ސުޕަރސްޓަރ ސަލްމާން ޚާނާއި އޭނާގެ ކުރީގެ ލޯބިވެރިޔާ ކެޓްރީނާ ކައިފް އެކުގައި ފެނިގެންދާ ސްޕައި ފިލްމު ސީރީޒް "ޓައިގާ" ގެ 3 ވަނަ ފިލްމުގެ ފުރަތަމަ ލަވަ ބެލުންތެރިންނަށް ދޫކޮށްލައިފިއެވެ.
"ލޭކޭ ޕްރަބޫ ކާ ނާމް" ކިޔާ މިލަވަ ކިޔައިފައިވަނީ އަރިޖިތު ސިންގް އާއި ނިކިތާ ގާންދީއެވެ. ސަލްމާން ޚާނާއި ކެޓްރީނާ ކައިފްގެ ނެށުންތަކެއް ފެނިގެންދާ ދާ މި ލަވަ އަކީ ޕްރިތަމްގެ މިއުޒިކަށް ހަދައިފައިވާ ލަވަ އެކެވެ. މި ލަވައިގެ މަންޒަރުތަށް ނަގައިފައި ވަނީ ތުރުކީގައި ރީތި މަންޒިލް ތަކުގައިއެވެ.
އިންޑިއާގައި ފާހަގަކުރާ ދިވާލީ އާ ދިމާކޮށް އެޅުވުމަށް ހަމަޖެހިފައި ވާ މި ފިލްމަކީ ބެލުންތެރިން ދިގުމުއްދަތަކަށް އިންތިޒާރު ކުރަމުން އައި ފިލްމެކެވެ. ސަލްމާން އާންމުގޮތެއްގައި އޭނާގެ ފިލްމުތައް އަޅުވަނީ އީދު ނޫނީ ދިވާލީގައެވެ.
ޔާޝްރާޖް ފިލްމްސް (ވައިއާރްއެފް) ގެ ސްޕައި ޔުނިވާސްގެ ތެރެއިން ގެނެސްދޭ މި ފިލްމުގައި ދައްކުވައިދޭނީ މި ސީކުއެލްގެ ދެވަނަ ފިލްމުގެ އިތުރުން ޔާޝްރާޖްގެ ފިލްމު "ވޯ" އަދި "ޕަޓާން" އާއި ގުޅުވައިގެން ހިނގާ ހާދިސާ ތަކެކެވެ.
ސަލްމާނާއި ކެޓްރީނާއާ އެކު، ފިލްމުގެ މުހިންމު ރޯލުތަކުން ފެނިގެންދާނީ އިމްރާން ހާޝްމީ، ރެވާތީ، ރަންވީރު ޝޯރޭ، ވިޝާލް ޖެތުވާ އަދި ރިދީ އެވެ. އަދި ހާއްސަ ފެނިލުމަކުން، ޕަޓާންގެ ރޯލުން ޝާހްރުކް ޚާން ވެސް ފެންނާނެ އެވެ. އިމްރާން ހާޝްމީ ފިލްމުގައި ފެނިގެންދާނީ ނުބައި މީހެއްގެ ރޯލުންނެވެ.
