކަށް ނިމެންދެން ނަޝީދުގެ އިތުބާރު ނެތްކަމުގެ މައްސަލަ ކުރިއަށް ގެންދިއުމަށް ރައްޔިތުންގެ މަޖިލީހުގެ ރިޔާސަތުގައި އިނުމަށް މަޖިލީހުގެ ނައިބު ރައީސް އީވާ އުޒުރުވެރިވެވަޑައިގަންނަވާތީ ދެން ޖަލްސާއަކަށް އެ މައްސަލަ އެޖެންޑާ ނުކުރާނެ ކަމަށް މަޖިލީހުގެ އިދާރާއިން މިއަދު ވަނީ ހާމަކޮށްފައެވެ.
